په اوتاوا، کې حکومت وایې چې په راتلونکي کال کې به یې د مهاجرو پر مخ دروازې خلاصې وي. دا په داسې حال کې چې اوس تمرکز بدل شوی دی. په دې توګه به نو ډیر هغه مهاجر ومنل شي، چې د دغه هيواد (کاناډا) د اقتصاد په پياوړتيا کي مرسته وکړي.
کاناډا د مهاجرو په سیاست کې اصلاحات راوستلي دي. د دغه هیواد د کډوالو چارو وزیر جان مک کالوم، اعلان کړی دی چې هيواد به ئې، لکه د روان کال په شان په راتلونکي کال کې هم ۳۰۰ زره مهاجر ومني.
دغه هیواد ته په نوو راتلونکو مهاجرو کې به د هغو کسانو شمیر ډیر کم وي چې د جګړو او زورزیاتیو له امله خونديتوب ته اړتيا لري.
د دې پرځای به لکه د پخوا په شان کاناډا ډیر هغو کسانو ته یو نوی ټاټوبی وي چې د دغه هيواد له اقتصاد سره مرسته وکولای سي.
رقابت او اقتصادي وده
د کاناډا د کډوالو چارو وزیر د دغې پریکړې له پاره داسې دلیل راوړي چې مهاجرت په دغه (جهاني شوې) نړۍ کې د استعدادونو د رقابت ساتنې په برخه کې مهم رول لوبوي او د دغي مخ پر زړیدونکي ټولنې سره د مقابلې له پاره اغېزمن ثابتیږي. کالوم، زیاته کړې ده چې دا ډول مهاجرت د اقتصادي ودې او تخنیکي پرمختګ سبب هم کیدلای شي.
دغي پریکړي د مخکښو سوداګرو استازي نا امیده کړي دي. د دیموګرافۍ او نفوسو شمیر په پام کې نیولو سره دوی د راتلونکو پنځو کلونو له پاره هر کال د ۴۵۰۰۰۰ نویو مهاجرو د راتګ هیله درلوده.
له لسیزو راهيسې د ماشومانو د زېږېدو کمښت او په مخ پر ډیریدونکي ډول د عمر اوسط لوړیدل دغه ټولنه د زړو یا پاخه عمر لرونکو ټولني پر لور روانه کړې ده.
کاناډا د مهاجرو د منلو په برخه کې د یوه سابقه لرونکي هیواد په توګه د کډوالۍ د داسې سیاست لرونکی دی چې هدف یې د بهرنیو کارګرو جذبول دي کوم چې په اوږده موده کې د دغه هیواد له پاره زیاتې اقتصادي ګټې لري.
وزیر په دې هکله د توضیحاتو په ورکولو سره وویل چې په هر کال کې د ۳۰۰ زرو مهاجرو د راتګ معیار به د راتلونکو کلونو له پاره هم باقي پاته شي. د هغه په خبره دا به د کډوالو پر معمولي شمیرې چې له یوې اوږدې مودې راهیسې جریان لري شاوخوا ۴۰ زره اضافه شي.
د کورنۍ یوزاي کیدو ته پراختیا ورکول شوې
کاناډا غواړي په راتلونکي کال کې ۱۷۲ زره هغه مهاجر ومني چې په اقتصادي وده کي مرسته وکولای سي، څو هغوی ته د کار اجازه او د زده کړې امکانات برابر کړي. د هغو مهاجرو برخه چې د پناه او خونديتوب په لټه کې دي (په روان کال کې۴۰ زره وه) په راتلونکي کال کې ۱۶ زرو ته راکښته شي.
له دې سره به موازې په کاناډا کې له مهاجرو سره د دوی د کورنۍ الحاق یا یوځای کیدو پروسې ته پراختیا ورکړل شي. په ۲۰۱۷م کال کې به د مهاجرو د کورنیو ۸۴ زره غړي ور وغوښتل شي.
نور مطالب:
«په آلمان کې د پناه غوښتونکو شمیر زیات شوی»
د آلمان د کډوالو او مهاجرو چارو فدرالي ادارې په دې هیواد کې د پناه غوښتنې په هکله نوي ارقام خپاره کړي دي. د مارچ میاشتې په پرتله په اپریل میاشتې کې د پناه غوښتني په عریضو کې ۲،۳ سلنه ډېرښت راغلی دی.
