د روسیې د ټاکنو کمیسیون د دوشنبې په ورځ ۹۹،۸ سلنه رایو تر شمیرولو وروسته ویلي دي چې ولادیمیر پوتین د ۷۶،۶۷ سلنه رایو په خپلولو سره اکثریت تر لاسه کړی دی. ویل شوي دي چې ۶۵ کلن پوتین د ۲۰۱۲م کال په پرتله ډیري رایې تر لاسه کړي دي. هغه مهال هغه ۶۳،۳ سلنه رایې خپلې کړې وې.
د ټاکنو کمیسیون په وینا په انتخاباتو کې د خلکو ګډون ۷۶،۴ سلنه ته رسید. پوتین اوس د نورو شپږو کلونو یعنی تر ۲۰۲۴م کاله پورې د یوې بلې دورې له پاره وټاکل شو.
ټاکنې د درغلیو له تورنو سره هم مل وې. اپوزیسیون او د ټاکنو څارونکي د ۲۷۰۰ سرغړونو خبره کوي.
د پوتین سیالان
په ټاکنو کې د پوتین اصلي رقیبان پاول ګرودینین (کمونست ګوند)، ولادیمیر ژیرینفوسکي (لبرال دیموکرات ګوند) او له مدني نوښت څخه کسنیا سوبچاک وو.ګرودینین ۱۱،۸ سلنه، شریفنسکي ۵،۷ سلنه او میرمن سوبچاک ۱،۷ سلنه رایې تر لاسه کړي دي.
غبرګونونه
د لاتین امریکا او آسیا یو شمیر مشرانو د پوتین د بیا ټاکل کیدو په هکله څرګندونې کړي دي. کله چې د روسیې د ټاکنو لومړنۍ پایلې اعلان شوې نو په لاتین امریکا کې لا د یکشنبې ورځ پای ته نه وه رسیدلي.
د یکشنبې په ورځ تر ټولو لومړۍ د پام وړ نړیواله مبارکي د وینزویلا د ولسمشر نیکولاس مادورو له لوري وړاندې شوه. پر دې سربیره د بولیویا ولسمشر ایوو مورالیس د پوتین بریا لمانځلې ده.
د چین ولسمشر شي جین پینګ ویلي دي چې اوسمهال د چین – روسیې هر اړخیزي ستراتیژیکې همکارۍ تر بل هر وخت په ښه سطحه کې دي، چې په خبره یې د نوي ډول نړیوالو اړیکو د جوړولو له پاره یوه بیلګه ده.
د سکریپال قضیې له پوتین سره مرسته وکړه؟
په بریتاینا کې د روسي پخواني جاسوس سیرګي سریکپال د مسمومیدو قضیې له روسیې سره د بریتانیې دیپلوماتیکي اړیکي ترینګلې کړې او ښایي دا هم د دې سبب شوي وي چې په ټاکنو کې د ونډه اخیستونکو او پوتین ته د رای ورکونکو شمیر لوړ کړي. د روسیې د چارو له پاره د آلمان د حکومت استازي ګیرنوت ایرلر، ویلي دي چې پوتین په تصادفي ډول د ټاکنو لږ څه مخکې له دغه هیواده د ۲۳ بریتانوي دیپلوماتانو د ایستلو امر نه دی کړی، څو د لندن پریکړو ته غبرګون وښيي. د هغه په خبره د کریملین مشر د سکریپال په قضیه کې دا فرصت تر لاسه کړ چې ځان پیاوړی او قاطع وښيي. نوموړی چارواکی پر دې باور دی چې «په یقیني ډول دې کار د هغه په بریا کې ونډه لرلې ده.»
د اروپا د امنیت او همکارۍ ګډ سازمان څارونکي د دوشنبې په ورځ تر ماسپښين وروسته د روسیې د ټاکنو په هکله خپله ارزونه وړاندې کوي.
زموږ له آرشیف څخه:
د روسیې د ولسمشر ولادیمير پوتين سیاسي ژوند ته لنډه کتنه
نن یکشنبه د مارچ میاشتې په اتلسمه نیټه په روسیې کې ولسمشریزې ټاکنې جریان لري. په دغو ټاکنو کې د ولادیمير پوتین بریالیتوب یقیني ګڼل کیږي. په دې انځوریز رپوټ کې د پوتین سیاسي ژوند ته لنډه کتنه شوې.
