په افغانستان کې د څه باندې څلورو لسیزو جګړو پر مهال د دغه هيواد تاریخي ابداتو او فرهنګي میراثونو هم زیان لیدلی.
د چین استازو که څه هم په مشخص ډول د کومې تاریخي سیمې یا فرهنګي نښې نوم نه دی ذکر کړی؛ خو ډاډ یې ورکړی چې په کلتوري برخو کې به ځانګړې همکاري وکړي.
په افغانستان کې د پخواني حکومت پر مهال د ډېرو تاریخي ابداتو د بیا رغاونې کارونه روان ول او په ډېرو سیمو کې تاریخي کیندنې هم پیل وې.
فرهنګي او فرهنګپاله کړۍ اندېښنه لري چې د طالبانو په راتلو سره به، په کلتوري برخو کې پیل شوي کارونه نیمګړي پاتې شي او په ځینو مواردو کې به د تاریخي سیمو د ناقانونه سپړنو رپوټونه هم ورکړل شوي.
انځورنه: د غزني تاريخي «قلعه غزنين» د له منځه تلو په حال کې ده
د غزني تاريخي «قلعه غزنين» او د دغه ښار بالاحصار د ورستيدو او نه ترميم په دليل د لمنځه تلو په حال کې قرار لري. د افغانستان حکومت تصميم نيولی چې د دغو تاريخي ځایونو بيارغونه وکړي.
طالبان وايي، د نورو برخو تر څنګ به فرهنګي او تاریخي اثارو ساتنه او بیارغاونه هم کوي.
د اطلاعاتو او فرهنګ وزارت له پاره د طالبانو د حکومت د فرهنګ او هنر مرستیال عتیق الله عزیزي د چین له چارواکیو غوښتي دي چې د اقتصادي همکاریو سربېره دې دوی سره په فرهنګي او لرغون پېژندنې برخو کې هم خپلې تجربې شریکې کړي.
د طالبانو د حکومت چارواکیو دغه راز زیاته کړې، چې له یوه خصوصي شرکت سره یې د میس عینک د کان استخراج او هلته د موجوده تاریخي اثارو او لرغونې سیمې د تخریب مخنیوي په موخه هم خبرې کړي دي.
