دغه چاودنه د دوشنبې په ورځ (د ۲۰۱۸ کال د نوامبر ۱۲مه) د کابل ښار د ملک اصغر څلور لارې او و استقلال لېسې ته نژدې وشوه. د افغانستان د کورنیو چارو وزارت ویاند نجیب دانش، ویلي دي چې په چاودنه کې شپږ تنه وژل شوي دي. د هغه په خبره په برید کې لس پولیس او ملکيان هم ټپیان شوي دي چې په ډله کې يي ښځې هم شته.

د خبري آژانسونو د رپوټونو له مخې برید کوونکی د کابل په مرکز کي د یوه ښوونځي تر څنګ خپلو چاودیدونکو توکو ته انفجار ورکړی دی. دغه ځای ته څیرمه د مالیې او عدلیې چارو وزر اتونه هم موقعیت لري.

د کابل د پولیسو ویاند بصیر مجاهد ویلي دي چې دی د چاودنې له ځای څخه شا او خوا شل متره وړاندې وو. دغه ځای ته څیرمه تر چاودنې نیم ساعت دمخه لاریون پای ته رسېدلی وو. رویټرز خبري آژانس د بصیر مجاهد، له قوله لیکلي دي: «ما څلور جسدنه راپورته کړل، خو هلته پر ځمکه نور هم پراته وو.» خو په دې هکله هغه نور معلومات ور نه کړل.

دغه برید داسې مهال تر سره کیږي چې په کابل د حکومت پر ضد له دې کبله مظاهرې شوي چې د احتجاج کوونکو په وینا حکومت په دې کې پاتې راغلی دی چې په دوو ولایتونو کې د طالبانو د بریدونو مخه ونیسي.

چارواکو د میلادي اوونۍ په پای کې په غزني او هرات ولایت کې له طالبانو سره په جګړو کې افغان امنیتي ځواکونو ته د مرګ ژوبلې د اوښتو رپوټونه ورکړي دي.