د جرمني د احصایې فدرالي دفتر د سه شنبې په ورځ اعلان وکړ چې په ۲۰۲۳م کال کې شاوخوا ۲۰۰ زره او سل تنو بهرنیانو د جرمني تابعیت ترلاسه کړی دی.
دا له ۲۰۰۰م کال راهیسې چې د احصایې په د فتر کې په دې تړاو د شميرو ثبت پېل شوی دی، په آلمان کې د تابعیت ترلاسه کولو تر ټولو لوړ کلنی شمېر دی.
د ۲۰۲۲م کال په پرتله په ۲۰۲۳م کال کې شاوخوا ۳۱ زره ډېرو کسانو تابيعيت اخيستی وو چې دا یو پر پنځمه برخه لوړوالی ښیي.
د احصايې فدرال دفتر د معلوماتو له مخې په وروستیو کلونو کې د هغو بهرنيانو شمير په دوامداره توګه زيات شوی دی د جرمني تابعیت ترلاسه کوي.
په ۲۰۲۲ کال کې هم دا شمير د تير يعني ۲۰۲۱م کال په پرتله کابو ۳۷ زره ډېر وو. په ټولیز ډول د ۱۵۷ هېوادونو اوسېدونکو تیر کال د جرمني تابعیت ترلاسه کړی دی.
د یادو معلوماتو له مخې د سوریې اتباع د جرمني د تابعیت ترلاسه کوونکو په سر کې دي او تېر کال ۷۵ او ۵۰۰ سوريايي وګړو د جرمني تابعيت ترلاسه کړی چې د ټولټال شمير ۳۷ سلنه جوړوي.
له دې وروسته د ترکیې، عراق، رومانیا او افغانستان اتباع تر ټولو ډېر د جرمني تابعیت ترلاسه کوونکي دي. د هغو افغانانو شمېر چې په ۲۰۲۳ کال کې یې د جرمني تابعیت ترلاسه کړی، ۶ زره او ۵۲۰ تنه وو.
هغه څه چې د آلمان تابعيت د ترلاسه کولو له پاره پرې بايد وپوهيږئ
د المان حکومت په پام کې لري، چې بهرنيانو ته د تابیعت ورکړه اسانه کړي. د حکومت پروګرام څه دی؟ اوسمهال د المان د تابیعت ترلاسه کولو بهیر څنګه دی؟ د انځورونو په دې البوم کې دغو پوښتنو ته ځواب موندلی شئ:
انځور: Winfried Rothermel/picture allianceاوس مهال د المان تابعیت څنګه ترلاسه کیږي؟
اوسمهال هغه کسان د المان تابعیت ترلاسه کولی شي، چې په دې هېواد کې یې اته کاله ژوند کړی وي او دایمي اقامت ولري. پر دې سربېره دا شرائط یې هم بايد پوره کړي وي: د الماني ژبې سره بلدتیا ( معمولآ د ب ۱ په کچه)، د ژوند لګښتونه یې په خپلواکه توګه تمویل کړی وي او د تابعیت ازموينې کاميابې کړي وي.
له اتو کلونو څخه په لږ وخت کې د تابعیت ترلاسه کول؟
هو، ممکنه ده، خو دا خپل ځانګړي شرایط لري. د اوسنیو قوانینو له مخې هر هغه څوک چې د ادغام په برخه کې ښې لاسته راوړنې ولري، لکه د ژبې او مسلکي زده کړو برخه کې یې ډېر پرمختګ کړی وي، کولی شي چې له شپږو او اوو کلونو وروسته د تابعیت غوښتنه وکړي. هر هغه څوک چې الماني پاسپورت په لاس راوړي، د المان د تبعه په توگه له ټولو حقوقو او همدا راز مکلفیتونو څخه برخمن کیږي.
د المان ایتلافي حکومت کوم بدلونونه په پام کې لري؟
د آلمان ایتلافي حکومت د ایتلافي تړون پرمهال توافق کړی و، چې د تابعیت ورکړې په برخه کې به خنډونه را کم کړي. له دې جملې څخه حکومت په پام کې لري، چې د خارجيانو له پاره د تابعيت ترلاسه کولو د اتوو کلونو اقامت د اړتيا موده اوس پنځوو کلونو ته راټيته کړای شي. دا هم په نظر کې ده چې د هغو کسانو له پاره چې د ادغام په برخه کې ښې لاسه راوړنې لري، دا موده دریو کلونو ته راکمه کړي.
هغه شرایط چې بدلون نه کوي
د المان فدرالي حکومت په پام کې نه لري، چې د الماني تابعیت په برخه کې نور اساسي شرایط بدل کړي. لکه د الماني ژبې سره کافي بلدتیا او د ژوند لګښتونو برابرول. البته، د هغو کسانو په اړه چې د « کاري کډوالو نسل» بلل کیږي، د دوه ګوني تابعیت د اجازې په اړه بدلون په پام کې دی.
