د کندز په يوه جومات کې د یوې چاودنې په پایله کې درنه مرګ ژوبله رامنځته شوې ده. د معلوماتو له مخې په دې پیښه کې تر ۵۰ زيات کسان وژل شوي او په لسهاوو نور بیا ټپیان شوي دي.

د کندز د اطلاعاتو او کلتور رئيس مطيع الله روحاني ويلي دي چي د دوی د لومړنيو معلوماتو له مخي دا يو ځانمرګی بريد وو. واک ته د طالبانو له رسیدو راهيسي دا تر ټولو خونړۍ پیښه شمیرل کیږي.

د جمعې په ورځ په کندز کې د شعیه مذهبو په یوه جومات کې داسې مهاله چاودنه شوې چې پکې د جمعې لمونځ ترسره کیده.

د طالبانو ویاند ذبیح الله مجاهد هم د یادې پیښې پخلی کړی او ويلي يې دي چې د شعیه مذهبو هیوادوالو په یوه جومات کې د چاودنې له کبله نامعلوم شمیر کسان وژل او ټپیان شوي دي.

تر اوسه پورې کومې ډلې د یادې پیښې مسوولیت نه دی منلی خو تر دې وړاندې هم داعش پر شعیه ګانو باندي خونړي بریدونه کړي دي.

د کندز یو سوداګر چې په بیړه د وینې د ورکړې له پاره روغتون ته ورغلی وايي چې تر ۴۰ ډیر جسدونه یې لیدلي دي. هغه د فرانسې خبري آژانس ته وویل چې امبولانسونه هم سیمې ته ور روان ول څو مړي را انتقال کړي. د بې پولو ډاکټرانو د روغتون یوه بهرني کارمند وویل چې داسې اندیښنې هم شته چې د تلفاتو شمیر تر دې هم لوړ شي.