پوليسو په پاريس کي يو غېرقانوني مهاجر کمپ خالي کړ
۱۳۹۵ تیر ۹, چهارشنبه![](https://static.dw.com/image/19286440_800.webp)
پوليسو د چهارشنبې ورځي (د ۲۰۱۶ کال د جون ۲۹مه نېټه) په سهار د پاريس په شمال کي د مهاجرو یو غېر قانوني کمپ خالي کړ.
د فرانسې ورځپاڼي «فيګارو» د خپلې چهارشنبې د ورځي په ګڼه کي په دې تړاو راپور ورکړی دی. د يادي ورځپاڼي د راپور پر اساس د پوليسو د خالي کولو د عملياتو پر وخت په کمپ کي تقريبا ۵۰۰ مهاجر موجود ول.
راپور زياته کړې چي په کمپ کي موجود مهاجر د سرويس موټرو په مرسته و نژدې واقع نورو مهاجر کمپونو ته انتقال کړل سول. زياته سوې چي د ياد کمپ خالي کول بېله کومي پيښي پای ته رسېدلي دي.
دغه کمپ چي د پوليسو له خوا خالي کړل سوی دی، د جون په مياشت کي د سوډان، ايريتريا او افغانستان څخه د راغلو مهاجرو له خوا جوړ کړل سوی ؤ. يادو مهاجرو د اورګاډو و سټېشن ته نژدې په پاجول نومي لوی سالون کي خېمې وهلي وې.
د ورځپاڼي د راپور پر اساس په خالي کړل سوي غېر قانوني مهاجر کمپ کي اکثريت هغه کسان ول چي له کالې څخه راغلي ول. د کالې له سيمي څخه پوليسو د روان مېلادي کال په پېل کي مهاجر ايستلي ول. د کالې دغه په «ځنګل» مشهور صحرايي او غېر قانوني کمپ د خالي کولو پر وخت پکښي په زرهاؤ مهاجر اوسېدل.
د پاريس په شمال کي په دوامداره توګه غېر قانوني مهاجر کمپونه رامنځ ته کيږي. د ورځپاڼي د راپور پر اساس د ۲۰۱۵ کال د جون مياشتي راهيسي پوليسو ۲۵ ځله عمليات کړي او په ترڅ کي يې ۱۱۳۰۰ مهاجر له غېر قانوني کمپونو را ايستلي او نورو ځايونو ته انتقال کړي دي. د راپور پر اساس بعضي وخت د کمپ په خالي کولو کي له زور څخه هم کار اخيستل سوی دی.