په وروستیو ورځو کې په یونان کې د آژه سمندرګي ختیځو ټاپوګانو کې د مهاجرو د نوم لیکنې لومړني مرکزونه له حده زیات ډک سوي دي. د یونان په پلازمینه آتن کې د مهاجرت د کړکیچ ټیم وايي چې همدا اوس په دغو مرکزونو کې لس زره مهاجر په دې تمه پراته دې چې نورو اروپايي هیوادونو ته به خپل د پناه غوښتنلیک ورکړي.
دغه مرکزونه په اصل کې د ۷۴۰۰ تنو د اوسیدو ځای لري، خو د لوړ شمیر کډوالو د راتلو له کبله اوس په کې لس زره کسان ځای پرځای شوي دي. د روان کال په اپریل میاشت کې هغه وخت چې د اروپايي اتحادیې او ترکیې ترمنځ د مهاجرت د کرکیچ په تړاو تړون پلې شو، په دغو مرکزونو کې یوازې ۶۲۰۰ تنه مهاجر اوسیدل.
د آلمان خبري آژانس، د یونان د دولتي سرچینو په حواله خبر ورکوي چې آتن اوس مهال د هیواد نورو ټاپوګانو ته د دغو مهاجرو د لیږدولو پر برنامو بوخت دی.
د اروپايي ټولنې او ترکیې تر منځ د شوي تړون له مخې ټول هغه مهاجر چې په ناقانونه توګه له ترکيې څخه یونان ته رارسیږي بیرته ترکیې ته استول کیږي. د دغه تړون له مخې، د هر بیرته استول شوي مهاجر په بدل کې به یو سوریايي مهاجر له ترکيې څخه په قانوني او مستقیمه توګه اروپا ولیږدول شي.
د یوناني رسنیو د معلوماتو له مخې د مهاجرت په برخه کې یوناني چارواکي شک لري چې په ترکیه کې تر ناکامې کودتا وروسته یونان ته د مهاجرو د رسیدو د مخنیوي په برخه کې لازم اقدامات نه دي ترسره شوي.
د تړون پر اساس تر اوسه په ټوله کې ۵۰۰ تنه مهاجر له یونان څخه بیرته ترکیې ته استول شوي دي. خو د ملګرو ملتونو د مهاجرت ادارې د رپوټ پر اساس یوازې د جولای په میاشت کې د ورځې ۶۰ تنه مهاجر له ترکیې څخه یونان ته راغلي دي.
نور مطالب:
په یونان کې د مهاجرو یو غېر عادي کمپ
سوریايي مهاجرو د یونان په پلپونز سیمې کې د مهاجرو د یو کمپ له کورنو څخه ځانته یو عجیبه کور پیدا کړی. میرتو پاپادوپولو دغې سیمې ته ورغلی او ورڅخه یې لیدنه کړې ده. انځور: DW/M. Papadopoulos یو تنکی مهاجر ځوان، د کمپ څخه بهر په خپل موبایل کې انټرنیټ کې بوخت دی. د کمپ دغې سیمې کې تل مهاجر سره راټولیږي چې د یو مرکز حیثیت یې ځان ته غوره کړی دی. دغه کمپ د امالیدا په نوم د سره صلیب ادارې یوه څانګې لخوا اداره کیږي. سمارت موبایلونه د مهاجرو لپاره د ارتباط یواځنې وسیله ده.
انځور: DW/M. Papadopoulos د (ایل ایم) کلي په یو ساده کور کې اته کسان ژوند کوي. دغه کور د ناستې دوه وړې خونې لري چې هره خونه یې خپل تشناب او یو کوچنی پخلنځای لري. پخلنځایونو کې اوجاغونه او دست شويونه شته خو ګرمې اوبه او یخچال نلري. دا یوه ییلاقي سیمه ده.
انځور: DW/M. Papadopoulos ۲۷ کلنه راني موسي، د خپل اته میاشتني ماشوم سره عکس اخیستو ته ځان چمتو کوي. د راني ماشوم په سوریه کې زیږیدلی، راني او خاوند یې د ماشوم له زیږیدو وروسته لمړی ترکیې او بیا یونان ته مهاجر شوي دي.
