په عمومي توگه ويل کيږي چې د اتو ساعتونو خوب ډېري روغتيايي گټې لري خو تر ساعتونو یې دا مهم دي چې انسان ښه خوب وکړي. ښه خوب که هغه يو څو ساعته هم وي د ذهني روغتيا له پاره ډېرې گټې لري.
انځور: Colourbox
ژور خفگان او خلق تنگي
د ساينس الرټ په نامه انترنت پاڼه کې په نشر شوې دې ساينسي څيړنه کې راغلي دي چي د خوب کمښت د ژور خفگان او خلق تنگۍ باعث کيدلی شي. د خوب د کمښت له کبله د ورځې په ترڅ کې تحريک پذیري يا د انسان ډېر حساس کيدل عامه خبره ده چې دا نه يوازې د ورځني ژوند چارې، بلکې کورنۍ اړيکي هم اغیزمنوي.
انځور: Colourbox
باانډوله خواړه
خو يوازې ښه خوب کافي نه وي، متوازن خواړه هم سړی له ژور خفگان څخه ساتي. په حبوباتو، سابو او میوو کې داسې ويتامنونه او منرالونه وي چې زموږ د ذهني روغتيا له پاره اړين دي.
انځور: Studio R. Schmitz/FoodCollection/picture alliance
د اوږد مهاله روغتيا له پاره گټور
په دې څېړنه کې دا هم ویل شوي دي چې که انسانان وپوهيږي چې ښه خواړه، خوب او ورزش ته بايد پاملرنه وکړي نو دا یې اوږدمهاله روغتيا ته ډېر گتور تمامیدای شي.
انځور: picture-alliance/dpa/J. Bugany
څنگه ښه خوب وکړو؟
تر ويده کیدو کابو يو ساعت مخکې تلويزيون، کمپيوتر او له ځيرک تليفون څخه واټن نيول د هوسا خوب له پاره اړين دي. د ډاکترانو په حواله تر ويده کیدو دوه تر دريو ساعتو مخکې پورې بايد ډوډۍ ونه خوړل شي او د خوب ځای ته د تلو يو وخت بايد وټاکل شي. دا کار د ښه خوب په کولو کې مرسته کوي.
انځور: DW/App Effectshop
متوازن خواړه څه ته وايي؟
زموږ بدن کاربوهايدريت، پروتين، غوړو، ويتامنونو او منرالونو ته اړتيا لري. له دې امله اړینه ده چې داسې خواړه وخورو چې دا ټول شيان ترې ترلاسه کړای شو. د سبزيجاتو او میوو کارول گټه لري. په اعتدال سره له غوښې گټه پورته کول او حبوبات په خپل خوراک کې شاملول هم اړين دي.
انځور: Colourbox
د ورزش گټې
د يوې تازه څيړنې پر اساس هره ورځ ۳۵ دقیقې پلي تگ د وزن په کمولو کې مرسته کولی شي. که سړی کومه لوبه کوي، په ماشينونو سره ورزش او که يوازې پلي تگ کوي، دا ټول د اوږد ژوند او ښې روغتيا له پاره اړين دي.
انځور: picture-alliance/H. Thalmann
د ښه صحت بنسټ
د نوي زيلاند د اوتاگو پوهنتون په دې څيړنه کې شامل يو ساينس پوه وايي: «ښه خوب، ورزش او سالم خواړه دا ټول د ښه صحت اساس جوړوي او دا درې سره عوامل په ځانگړي توگه د ځوانانو پر ټولیزه روغتيا ډېر اغیز لري.»