په پر له پسې ډول د پناه غوښتنې په عریضو کې ډیروالی
د آلمان د کډوالو او مهاجرو چارو فدرالي ادارې د نوو معلوماتو له مخې د ۲۰۱۶م کال په اپریل میاشت کې په ټوله کې د سیاسي پناه غوښتنې ۵۹۶۸۰ عریضي وړاندي شوي دي. په مارچ میاشت کې بیا د دغه ډول کسانو شمیر ۵۸۳۱۵ تنه ته رسیدی. په دې ډول د مارچ میاشتې په پرتله د پناه غوښتنې په عریضو کې ۲،۳ سلنه ډیروالی راغلی دی.
سوریایي مهاجر تر ټولو زیات دي
د ۲۰۱۶م کال په اپریل میاشت کې د پناه غوښتونکو په ډله کې تر ټولو زیات شمیر د سوریایانو وو، چې په خپل هیواد کې د خونړۍ جگړې څخه په تيښته دي. په اپریل میاشت کې د سوریایي پناه غوښتونکو شمیر ۲۵۷۹۱ تنه رسیده. په مارچ میاشتې کې بیا ۲۷۸۷۸ سوریایي وگړو د پناه غوښتنه کړې وه.
د سوریایي مهاجرو شمیر زیات دی
د آلمان د کډوالو او مهاجرو چارو فدرالي ادارې په وینا له جنوري میاشتې څخه تر اپریل میاشتې پورې مجموعا په آلمان کې ۲۴۶۳۹۳ تنو د سیاسي پناه غوښتنه کړې ده. په دغه ډله کې سوریایان په لومړي سر کې ځای لري چې شمیر یې ۱۱۶۸۲۶ تنو ته رسیږي.
د پناه غوښتونکو دوهمه ستره ډله عراقیان دي
د سیاسي پناه غوښتنې په ډله کې دوهم ځای عراقیانو نیولی دی. په مارچ میاشتې کې ۸۹۸۲ عراقي وگړو د پناه غوښته کړې وه، په داسې حال کې چې په اپریل میاشتې کې بیا دغه شمیر ۹۵۰۵ تنو ته لوړ شوی دی، چې د تیر میاشتې په پرتله ۵،۸ سلنه زیاتوالی ښيي.
افغانان بیا د پناه غوښتونکو دریمه ستره ډله ده
د افغان مهاجرو په شمیر کې میاشت په میاشت زیاتوالی ثبت شوی. په اپریل میاشتې کې ۸۴۵۸ افغانانو د پناه غوښتنه کړې چې په مارچ کې بیا دغه شمیر ۷۵۶۷ تنه وو. د مارچ میاشتې په پرتله په اپریل میاشتې کې دغه څه ۱۱،۸ سلنه ډیروالی ښيي.
هغه پناه غوښتونکي چې هویت یې روښانه نه دی
په اپریل میاشتې کې په د هغو کسانو چې تابعیت یې روښانه نه دی د پناه غوښتونکو شمیر ۱۲۹۹ تنو ته رسیدی. په مارچ میاشتې کې بیا د دغه ډول پناه غوښتونکو شمیر ۱۸۶۹ تنه وو، چې په شمیر کې یې ۳۰،۵۰ سلنه کمښت راغلی دی.
له البانیې څخه ۴۴ سلنه ډیرې عریضي
د پناه غوښتونکو په ډله کې د البانیان مهاجرو شپږم ځای خپل کړی دي، چې ۱۱۸۸ تنو د پناه غوښتنه کړې ده. له ایران څخه ۱۹۸۱ تنو د پناه غوښتنه کړې چې د مهاجرو په ډله کې پنځم ځای دی. له پاکستان څخه بیا ۱۰۳۸ تنو او اریتریا څخه ۱۱۵۲ تنو د پناه غوښتنه کړې ده.
د ۲۰۱۵م کال په مارچ مياشتې کې ۲۴۵۰۴ تنو د پناه غوښتنه کړې وه، په داسې حال کې چې د ۲۰۱۶م کال په همدي میاشت کې دغه شمیر ۵۸۳۱۵ تنه ته رسیده چې د تیر کال د همدي میاشتې په پرتله ۱۴۰ سلنه ډیروالي ښيي.