آيا د پخواني تابعيت ساتل امکان لري؟
اوس مهال، قانون حکم کوي چې هر هغه څوک چې د آلمان تابعیت ترلاسه کوي باید «په اصولو کې» خپل پخوانی تابعیت پریږدي. مګر دا اصل په ډیری قضیو کې نه پلي کیږي، د بیلګې په توګه د اروپایي اتحادیې د غړو هیوادونو د اتباعو او د هغو هیوادونو اتباعو په برخه کې چې خپلو وگړو د تابعیت پریښودلو اجازه نه ورکوي.
ایا افغانان کولی شي، چې خپل اصلي تابعیت وساتي؟
اوسمهال د ۲۵ هېوادونو اتباع کولی شي، چې د الماني پاسپورټ په ترلاسه کولو سره خپل اصلی تابعیت هم وساتي، چې د افغانستان، ایران او سوریې اتباع هم په دې کې شامل دي. تېر کال اوکراين هم په دغو هېوادونو کې شامل شو، ځکه چې په دغه هېواد کې د جګړې له امله د تابعيت پرېښودل له اداري پلوه ناشوني دي.
د دوه ګوني تابعیت په اړه وړاندیز شوی بدلون
د المان د کورنیو چارو وزارت په وینا، د لومړي تابعیت د ساتلو په برخه کې د دغو استثناوو له امله، په ۲۰۲۱ کال کې د هغو کسانو دوه پر درېیمه برخه يعني ۶۹ فيصده چې د المان تابعیت یې اخیستی، خپل لومړنی تابعیت یې ساتلی دی. د آلمان ایتلافي حکومت پلان لري چې په عامه توګه د دوه ګوني تابعیت اجازه ورکړي.
هر کال څومره کسان د آلمان تابعيت ترلاسه کوي؟
د هغو کسانو شمير چې د المان تابعيت ترلاسه کوي، په دغه هیواد کې د میشتو بهرنیانو د شمیر په پرتله ډیر کم دی. د بېلګې په توګه، په ۲۰۲۱ کال کې د هغو بهرنیانو يوازې ۲،۴۵ سلنه یې چې لږ تر لږه ۱۰ کاله یې په جرمني کې ژوند کړی، د دغه هېواد تابعیت ترلاسه کړی دی. په دې عکس کې د آلمان ولسمشر فرانک والتر شټاین مایر لیدل کیږي، چې یوې میرمنې ته یې د المان د تابعیت سند ورکړی دی.
د المان تابعيت ته د تقاضا ډېروالی
د آلمان د فدرالي حکومت د شمیرو له مخې په ۲۰۲۱ کال کې ۱۳۱ زره او ۵۹۵ بهرنیانو د المان تابعیت ترلاسه کړی چې دا د تیر کال په پرتله ۲۰ سلنه زیاتوالی ښيي. د دې زیاتوالي لامل په عمده توګه د سوريايي کډوالو ډېر شمېر دی چې له ۲۰۱۵ وروسته آلمان ته راغلل. په ټولنه کې د ښه ادغام له امله یو زیات شمیر سوریایي کډوال توانیدلي، چې له شپږو کلونو وروسته د دالمان تابعیت ترلاسه کړي.
د احصایې دفتر د معلوماتو له مخې هغه کسان چې په دې وروستیو کې یې د جرمني تابعیت ترلاسه کړی دی په اوسط ډول ۲۹،۳ کاله عمر لري او په دې توګه د جرمني د ټول نفوس په پرتله په ښکاره توګه ځوانان دي، چې اوسط عمر یې ۴۴،۶ کاله دی.
د تابعیت په ترلاسه کولو کې د ښځو ونډه ۴۵ سلنه وه چې د ټول نفوس (۵۰ سلنه) څخه کمه وه.
هغه سوریایان چې په ۲۰۲۳ کې یې د جرمني پاسپورټونه ترلاسه کړي دي په اوسط ډول شاوخوا ۲۴،۵ کلن وو، او نږدې دوه پر دریمه برخه (۶۴٪) یې نارینه وو. دوی د جرمني تابعیت تر لاسه کولو د مخه په اوسط ډول شپږ کاله او اته میاشتې په جرمني کې اوسيدلي ول.
د احصایې د ادارې په اعلامیه کې راغلي: « په جرمني کې د تابعیت د اخیستو لوړه شمیره له ۲۰۱۴م څخه تر ۲۰۱۶م کاله پورې د سوریایي مهاجرو له مهاجرت سره تړاو لري. دوی اوسمهال د نورو په پرتله د تابعيت له پاره اړين شرائط لکه د ژبې زده کړه او په آلمان کې د پاتې کیدو لږ تر لږه اړینه موده دلته دي.»