په پاریس کي ددغو احتجاجونو په ترڅ کي د پولیسو او له زورزیاتیو ډکو انفرادي ډلو تر منځ اخ و ډب کي ۳۲ تنه نیول سوي دي. داخله وزیر کریستوف کاستانر ويلي دي چي دا هغه اله ګوله کوونکي دي چي دغو سوله ایزو مظاهرو ته ورننوتلي دي.

د کرونا وبا له امله د فرانسې روغتیايي سیستم تر سخت فشار لاندي راغلی. صحي پرسونل له اونیو راهیسي پرته له وقفې کار کوي. دغي موضوع ته د پام رااړولو په خاطر د فرانسې په مونت پیلییر، میتڅ، لیون، نانتیڅ او مارسې کي هم احتجاجونه وسول.

 د صدراعظم ژمني

روغتیا پالان او ډاکټران د ښو تنخوا غوښتلو ترڅنګ، د روغتونونو د ښه سمبالښت غوښتنه هم کوي. صدراعظم اِدوارد فیلیپ صحي پرسونلو ته د تنخواوو د زیاتولو ژمنه ورکړې ده.

د حکومت له خوا په روغتیایی سیستم کي د اصلاحاتو د راوستلو وعده هم ورکړل سوې.

د کرونا وبا پر وخت په فرانسه کي تر اوسه پوري تر۲۹ زرو زیات کسان مړه سوي دي. ولسمشر ایمانویل ماکرون څو وخته مخکي د نورو قیوداتو د ایسته کولو اعلان هم وکړ او په دې ډول یې خپل اولس ته ډیر ژر عادي حالت ته د راګرځیدو وعده ورکړه.