د رپوټونو په حواله په مصر کې چې د شمالي افريقا يو اکثريت مسلمان ميشته هېواد دی، دا گام په دې وجه پورته کړل شوې چې په دې هېواد کې د امکان تر حده د کرونا ويروس د خپريدو مخه ونيوله شي.
د عربي نړۍ د دې تر ټولو زيات نفوس لرونکي هيواد د مذهبي سازمونو او اوقافو وزارت په ټولو مسجدونو کې د لمانځه وختونه محدود کړي دي.
د «الاهرام» په نوم مصرۍ ورځپاڼې د اوقافو وزارت په حواله ليکلي دي چې د هيواد د ټولو مسجدونو ادارو ته لارښوونه شوې ده چې وروسته له دې د لومړي اذان او اقامت ترمنځ وخت بايد تر لسو دقيقو ډېر نه وي.
د «الاهرام» په حواله دا پريکړه به د مصر په مسجدونو کې د سهار، ماسپښين، مازيگر او ماښام د لمونځونو پر وخت عملي کيږي، په داسې حال کې چې د ماسختوتن د لمانځه له پاره د اذان او اقامت ترمنځ زماني واټن يوازې پنځه دقيقې ټاکل شوی دی.
د جمعې خطبه يوازې ۱۵ دقيقې
د «کې اين ای» خبري آژانس ليکلي دي چې پر دې اقداماتو سربيره د مصر د اوقافو وزارت دا لارښوونه هم کړې ده چې تر دې وروسته د مصر په هر جومات کې د جمعې د لمانځه خطبه بايد ۱۵ دقيقې وي. پر دې سربيره ټولو مسجدونو ته دا لارښوونه هم شوې چې که امکان یې وي نو د جمعې لمونځ د بند تعمير پر ځای بايد په آزاده فضا کې ادا کړل شي.
سعودي عربستان هم څو ورځې تر مخه د کرونا ويروس د خپريدو د مخنيوي په موخه په مدينه او مکه ښارونو کې د عمرې مراسمو په موقتي توگه درولي دي. همدا راز يو شمیر نورو هيوادونو هم پر تگ راتگ محدوديتونه وضعه کړي دي.
تر اوسه په ټوله نړۍ کې تر يو لک يو پنځلس زره زيات کسان اخته شوي دي او د دې مرض له کبله د مړو شويو شمیر هم تر څلورو زرو اوښتی دی.
په مصر کې هم په سترو غونډو او راټوليدو بندیز لگول شوی دی. د مصر د روغتيا وزارت ويلي دي چې تر اوسه په دغه هيواد کې د کرونا ۵۹ پېښې ثبت شوي دي او د معلوماتو په حواله تر اوسه هلته په دې مرض څوک مړه شوي نه دي.
bs/nz (KNA)
زموږ له آرشيف څخه:
د نړۍ ستر مسجدونه په انځورونو کي
په مسکو کي تيره ورځ يو ستر مسجد پرانيستل سو. دغه مسجد چي پر ۲۰۰۰۰ ميتره مربع مځکي جوړ سوی په یوه وخت کي ۱۰۰۰۰ انسانان پکښې ځايږي. په دې انځوريز راپور کي د نړۍ نور ستر مسجدونه هم ښوول کيږي.
انځور: Reuters/M. Zmeyev
په مکه کي الحرام مسجد
دا په مکه شريفه کي د مسلمانانو تر ټولو مهم مسجد دئ. دغه مسجد پر ۳۵۰۰۰۰ متره مربع مځکه جوړ سوی او په نړۍ کي تر ټولو ستر مسجد دئ. مسجد په ۱۶مه مېلادي پېړۍ کي جو سوی او نهه مناره لري. پر مسجد اوس هم کار روان دئ او په بشپړېدو سره به ئې په يوه وخت کي تر يو ميليون ډېر انسانان لمونځ پکښې وکړای سي.
انځور: picture-alliance/dAP Photo/K. Mohammed
په مدينه کي نبوي مسجد
تر الحرام مسجد وروسته په مدينه کي نبوي مسجد د مسلمانانو له پاره دوهم مقدس مسجد دئ، ځکه چي هلته د حضرت محمد (ص) زيارت دئ. مسجد په ۶۲۲م مېلادي کال کي جوړ سوی او په يوه وخت کي ۶۰۰۰۰۰ انسانان پکښې ځايږي. د دغه مسجد منارونه ۱۵۰ متره لوړوالی لري.
انځور: picture-alliance/epa
په بيت المقدس کي الاقصي مسجد
الاقصي مسجد د بيت المقدس د زاړه ښار په هغه سیمي کي جوړ سوی چي د مسلمانانو او يهوديانو له پاره سپېڅلی دئ، جوړ سوی دي. که څه هم چي دغه مسجد په يوه وخت کي ۵۰۰۰ انسانان ځايوي او دومره ستر نه دئ، خو په ډبريني او طلايي گنبدي سره تر الحرام او نبوي مسجد وروسته د مسلمانانو له پاره ډېر قدرمن دئ. دغه مسجد په ۷۱۷م کال کي پرانيستل سوی.
انځور: picture alliance/CPA Media
په کازابلانکا کي د دوهم حسن مسجد
د انتلانتیک سمندر د ساحل پر غاړه دغه مسجد د مراکش د پخواني پاچا دوهم حسن په نوم دئ. دغه مسجد په ۱۹۹۳م کال کي د هغه د ۶۰ کلنۍ پرمهال پرانيستل سو. په نړۍ کي تر دې ډېر ستر مسجدونه سته، خو هغه څه چي دغه مسجد ته لومړيتوب ورکوي هغه د مسجد هسک منار دئ، چي ۲۱۰ ميره جگ دئ. په نړۍ کي بل دغه شان هسک منار نسته.
انځور: picture alliance/Arco Images
په ابوظبی کي د شېخ زايد مسجد
دغه مسجد په ۲۰۰۷ کال کي پرانيستل سو او په نړۍ کي اتم ستر مسجد دئ. د مسجد غولی ۲۲۴ واري ۱۷۵ متره دئ او منارونه ئې ۱۰۷ متره لوړ دي. د مسجد ځانگړتيا په گنبده کي ده چي ۳۲ متره قطر لري چي دا به نړۍ کي تر ټولو ستره گنبده ده. په دغه مسجد کي په لاس اودل سوې ۵۰۰۰ متره مربع غالۍ هم اواره ده چي دا په نړۍ کي تر ټولو ستره بلل کیږي.
انځور: imago/T. Müller
په روم کي مسجد
د نړۍ د کاتوليکانو په مرکز روم کي هم ستر مسجد سته. دغه مسجد پر ۳۰۰۰۰ متره مربع مځکه جوړ سوی او په اروپا کي ترټولو ستر مسجد بلل کيږي. د دغه مسجد جوړولو کار تر لس کاله ډېر دوام وکړ او په ۱۹۹۵م کال کي پرانيستل سو.
انځور: picture-alliance/akg-images
په گروزني کي د احمد قديروف مسجد
دغه مسجد د چيچنيا د پخواني مفتي او جمهور رئيس چي په ۲۰۰۴م کال کي په يوه چاودنه کي ووژل سو، په نوم دئ. د مسجد د جوړېدو کار په دغه هيواد کي د جنگونو له کبله څو واري وځنډېد. مسجد په ۲۰۰۸م کال کي پرانيستل سو. دغه مسجد د زلزلې مقاومت هم لري.