۳۸ کلني زرغونې حسن واده نه دی کړی. هغه وايي. «چې رښتیا خبره وي، وخت مې یې نه درلود.» هغې خپل ژوند د نورو ښځو له پاره ځانگړی کړی دی.

که څه هم کندز ولایت د افغانستان د يو شمېر نورو ولایتونو په شان د افراطيت له ودې سره مخامخ دی، خو دغي ښځي بيا هم خپلو ټولنیزو او فرهنگي فعالیتونو ته ادامه ورکړې ده.

زرغونه حسن په لومړي سر کې په ۲۰۰۴م کال کې د «زهره» په نوم د راډیو مسووله مدیره شوه، چې د «امپکت» د موسسې له لوري د دغه ولایت ښځو ته یوه ډالۍ وه.

دغه میرمن په کندز ولایت کې د ځوانانو له پاره د یوې راډیو د جوړولو په فکر کې شوه. د «کیهان» په نوم د راډیو تر تأسیس د مخه د دغه ولایت ځوانانو د خپلو افکارو د بیانولو له پاره کوم دریځ نه لاره.

دغې هڅانده میرمنې په وروستیو وختونو کې د «شایسته» په نوم راډیو تأسیس او پرانیستله چې یوازې میندې کولای شي چې په هغې کې کار وکړي.

د «کیهان» راډیو د جوړولو موخه د میندو د وړتیا او پوهاوي لوړول، د «زهره» راډیو هدف د ښځو پیاوړتیا او پوهاوی او د «شایسته» راډیو د جوړولو موخه د ټولنې د ښه کولو او په دغه سیمه کې د سولې د رامنځ ته کولو له پاره د میندو، هڅې ښوول کیږي.

زرغونه حسن په دغه موده کې له زیاتو ستونزو سره مخامخ شوې ده. هغه څو وارې وگواښل شوه، د تښتولو له پاره یې اقدام وشو او پر راډیویي شبکو یې یرغلونه وشول، خو هغه و نه ډار شوه او خپلو هڅو ته یې ادامه ورکړه. هغه اوس هم په کندز کې کار کوي.

د هغې له لوري د تأسیس شویو راډیو گانو په واسطه نه یوازې د ښځو او ځوانانو پوهاوی لوړ شوی دی، بلکې په ټولنه کې یې هم مثبت بدلونونه رامنځ ته کړي دي. دغه رسنۍ د ځوانو نجونو او هلکانو له پاره یو ښه سر مشق وو، چې غوښتل یې خبریالان شي.

له دغو ځوانو خبریالانو څخه زهره، د ښوونځي زده کوونکي وه چې د زرغونې په راډیو کې استخدام شوه. هغه اوس یوه پيژندل شوې ویانده او خبریاله ده. هغه او د هغې په شان نوري ډیري ښځې زرغونې ته د یوې اتلي په سترگه گوري.