انځور: DW/M. Papadopoulos له کمپ څخه راوتلې د مهاجرو ښځو او ماشومانو یوه ډله د (ایل ایم) کلي نه بهر پر یو سړک د قدم وهلو پرمهال. میرسیني یوه آرامه او کم نفوسه سیمه ده چې د اوړي موسم څخه د مخه، په جون میاشت کې ورته سیلانیان هم ورځي.
انځور: DW/M. Papadopoulos د راتلونکي سفر لپاره خبرې یوه ډله نارینه د (ایل ایم) کلي څخه بهر، د لمر پریوتو پر وخت د سمندر پر غاړه خبرې کوي. د (ایل ایم) کلي د مهاجرو په کمپ کې نژدې ۶۰ تنه نارینه د خپلو میرمنو او ماشومانو سره ژوند کوي.
انځور: DW/M. Papadopoulos یوه ډله مهاجرې ښځې او ماشومان، ماښام مهال د (ایل ایم) کلي د یوه کور مخته د کور د ګروپ رڼا ته راټول شوي دي. په (ایل ایم) کمپ کې ۳۴۰ تنه مهاجر ژوند کوي، چې له ډلې څخه یې ۶۹ تنه ښځې او ۲۰۹ تنه ماشومان دي.
انځور: DW/M. Papadopoulos دغه سوریايي مهاجره میرمن چې غیږ کې یې خپل شپږ میاشتنی ماشوم دی اوس د (ایل ایم) توریستي کلي په دغه ییلاقي کور کې ژوند کوي. د (ایل ایم) کلي په کمپ کې میشتې یو شمیر ښځې واړه ماشومان لري او یو شمیر نورې یې حامله دي.
انځور: DW/M. Papadopoulos د شخصي اقتصاد د ګټې په سوچ کې طارق د خپلو دوو زامنو، ۱۱ کلن ویداد او ۷ کلن زیاد سره د میرسیني کلي یو وړ سوپر مارکيټ ته راغلي. دغه مارکیټ له کمپ څخه شل کیلومتره لرې موقعیت لري. اکثره مهاجر خپل د اړتیا وړ شیانو اخستلو لپاره له (ایل ایم) نه میرسیني ته راځي تر څو یې په مناسب قیمت سودا اخیستلو سره، خپل اقتصاد ته ګټه رسولي وي.
انځور: DW/M. Papadopoulos دا د اندرویدا ښار ښاروال، نبیل یوسف مورانت دی. نوموړی په اصل کې سوريايي دی. یوسف وايي چې دی لمړنی غیر یوناني وکړی دی، چې دلته د ښاروال په توګه ټاکل شوی دی. هغه وايي کله یې چې سیمیزې شورا ته د مهاجرو د کمپ جوړولو وړاندیز وکړ نو د شورا اکثریتو غړو یې د خبرې ملاتړ وکړ.
انځور: DW/M. Papadopoulos د ستراوبیری یا ځمکني توتو فارم یو بنګله دیشی بزګر له (ایل ایم) کمپ څخه لږ لري د ستراوبیری میوې په یوه فارم کې په کار لګیا دی. د دغې سیمې په فارمونو کې اکثره له سویلي اسیا هیوادونو څخه راغلي هغه مهاجر چې اسناد نلري کار کوي. دوی د اتو ساعتونو کار په بدل کې له ۲۲ نه تر ۲۵ پورې یورو ترلاسه کوي.
انځور: DW/M. Papadopoulos د سیمې اوسیدونکي او مرستې د میرسیني ښار اوسیدونکی جورجیس اګیلوپولوس (پر موټر سیکل سپور) له ګڼ شمیر مهاجرو سره په داوطلبانه توګه مرستې کړي دي. نوموړی د مهاجرو کمپ ته نژدې کور لري. هغه وايي، لمړي سر کې د سیمې اوسیدونکو د مهاجرو کمپ د جوړیدو سره مخالفت کاوه، خو کله یې چې ولیدل په مهاجرو کې اکثریت یې کورنۍ دي مخالفتونه یې په ښکاره توګه ختم شول.
انځور: DW/M. Papadopoulos
