کاناډا: په ښوونځي کي ډزو لږ تر لږه ۴ ووژل
۱۳۹۴ بهمن ۳, شنبه![](https://static.dw.com/image/18999776_800.webp)
د کاناډا لومړی وزير جسټين ترودې د سويس په داؤس کي په نړیوال کانفرانس کي برخه وال دی. نوموړي په کاناډا کي په يو مکتب کي د ډزو پر موضوع يو خبري کانفرانس راوبلی او د پيښي معلومات يې ورکړل.
د ترودې په وينا يو ناپېژندل سوي کس په يو ښوونځي کي ډزې وکړې چي په نتيجه کي يې څلور انسانان ووژل سول او دوه نور ژوبل سول. د کاناډا لومړي وزير د خپل هيواد له پاره «د يوې بېرونکي او غمجنې ورځي» خبره وکړه. د آژانسونو د خبرونو له مخي ډزي کوونکی شخص نيول سوی دی.
د دغه ډزو خبر په لومړي ځل د رايټرز خبري آژانس په اروپايي وخت د ماخستن په ۱۰:۲۰ بجو ورکړ. په دغه خبر کي ويل سوي ول چي «د کاناډا په ساسکاچېوان کي په ښوونځي کي ډزي» سوي دي. د هغه وروسته د سي بي سي تلويزيون د ځايي چارواکو په حواله د دغې پيښي خبر ورکړ. هغه لومړي انځورونه چي په لومړي سر کي د ټويټر پر انټرنټ پاڼه خپاره سول، پکښي وضعه آرامه معلومېدله.
ښوونځي ۹۰۰ زده کوونکي لري
پوليسو د ښوونځي د شاګردانو پر مېندو او پلرونو ږغ کړی ؤ چي و ښوونځي ته د ورتلو هڅه ونه کړي. د ښوونځي دغه ودانۍ کلابنده کړل سوه. دغه ښوونځی د ساسکاچېوان په ايالت کي د ساسکاتون په شمال کي په ۶۰۰ کلومترۍ کي پروت لا لوچې په نوم سيمه کي واقع دی. دغه ليري پرته سيمه د بومي اوسېدونکو له پاره و ځانګړې سيمه ريزروات «کلېر واټر ريور ډېن» سره پوله لري. دغه ښوونځي چي پکښي تر لسم ټولګي پوري صنفونه دي، تقريبا ۹۰۰ شاګردان لري.
د یاد ريزروات مشر ټېډي کلارک و «سټار فونېکس» نومي سیميزي ورځپاڼي ته ويلي دي چي «د دغه ډول پيښو وروسته د سيمي خلک ډېر سره نژدې کيږي.» د هغه په وينا دغې پيښي د سيمي اوسېدونکو ته سخت تکان ورکړی دی. دا چي قربانيان کوم عمرونه لري، لا تر اوسه نه ده روښانه سوې.
د لسم ټولګي يو شاګر و سي بي سي تلويزيون ته ويلي: «زه له ښوونځي څخه وتښتېدم. هلته زياتو شاګردانو چيغي وهلې، د هغه تر مخه چي زه دباندي ووزم ما شپږ اوه ډزې واورېدې. فکر کوم چي د ښوونځي څخه زما د وتلو وروسته نوري ډزې هم وسوې.»
د ساسکاچېوان د ايالتي حکومت رئيس برېډ وال د پيښي وروسته په خپله لومړۍ اعلاميه کي ويلي دي: «به لا لوچې کي د ننۍ بېرونکي پيښي له کبله د خپلو اندېښنو او تکان په تړاو زه الفاظ نه لرم چي تشريح يې کړم. زما فکر او دعاوي د قربانيانو، د هغوی د کورنيو او د هغوی د دوستانو او د دغي سيمي د ټولو اوسېدونکو سره مل دي.»