ابوبکر البغدادي په اول وار د عراق په موصل ښار کې د خلافت اعلان وکړ او ويل کيږي چې اوس هم په دغه ښار کې دی. عراقي ځواکونه اوس د دغه ښار پر لور د پرمختگ په حال کي دي. یو پیشمرگه وایي چې داعش خپل زوال ته نزدې شوی.
انځور: picture alliance/AP Photo
اعلان
د بریتانیا اینډیپنډنټ، ورځپاڼي رپوټ ورکړی دی چې ابوبکر البغدادي اوس هم په موصل ښار کې ژوند کوي. د کردستان سیمې یوه جگپوړي پیشمرگه فواد حسین، يادي ورځپاڼي ته ویلي دي: «بغدادي هلته دی او که چیري په روانو عملیاتو کې ووژل شي، د داعش هر څه سره پاشل کیږي.»
د فواد حسین په باور داعش د بغدادي د لاسه ورکولو په صورت کې د دې توان نه لري چې د هغه ځای ناستی وټاکي. د هغه په خبره هیڅوک د «اسلامي دولت» په لیکو کې د بغدادي اتوریته او نفوذ نه لري.
لکه څرنگه چې فواد حسین وایي، موصل د داعش له پاره ځانگړې معنی لري او بغدادي له تیرو نهو میاشتو راهیسې په دغه ښار کې پټ دی.
فواد حسین اینډیپنډنټ، ورځپاڼي ته ویلي دي چې د داعش ډېر مشران د تیرو میاشتو په نښتو کې وژل شوي دي: «بغدادي ډیر زیات له موصل سره تړلی دی، ځکه چې د داعش قوماندان دلته او په تعلفر کې دي.»
د اینډیپنډنټ، ورځپاڼې رپوټ او د فواد حسین څرگندونې په داسې حال کې خپریږي چې د عراق د امنیتي ځواکونو او کردي پیشمرگه ملیشو له لوري د موصل ښار د کلابندۍ عملیات پای ته نه دي رسیدلي او اوس هم د موصل د کلابندۍ له حلقې څخه د داعشیانو تیښته ممکنه ده.
د «اسلامي دولت» ډلي مشر ابوبکر بغدادي اوس د نړۍ د امنيتي دستگاوو له خوا تر ټولو «خطرناکه تروريست» بلل کيږي. د آلماني ژورناليستانو يوه ډله توانېدلې ده چي د هغه د ژوند په اړه نوي او تر اوسه نه خپاره سوي اسناد راټول کړي.
انځور: NDR
دا په ۱۹۸۰م کال کي د نړۍ د «ترټولو خطرناکه تروريست» بغدادي لومړی کارت دئ. د په لاس راغلو اسنادو له مخي بغدادي د ۱۹۷۱م کال په جولای مياشتي کي د عراق په سامره ښار کي زېږېدلی دئ او اصلي نوم ئې ابراهیم عواد ابراهيم البدري دئ. د بغدادي د گاونډيانو په خبره د دغي بزگري کورنۍ له څلورو زامنو څخه يو بغدادي وو چي ډېر ارام خلک ول.
انځور: NDR
د ابوبکر بغدادي د تحصيل اسناد. هغه په خپلو درسونو کي په ځانگړې توگه په «اخلاق او انضبات» کي ښې نمرې لرلې. د اسنادو له مخي ښاري چي هغه يوازي د انگلېسي ژبي په مضمون کي لږ نمرې لرې. د دغو اسنادو له مخي هغه د ښوونځي د ۶۰۰ نمرو څخه ۴۸۱ اخيستي دي.
انځور: NDR
دا د ابوبکر بغدادي د عراقي تابعيت پاڼه ده. په دغه وخت کي بغدادي ۱۶ کلن وو او د عراق په سامره ښار کي ئې عادي ژوند کاوه او په خپل اصلي نوم ابراهيم عواد ابراهيم البدري باندي پيژندل کېدی او تحصيل ئې کاوه.
انځور: NDR
ابوبکر بغدادي په ۱۹۹۱م کال کي بريالی او ديپلوم ئې اخيستی دئ. په سندونو کي راغلي دي چي هغه يوار ناکامه سوی دئ، خو وروسته بيا د «شهيد ورور» له امتيازه څخه هغه ته څو نمرې ورکړل سوي دي. د بغدادي ورور د صدام حسين د پوځ عسکرو چي ووژل سو.
انځور: NDR
د ابوبکر بغدادي يو انډيوال وايي چي بغدادي به هروخت علاقه لرله چي مشر وي. بغدادي کوچنيانو ته د قرآن شريف درس ورکاوه. په سامره کي د هغه په پلرنی کور کي له ډيري مودې راهيسي هغه کورنۍ پرتې دي چي له اسلامي دولت ډلي له بيري څخه تښتېدلي دي. د بغدادي د گاونډيانو په خبره د هغه د کورنۍ خلک يا تښتېدلي يا بنديان دي.
انځور: NDR
ابوبکر بغدادي د ديپلوم تر اخيستلو وروسته خپل ټاټوبی پرېښود او بغداد ته تللی وو. بغدادي غوښتل چي حقوق ولولي او د هغه اسنادو له مخي چي موندل سوي دي هغه خپله دوهمه او دريمه رشته ښوونيزعلوم او بهرنۍ ژبي ټاکلي وې. خو د هغه د کمزوري ديپلوم په خاطر بغدادي په پوهنتون کي دغو رشتو ته نه بريالی کيږي.
انځور: NDR
ابوبکر بغدادي د جسمي ستونزو په دليل له عسکرۍ څخه معاف سو. د عراق د روغتيا وزارت په اسنادو کي ښوول کيږي چي بغدادي نزديک بينه دئ.
انځور: NDR
بغدادي په ۲۰۰۳م کال کي د عراق په انبار ولايت کي واده کوي او په دغه وخت کي د قرآن شريف د تفسير سند اخلي او په دې لاره کي خپله دکترا پيلوي.
انځور: NDR
په ۲۰۰۲م کال کي پر عراق باندي د امريکا تر يرغل وروسته د بغدادي يو انځور. بغدادي د ۲۰۰۴م کال په فيبرورۍ مياشت کي نيول گيږي او د عراق په جنوب «بوکا» اردوگاه کي لس مياشتي بندي کيږي. د دغه بند دليل تر اوسه پوري روښانه نه دئ.
انځور: NDR
په بوکا کمپ کي د صدام حسين پر عسکرو سربيره امنيتي مجرمان او تروريستان ساتل کيږي. بغدادي له زندانه تر راوتلو وروسته بيرته پوهنتون ته راگرځي او د بغداد په لوېديځ کي په «توبجي» سیمه کي استوگن کيږي.
انځور: picture alliance/AP Photo
امريکا د داسي اطلاعاتو له پاره چي له مخي ئې بغدادي ونيول سي لس ميليونه ډالره جايزه ټاکلې ده. د گاردن د راپور له مخي، بغدادي دوې مياشتي دمخه د شمزۍ د تاوني کېدو له کبله د عراق په موصل ښار کي دوو ډاکټرانو کتلی معاينه او معالجه کړی وو. داسي ويل کیږي چي هغه د ۲۰۱۵م کال په مارچ کي د امريکايي ځواکونو په يوه هوايي بريد کي سخت ټپي سوی دئ. امریکا دغه بريد تائيد کړی خو د بغدادي په اړه ئې څه نه دي ويلي.