وسله والو د شنبې په ورځ په ګرديز کي د نوي کابل بانک پر ودانۍ وسله وال بريد وکړ. په دغه بريد کي ۳ کسان وژل سوي او ۳۰ نور ژوبل سوي دي. د دغې مرګ ژوبلي په تړاو معلومات ځايي چارواکو ورکړي دي.
د پکتيا ولايتي وياند عبدالله حسرت و فرانس پريس خبري آژانس ته ويلي دي چي ياد بانک ته پنځه وسله وال کسان ننوتل. هغه ويلي چي دغه کسان چي په وسلو او د چاودېدونکو توکو په قمربندونو سنبال ول، په زور بانک ته ننوتل. له دوی څخه يو بريدګر هلته خپل چاودېدونکي قمربند ته چاودنه ورکړه.
وياند ويلي دي چي زيات تنخوا داره کسان دغه بانک ته ورغلي ول چي هلته خپل معاش تر لاسه کړي. د هغه په وينا په دغه وخت کي پر هغوی وسله وال بريد تر سره سو.
د پکتيا مرستيال والي عبدلولي ويلي چي زياتره کسان چي په بانک کي موجود ول، هغوی امنيتي کسان ول. هغه ويلي: «د يو ساعت وسله والې نښتي وروسته بريد ګر ووژل سول. له بده مرغه دوه پوليس او يو ملکي کس هم په دغه بريد کي وژل سوي دي.» د دغه چارواکي په وينا ۳۱ انسانان ژوبل سوي هم دي.
د دغه بريد پړه تر اوسه هيڅ کومي ډلې په غاړه نه ده اخيستې. په تيرو وختونو کي دغه ډول بريدونه وسله والو طالبانو او داعش تر سره کړي دي.
طالبانو به ۲۰۱۱ کال په ننګرهار کي د يو ورته بريد پړه په غاړه اخيستې وه. هغه وخت ۴۰ انسانان په جلال اباد کي وژل سوي ول.
پر ورته موضوع یو انځوريز البوم زموږ له آرشيف څخه (06.09.2016):
د کابل بریدونه د انځور په ژبه
تیره ورځ په کابل کې درې بریدونه وشول. لومړي دوه بریدونه د دفاع وزارت ته څیرمه وشول او دریم برید په شهر نو کې د پاملرنې موسسې مخې ته وشو او بیا له یاغیانو سره ۱۱ ساعته نښتې دوام وموند چې د درو برید کوونکو په وژلو ختم شو.
انځور: Reuters/M. Ismailد دوشنبې په ورځ په پلازمېنه کابل کې د افغانستان د دفاع وزارت ته څیرمه پر له پسې دوه بریدونه وشول، چې ملکي او امنیتي کسانو ته یې مرگ ژوبله واړوله.
د دفاع وزارت ته څیرمه له لومړۍ چاودنې وروسته چې خلک د قربانیانو مرستې ته ورغلل نو د رپوټونو له مخې یوه ځانمرگي برید کوونکي د خلکو په گڼه گوڼه کې ځان والوزاوه.
په دغو دواړو بریدونو کې د افغانستان د روغتیا وزارت په وینا د وژل شوو کسانو شمیر ۳۵ تنه لوړ شوی دی او نور شا او خوا ۱۰۳ تنه ټپیان دي.
د دوو پر له پسې ځانمرگي بریدونو وروسته امنیتي ځواکونو سیمه کلابند کړه او د نورو مشکوکو کسانو لټون یې پیل کړ.
د خبري آژانسونو د رپټونو له مخې په وژل شوو کسانو کې د افغان امنیتي ځواکونو د یوه جنرال په شمول نور څلور افسران هم شامل دي.
په کابل کې د دوشنبې د ورځې د ځانمرگي بریدونو پړه وسله والو طالبانو ومنله.
د دوشنبې په شپه د سیمې په وخت د شپې پر یوولسو بجو د کابل په شهر نو سیمه کې د خبري آژانسونه د رپوټونو له مخې د پاملرنې، خیریه موسسې مخې ته لومړی موټر بم چاودنه رامنځ ته شوه او تر هغې وروسته درې برید کوونکو په دغه ودانۍ کې ځان پټ کړ.
د افغانستان د کورنیو چارو وزارت ویاند صدیق صدیقي، د سه شنبې په ورځ رسنیو ته وویل چې له برید کوونکو سره تر یوولس ساعته جگړې وروسته درې سره برید گر وژل شوي او برید پای ته ورسید.
پر بهرنۍ موسسې باندې د یرغل په پایله کې د چارواکو په وینا یو تن وژل شوی او نور شپږ تنه ټپیانه شوي دي. د صدیق صدیقي په خبره د د لسو بهرنیانو په شمول ۴۲ تنه ژغور شوي دي. د افغانستان ولسمشر محمد اشرف غني او اجرائیه ریئس عبدالله عبدالله دغه بریدونه په کلکه غندلي دي.
