کليسا: په پاکستان کې لږکۍ له تاوتريخوالي سره مخامخ دي
۱۳۹۸ دی ۶, جمعه![Pakistan Wachmann vor einer christlichen Kirche in Lahore](https://static.dw.com/image/18316979_800.webp)
د پاکستان د اسقفانو د کنفرانس د عدالت او سولې د ملي کميسيون (NCJP) يوې څېړنې چې عنوان يې «تعليم او د اديانو آزادي: د واقعيتونو يوه ټولګه» ده، موندلې چې د پاکستان په ښوونځيو او پوهنتونونو کې درسي نصابونه له غيرمسلمانانو سره له تاوتريخوالي ډک تعصب ته وده ورکوي.
دغه خبر د آسيا کاتوليکي مطبوعاتي اژانس يوکانيوز (UcaNews) د سه شنبې په ورځ (د ۲۰۱۹ کال د دسمبر په ۲۴مې) ورکړی دی. د يوکانيوز له خوا د عيسويانو تر اختر مخکې له خپرې شوې څېړنې څخه په نقل قول راغلي دي چې «دغه نصاب د اکثريت عقيدې داسې محصلين توليدوي چې نړۍ ليد يې تر ډېره په يوه ملتپاله اسلامي ټينګه عقيده کې ريښه ولري.» په خبره يې دا د ځوانانو په منځ کې داسې افراطي افکارو ته هم وده ورکوي چې «د ګډ ژوند، پرانيستي ديالوګ او تنوع په وړاندې مقاوم وي».
د پاکستان د سترې محکمې پرېکړه
د پاکستان سترې محکمې يا هاي کورت د ۲۰۱۴م کال په جون کې حکومت ته لارښوونه کړې وه چې د لږکيو د حقونو د ودې او د آيالتي ادارو د تقويې يوه ملي شورا دې رامنځ ته کړي. آيالتي ادارو ته محکمې دا لارښوونه وکړه چې د ديني زغم، د ښوونځيو او پوهنتونونو له پاره د مناسبو تعليمي او تحصيلي نصابونو د ودې او د نفرت خپرونې پر ضد دې پياوړي بنسټونه رامنځ ته کړل شي.
خو سېسيل چاودري چې د NCJP کميسيون اجرائيوي مشر دی، وايي چې د محکمې دغه پرېکړې تر اوسه عملي شوې نه دي. د چاودري په خبره په پاکستان کې د خلکو نه زغم يا تعصب د ديني او مذهبي لږکيو له چوکاټ څخه وتلی او د هېواد د اسلامي ټولنې زړه ته يې هم مخه کړې ده.
KNA/NS/NZ