طالب چارواکو ویلي چې د جمعې ورځې په شپه ناوخته په پلازمینه کابل کې دوو تنو موټر سایکل سپرو پر یوه افغان خبریال برید کړی دی. د طالبانو د ویاند مرستیال بلال کریمي، اسوشیتید پریس خبري آژانس ته د پیښې د پخلي ترڅنګ ویلي چې په دې پیښه کې افغان خبریال سطحي ټپي شوی دی. نوموړي وویل: «موږ د عاملینو د موندنې له پاره پلټنې کوو.» تر اوسه پورې کومې ډلې د دغه برید مسوولیت نه دی منلی.

پر افغان خبریالانو دغه برید داسې مهال کیږي چې په افغانستان د رسنیو د څار سازمان وايي چې په تیرو دوو میاشتو کې پر افغان خبریالانو د زور زیاتي، ګواښونو او سرغړونو له ۳۰ ډیرې قضیې ثبت شوي دي. د دغه سازمان په خبره، د دغو پیښو له ۹۰ فیصده څخه ډیرې یې په طالبانو پورې اړه لري.

د ایران د اسلامي جمهوریت د رسنۍ دغه افغان خبریال د اسوشیتید پریس خبري آژانس ته د برید په هکله وویل چې کور ته د تګ په حال کې دوو موټر سایکل سپرو وسلوالو کسانو یې پر موټر ډزې کړي دي. هغه وویل: «یوه مرمۍ چې له چپې خوا راغله، پر شونډو مې تیره شوه.» هغه زیاتوي چې د موټر د ښیښو ټوټو مې چپه سترګه هم ټپي کړې ده.

په ټولنیزو رسنیو کې د علي رضا شریفي د موټر په خپرو شویو انځورونو کې ښکاري چې د موټر په یوه شیشه کې یې د مرمۍ دوه سوري دي. د هغه په خبره، دوی له مخې ډزې کولې او ما وکولی شول ځان وروستي سیټ ته ورسوم.

د همدې میلادي کال د اګست میاشتې راهیسې، کله چې له افغانستان څخه بهرني او امریکايي ځواکونه ووتل، په افغانستان کې تر اوسه پورې درې تنه خبریالان وژل شوي دي.