انځور: picture-alliance/dpa/A.Zemlianichenkoولادیمیر ولادیمیروِچ پوتین د ۱۹۵۲ کال د اکتوبر میاشتې په ۷ نیټه د پخواني شوروي اتحاد په لینن ګراد (نني سانکت پېترسبورګ) ښار کې نړۍ ته سترګې پرانیستلې. د هغه پلار ولادیمیر پوتین نومیده چې په یوه فابریکه کې یې د فورمین یا کارګرانو د مشر په توګه دنده ترسره کوله.
پوتین په ۱۹۷۵ کال کې د حقوقونو په څانګه کې خپلې لوړې زده کړې بشپړې کړې او تر هغه وروسته یې د دغه هیواد د ملي امنیت په کمیټې «KGB»کې کار پیل کړ. له ۱۹۸۵ څخه تر ۱۹۹۰ م کاله پورې یې د آلمان په درسدن ښار کې د بهرني جاسوس په توګه دنده ترسره کړې. پوتین وروسته تر دې د لینن ګراد په پوهنتون کې د نړیوالو اړیکو د څانګې مرستیال وټاکل شو.
هغه په ۱۹۹۱ م کال کې له «KGB» څخه استعفا ورکړه او د سیاست په ډګر کې یې قدم کیښود او د لینن ګراد د ښاوال د مشاور په توګه یې دنده پیل کړه.
په ۱۹۹۷ م کال کې نوموړی د هغه وخت د ورسیې د پخواني ولسمشر بورس یلسن د دفتر مرستیال وټاکل شو او تر دې یو کال وروسته یې د فدرال امنیتي خدماتو ادارې(FSB) د مشر په توګه دنده اشغال کړه.
د ۱۹۹۹م کال د اګست میاشتې په ۹ نیټه د هغه وخت ولسمشر بورس یلسن هغه د لومړي وزیر په توګه وټاکه. یلسن چې د کړکیچونو سره مخامخ وو له خپلې دندې استعفا وکړه او پوتين یې د عبوري حکومت د مشر په توګه تعين کړ.
پوتين د ۲۰۰۰ م کال د مارچ میاشتې د ۲۶ نیټې په ټاکنو د ولسمشر په توګه وټاکل شو. هغه د خپلې واکمنۍ په لومړیو کلونو کې پر اقتصادي ستونزو برلاسه شو چې له امله یې په ولس کې خپل محبوبیت زیات کړ.
د ۲۰۰۴ م کال د مارچ میاشتې په ۱۵ نیټه په ولسمشریزو ټاکنو کې هغه یو وار بیا بریالیتوب ترلاسه کړ او د یوې بلې دورې له پاره هم د روسیې د ولسمشر په توګه وټاکل شو.
پوتين د روسیې لومړی ولسمشر وو چې اسرائیلو ته یې سفر وکړ. همدارنګه هغه د بریتانیې له لومړي وزیر سره هم ولیدل او له دغه هیواد سره یې په ګډه د ترهګرۍ پر وړاندې د مبارزې اعلان وکړ.
دا چې د روسیې د قانون له مخې یو شخص نه شي کولی په پرله پسې ډول د دوو دورو څخه زیات ولسمشر شي، نو پوتين د ۲۰۰۸ م په ټاکنو کې د لومړي وزیر پوست ترلاسه کړ. په دې وخت کې د پوتین ډیر نږدې ملګری دیمتري میدویف د ولسمشر په توګه وټاکل شو.
د ۲۰۱۱ م کال د سپټمر میاشتې د ۲۴ نیټې په ولسمشریزو ټاکنو میدویدف یو وار بیا پوتین د ولسمشرۍ له پاره نوماند کړ. په دې وخت کې پوتین وړاندیز وکړ چې که چیرې په پارلماني ټاکنو کې د میدویدف سیاسي ګوند «یونایډټ رشیا» بریالیتوب ترلاسه کړ، نو هغه به لومړی وزیر کړي.
د ۲۰۱۲ م کال د مارچ د څلورمې نیټې په ولسمشریزو ټاکنو کې پوتین ۶۵ سلنه رایې ترلاسه کړې او د دریم ځل له پاره د ولسمشر په توګه وټاکل شو. خو اپوزیسیون په ټاکنو کې د درغلیو تورونه ولګول او د ټول هیواد په کچه د هغه پر ضد مظاهرې پيل شوې.
د ۲۰۱۷ م کال د دسمبر میاشتې په ۶ نیټه پوتین اعلان وکړ چې هغه به د څلورمې دورې له پاره هم ځان نوماند کړي. د ۲۰۱۸ کال د مارچ میاشتې د ۱۸ نیټې په ولسمشریزو ټاکنو کې یو وار بیا د پوتین بریالیتوب یقینې ګڼل کیږي.
