د پولنډ لومړي وزير دونالد توسک، د چهارشنبې په سهار په ټولنيزو رسنيو کي ليکلي دي: «تيره شپه د روسيې بې پيلوټه الوتکو د پولنډ هوايي حريم نقض کړ. هغه بې پيلوټه الوتکي چي مستقيم ګواښ وې، ويشتل سوي دي.»

هغه زياته کړې ده چي د پولنډ وسله وال ځواکونه تيره شپه تر نن چهارشنبې سهاره پوري «د هغو هوايي عملياتو په دليل چي په اوکراين کي يې اهداف په نخښه کول» د تيارسئ په حالت کي ول.

د پولنډ د دفاع وزير ولاديسلاو کوزينياک کاميش په ايکس پاڼه کي ليکلي دي چي «تر لس ډېري» بې پيلوټه الوتکي د دغه هواد هوايي حريم ته ننوتي وې ټولي ويشتل سوي دي او د پولنډ امنيت ته خطر خنثی سو.

هغه د ناټو له هوايي قوماندې او هالند د شاهي هوايي ځواک څخه په دغه پېښه کي چي په اف ـ ۳۵ جيټ الوتکو سره يې مرسته کړې وه مننه وکړه.

د پولڼد وسله والو ځواکونو د چهارشنبې په سهار اعلان وکړ چي دوی د هغو ځايونو په لټه کي دي چي احتمال لري دغه الوتکي پکښې رالوېدلي وي او له خلکو څخه يې وغوښتل هر شی چي يې وليد بايد ورنږدې نه سي، ځکه چي ممکن هغوی ته ګواښ وي او کيدای سي خطرناک مواد پکښې کار سوي وي.

د وارسا شوپن هوايي ډګر د هوايي حريم د تړلو په سبب څو ساعته د پروازونو او ناستو پر مخ تړل سوی وو.

اروپايي تولني ويلي دي چي کيدای سي ډرونونه په قصدي توګه د پولنډ هوايي حريم ته ننوتي وي. د يادي ټولني د بهرنۍ پاليسي مشري کاجا کلاس وويل چي لومړۍ نخښي نښانې ښيي چي د ډرونونو پيښه قصدي وه.

کلاس په يوه بيانيه کي ويلي دي: «موږ تيره شپه په پولنډ کي د روسيې له خوا د جګړې له پيل راهيسي په اروپا کي تر ټولو جدي هوايي سرغړونه وليدله او نخښي نښانې ښيي چي دا قصدي وه، نه ناڅاپي.»

د روسيې د دفاع وزارت په دې اړوند د رويترز خبري آژانس پوښتني ته کوم ځواب نه دی ورکړی.

روسيې چي په ۲۰۲۲م کال کي يې پر اوکراين باندي يرغل پيل کړ پر اوکراين باندي په هوايي بريدونو کي په سونو بې پيلوټه الوتکي کاروي.