د فرانسې خبري آژانس د رپوټ پر اساس، دغو ګردبادونو همدارنګه کورونه تخریب کړي او لارې ېې د ترافيکو پر مخ تړلي دي. د برېښنا د قطع کېدو رپوټونه هم ورکړل شوي دي.
د فرانسې خبري آژانس د رپوټ پر اساس، درې کسان د تنسي ایالتپه نشويل نومي ښار کې مړه شوي دي، په داسې حال کې چې ښاروالۍ په توپان کې د تخریب شوو کورونو او رالوېدلو ونو انځورونه خپاره کړي دي.
همداراز يې پر ايکس یا پخوانۍ ټويټر شبکې ليکلي دي: «له بده مرغه موږ په نسيب لین کې د خرابې هوا په پایله کې د درو تنو مړېنه تائيدولی شو.»
دوو ځوانانو او یوه ماشوم د کلارکسويل په نوم ښار کې خپل ژوند له لاسه ورکړی دی. دغه خبره د منتګومري کاونټي ادارې په یوه اعلاميه کې کړې ده. په اعلاميه کې همدارنګه راغلي دي: «برعلاوه د دې، ۲۳ کسان په روغتون کې تر درملنې لاندې نيول شوي دي.»
د تنسي ایالت چارواکو له ځايي خلکو غوښتي چې له سړکونو څخه لرې واوسئ - په انځور کې پر سړک په توپان کې يوه اوښتې لارۍ ليدل کيږيانځور: Andrew Nelles/The Tennessean/AP/dpa/picture alliance اعلامیه وايي چې حالاتو ته د رسيدګۍ لومړنۍ هڅې «لا هم د دغې فاجعې د نجات او لټون په مرحله کې دي.« له ځايي خلکو غوښتل شوي دي چې له سړکونو څخه لرې واوسي.
د کلارکسويل ښاروال، جو پیتس، په دغه ایالت کې بېړنی حالت او د شنبې شپې له ۹ بجو ېې په ګرځېدو بندیز اعلان کړی دی. ښاروال ويلي دي: «ما لازمه وګڼله چې په ښار کې د روغتيا، حفاظت او د ټولنې د رفاه په خاطر له نن شپې (د دسمبر ۹مه) تر سبا شنبه (د دسمبر ۱۰مې) پورې ګرځبنديز ولګوم.»
د برېښنا ادارې ويلي دي چې په تنسي ایالت کې د شنبې په مازديګر د ګردباد له کبله پر ۵۲ زره کسانو برېښنا قطع شوه چې مخکې ېې دغه شمېر ۸۶زره ښودلی وو.
آ/م.ک.ص./م.ن.ص.
له آرشیف څخه:
په کاليفورنيا کې سختو طوفانونو زيات زيان اړولی
د امريکا په کاليفورنيا ايالت کې سختو سېلابونو او د ځمکې ښوېدو سړکونو ته زيان رسولی دی. تر اوسه ۱۷ کسان وژل شوي او د هوا په اړه وړاندوېنه هم ډېره ښه نه ده.
انځور: JOSH EDELSON/AFP/Getty Imagesد کاليفورنيا سواحل له پرله پسې طوفانونو سره مخ دي. د دې ايالت يو شمير سيمې اوبو لاندې کړي دي په داسې حال کې چې دا ايالت له وچکالۍ هم کړیږي. طوفاني څپو په ساحلي سیمو کې پلونه تخريب کړي او پر سړکونو اوبه د دې باعث شوې وې چې په غرونو کې پرتو ښارونو او کليو ته د څو ساعتونو له پاره ورتگ امکان نه درلود.
د کاليفورنيا ساحل ته څېرمه په اصطلاح «بمب سايکلون» جوړ شوی چې په ټوله سيمه کې یې له تېز باد او شديدو اورښتونو سره مل طوفانونه رامنځته کړي. په لسونو زره انسانان د خپلو کورونو پرېښودو ته اړ شوي دی او د سېلاب د گواښ له کبله بايد خوندي ساحو ته پناه يوسي.
تر اوسه د ۱۷ کسانو مړينه تائيد شوې او د هغه پنځه کلن ماشومان د لټون هلې ځلې هم درول شوي دي چې سېلاب وړی وو. تندو بادونو چې سرعت یې په ساعت کې ۹۷ کيلومترو ته رسیږي، سترې ونې چپه کړي دي. په سکرامنتو سیمه کې کابو ۳۵۰ زره انسانانو برېښنا نه لرله.
«۱۰۱» لويه لاره سېلاب لاندې کړې
د «۱۰۱» په نوم مشهوره لويه لاره د کاليفورنيا د شمال څخه د ساحل په اوږدو کې تر د دغه ايالت په جنوب کې تر لاس اينجلس پورې غځېدلې او د سيالانيانو راجلبونکې ده. په گلروی سيمه کې دا لويه لاره بايد د سېلاب له کبله تړل شوې وای. په کاليفورنيا کې ډېر سړکونه د تخريبدو او يا د موټرو د ټکرونو له کبله تړل شوي دي.
تېزو بادونو دا څو متره اوږده لارۍ پر سړک چپه کړې ده. د کاليفورنيا په شمال کې ډېر ښوونځي تړل شوي دي. ولسمشر جو بايدن بيړنی وضعيت اعلان کړی، څو په تر دولسو ډېرو اداري ساحو کې د مرستې او ژغورني چاري پر مخ ولاړې شي. د راتلونکو ورڅو له پاره د نورو طوفانونو وړاندوېنه هم شوې ده.
مونتېسټو چې د ډیرو مشهور کسانو د استوگنې سيمه ده، هم د دوامداره طوفانونو له کبله بايد تخليه شي. د هوا پېژندنې ملي ادارې د « Atmospheric river» په نامه پدېدې وړاندوېنه کړې ده. د دې په ترڅ کې له پاسفيک څخه ډېره مرطوبه هوا چلیږي چې د بې ساري زیات مقدار اورښت او واورو باعث گرځي.
کاليفورنيا ايالت د شديدې آب و هوا سره بلد دی. د وچکالۍ په اوږده دوره کې ځنگلونه سوځي. په پايله کې یې د ونو او بوټو کمښت د ځمکې ښوېدو باعث کیږي او د اغیزمنو کليو او ښارونو اوسيدونکو ته خطر پيښوي. روان طوفانونه به يو څو نورې ورځې هم دوام ولري او د ټولو ويجاړيو سره سره هم يوه گټه داده چې د اوبو وچې شوې زېرمې یې یو څه ډکې کړې.
