په آلمان کې د ځينو ښوونځيو او کاروباري مرکزونو د پرانستل کيدو سره وضيعت په کرار کرار عادي کيږي. بل لوري ته ولسمشر ترمپ ادعا کړې ده چې امريکا به د روان کال تر پای پورې د کرونا واکسين جوړ کړي.
انځور: Imago Images/Lichtgut/M. Kovalenko
اعلان
په ټوله نړۍ کې د کرونا د ناروغانو شمير تر ۳۵ لکه اوښتی دی او تر اوسه په دې ويروس کابو دوه نيم لکه کسان مړه شوي دي.
په ټوله نړۍ کې بيا تر یولسو لکو زيات کسان له دې ناروغۍ رغيدلي هم دي. په آلمان کې د کاروبارونو او په ځينو سيمو کې د ښوونځيو له پرانیستو سره د محدوديتونو د نرمولو لړۍ په کرار کرار روانه ده.
بل لوري ته د استخباراتي ادارو تر دې رپوټ وروسته چې چين په قصدي توگه د کرونا د وبا د شدت په اړه معلومات پټ ساتلي ول، د امريکا او چين ترمنځ ترنگلتياوې نورې هم زياتې شوي دي.
په همدې حال کې د اروپايي ټولنې مشران د کوويد ۱۹ ناروغۍ د درملنې او د دې د يوه ځانگړي واکسين جوړولو له پاره د ميلياردو يورو د راټولو په هيله نن، دوشنبه (د مي ۴ نيټه) د ويديو کنفرانس له لارې يوه مهمه غونډه کوي. د اروپايي ټولنې کميسيون مشره اورزولا فون ډېر لاين به په بروکسل کې د ځای وخت په دريو بجو دا غونډه پيل کړي او تمه کيږي چې په غونډه کې به د څه د پاسه اته ميلياردو يورو د ورکړې ژمنه وشي. دا مبلغ به په اصل کې د روغتيا ادارو څېړنیزو مرکزونو ته ورکول کيږي.
بل لوري ته په وضعه کې د يو څه ښه والي له کبله په آلمان کې د مي له څلورمې نيټې يعني سر له نننۍ ورځې څخه په ځينو سيمو کې ښوونځي بيرته پرانيستل کیږي. همدا راز سلمانۍ او آرايش گاوې به هم چې له کابو دوو مياشتو راهيسې تړل شوي دي، پرانيستل شي.
د يکشنبې په ورځ يعني د مي پر دريمه نيټه په چين کې هم د کرونا يوازې درې نوې مثبتې پيښې ثبت شوي دي. دا ټول هغه کسان ول چې د بهرنيو هېوادونو څخه چين ته تللي ول.
bs/awa (Ag
زموږ له آرشيف څخه:
انځورونه: د کرونا بحران اغيزې پر کلتورونو، کاروبار، او ټولنيزو خدماتو
دلته هيڅ هم هغسې نه دي لکه پخوا چې وو. د کرونا ويروس په آلمان کي ژوند له بنسټه بل ډول کړی دی. هغه ځایونه چې یو وخت په انسانانو آباد او په کې ګڼه ګوڼه وه، اوس مهال دغه ځایونه خالي او غمجن دي.
د رخصتيو په وخت کې د آلمان ډيری اوسیدونکي ختيځ او شمالې سواحلو ته روانیږې. اوس مهال دغه سواحل خالي دي. د قهوې سکلو او رستورانتونه تړل شوي او لارویان خپل یوازتیوب نندارې ته وړاندې کوی.
انځور: picture-alliance/dpa/S. Sauer
د ماشومانو د لوبو ځايونه پرته له ماشومانو څخه
له لرګي څخه جوړ دغه بیوزله حیوان، یو مهال د ماشومانو بوختیا له پاره د لوبو وسیله وه. خو اوس دغه د لوبو ځای ته د ماشومانو ورتګ منع شوی دی. له دغه ځای او د لوبو له سامانونو څخه سپين پړې تاو شوې او دغه ځايونه بند شوي.
انځور: picture-alliance/dpa/M. Schutt
ورزشي ميدان پرته له ورزشکار څخه
د ورزش دغه میدان ته ننوتل د يوې تابلو په نښلولو سره منع اعلان شوې. ورسره پرې باندې نښلول شوې ماسک د منع کيدلو څرګنده ښکارونديې کوي. په آلمان کې ټولې ورزشي سیالۍ رخصت شوې دي.
انځور: picture-alliance/HMB Media/Oliver Mueller
توریستې ځایونه پرته له سیلانیانو څخه
د آلمان براندنبورګ دروازه د توریستانو له پاره د سیل کولو يوه ليوالتيا ده.ډيرې سیلانيان د نړۍ له بيلا بيلو ځايونو څخه د آلمان دغه تاريخې ودانۍ او د برلين ښار ليدلو ته راځي. سږکال دغه توریستې ځاي له سهاره تر ماښامه له سیلانیانو څخه خالې دې.
انځور: Reuters/F. Bensch
د استازو پرته پارلمان
دغه ځای د آلمان ولسې جرګه يا «بوندستاګ» دی. ورته د ورتګ منع تابلو پرې نه ده نښلول شوې. خو پر ډيرو څوکيو باندې ليکل شوې چې ترينه کار اخیستل منع دی. د ټولو استازو راتګ پارلمان ته منع نه دی. خو پر سپينو پارچو ليکل سوې سپارښتنه د ټولنيز واټن ساتلو له پاره دی.
انځور: Reuters/A. Hilse
کلیسا ګانې پرته له عبادت کونکو څخه
په سپيڅلې اختر ايسټر يا عيدالقيام کې ډيری عیسويان د نندارې له پاره کلیسا ته راځي. دغه ډول کار سږکال ممکن نه وو. کلیسا ګانې خالي وې او ديني مراسم د انترنت او تلويزوني رسنيو له لارې خپاره شوه.
انځور: Getty Images/AFP/C. Stache
د عيش عشرت ځايونه پرته له مشتريانو
د هامبورګ په ښار د سنت پاولې سیمه کې هاربرت واټ نړيوال شهرت لري. دا د ساعت تیرۍ او خوشاله وخت تيرولو ځای ګڼل کيږي. اوس مهال دغه ځايونه لکه د نڅا کلبونه او رستورانتونه تړل شوي. يوه مرغۍ هم په کې نه الوزې.
انځور: picture-alliance/dpa/C. Charisius
ښوونځې پرته له زده کونکو
په آلمان کې ښوونځې تر دويمې خبرتیا پورې د می مياشتي تر څلورمې نېټي رخصت شوي. په اوس وخت کې زده کړه په مجازي فضا کې او د انلاين له لارې زده کونکو ته ورکول کيږي.
انځور: picture-alliance/SvenSimon/F. Hoermann
د اورګاډو تم ځایونه پرته له مسافرو
د کولن په ښار کې د اور ګاډو تم ځای چې ډير کله له مسافرو څخه ډک وي، اوس په کي کله يو نیم کس ښکاره شي چې د بل اور ګاډې له سفر کولو څخه وروسته پاتې وې.
انځور: Reuters/T. Schmuelgen
الوتکې پرته له مسافرو
د هوايي ډګرونو حالت هم ښه نه دی. ډيری الوتکي خوا په خوا پارک شوي دي. کوم سفر په پام کې نه شته او د اقتصاد ساه نه چليږې څوک سفر نه کوي. که څه هم د چاپيريال ساتنې له پاره يې ښيګڼه زیاته ده، خو د آلمان اقتصاد زښت ډير زيان ليدلې.
