د الماني رسنیو په حواله، په ترکیه کې د جولای د ۱۵ نیټې ناکامې کودتا وروسته لږ تر لږه درې ترکي ديپلوماتانو په المان کې د پناه غوښتنه کړې ده. دغه رپوټ په داسې وخت کې خپریږي چې د برلین او انقرې ترمنځ اړیکې تر پخوا لږ ترینګلې دي.
د المان زوددویچه سایتنګ ورځپاڼې،NDR او WDR د جمعې په ورځ رپوټ خپور کړ چې په دغو درې پناه غوښتونکو کې یو کس په برلین کې د ترکیې د سفارت نظامي اتشه ده.
د پناه غوښتنه په داسې حال کې کیږي چې په دې وروستیو کې ترکي چارواکو سلګونه ډپلوماتیک پاسپورټونه لغو کړي دي. په لس هاو زره د پولیسو سرتیري، د پوځ سرتیري، استادان او قاضیان له دندو یا ګوښه کړل شوي او یا هم زندان ته اچول شوي دي. په دې لړ کې په بهرنیو هیوادونو کې د دې هیواد ډپلوماتان هم خوندي نه وو.
په بهرنیو هیوادونو کې نیونې
په المان کې خبري رسنیو خبر ورکړی چې د فتح الله ګولن له ډلې سره چې ترکیه یې د کودتا اصلي عامل ګڼي، د ګڼ شمیر ترکي ډپلوماتانو د اړیکې تر لرلو وروسته، د انقرې لخوا د دې هیواد د اتو تنو ډپلوماتانو سفري اسناد لغوه شوي دي.
خبري رسنیو د المان د کورنیو چارو د وزارت په حواله خبر ورکړی چې له دغه اتو کسانو څخه درې کسانو یې په المان کې د سیاسي پناه غوښتنه کړې ده. دوی وایي چې کیدای شي دغه شمیر نور هم لوړ شي.
الماني رسنیو د ډګروال ایهان داغلي چې په برلین کې د ترکیې سفارت نظامي اتشه وو نوم یادوي چې له خپلې میرمنې او ماشومانو سره په ګډه یې له درې نورو کسانو سره یوځای د پناه غوښتنه کړې ده.
د زوددویچه سایتنګ ورځپاڼې د رپوټ په حواله د مهاجرینو لپاره د المان فدراله اداره وايي چې دوی تراوسه د نوموړي د پناه غوښتنې په هکله پریکړه نه ده کړې او وايي چې کیدای شي دغه کار وخت ونیسي.
دغه ورځپاڼه همدا راز وایي چې د ترکيي چارواکو تر اوسه پورې د دغو ډپلوماتانو په هکله چې سیاسي خوندیتوب هم لري، په رسمي ډول شکایت نه دی کړی.
دغه خبرونه کیدای شي د داوړو هیوادونو ترمنځ په دې وروستیو کې بیرته ښې شوې اړیکې تهدید کړي. د انقري حکومت د جون د دویمې نیټي د پارلماني ټاکنو پر وړاندې د غبرګون په توګه خپل سفیر بیرته وغوښت. څو ساعتونه وروسته له هغې چې د جمعې په ورځې د پناه غوښتنې دغه خبر خپور شو، المان ته د ترکیې سفیر حسین اونی بیرته راستون شو او خپلې دندې ته یې ادامه ورکړه.
دغې الماني ورځپاڼې وړاندوینه کړې ده چې کیدای شي د ترکیې حکومت پر المان د تورنو مجرمینو د خوندي ساتلو تور پورې کړي.
پر ورته موضوع یو انځوريز البوم زموږ له آرشيف څخه (16.07.2016):
د ترکيې ناکامه کودتا په انځورونو کي
د ترکيې د يو شمېر پوځيانو له خوا د کودتا هڅه ناکامه شوه. رجب طيب اردوغان د کودتا په وخت په رخصتيو کې وو. د ترکيې ولسمشر د ترکيې له ولسونو وغوښتل چې کوڅو ته په راوتلو سره د کودتاچيانو په وړاندې ودريږي.
انځور: Getty Images/G.Tanپه ترکيه کې کودتا ناکامه وه
کودتا د استانبول په وخت د شپې په نه نيمو بجو پيل شوه.
د ترکيې پلازمېنه انقره د خونړیو نښتو شاهده وه.
په ځينو سيمو کې پوليس له کودتاچيانو سره ونښتل.
په زرګونو خلک د کودتاچيانو په وړاندې
په زرونو خلک د پوځي کودتا په وړاندې له پله واوښتل او استانبول ته ورداخل شول.
وګړو يو زغرور پوځي محاصره کړی دی.
د ترکيې ولسمشر، رجب طیب اردوغان، د تلويزيوني پيغام له لارې له خلکو وغوښتل چې د کودتاچيانو په وړاندې مقاومت وکړي.
پوځيانو په دغه شپنۍ کودتا کې اعلان وکړ چې پوځي حکومت يې رامنځ ته کړی دی.
رجب طیب اردوغان دلته د استانبول په هوايي ډګر کې ليدل کيږي.
په ترکيه کې پوځي کودتا په کوڅو کې د عامو خلکو په لاس مات شو.
د پوځيانو اعلان د نورو رسنيو تر څنګ د "آرتیآر" خبري راډيو تلويزيون له لارې هم خپور شو.
په سړکونو کې د دولت پلويان
په زرګونو خلکو په کوڅو کې د کودتاوالو پر ضد لاریون وکړ.
په هوايي ډګر کې د اردوغان پلويان
اردوغان د خپلې روغتيا ډاډ ورکړ او ويې ويل چې هيڅوک دې اندېښنه ونه لري. له ولسه يې وغوښتل چې د اتاترک هوايي ډګر او کوڅو ته راووځي.
ويل کيږي چې کودتا د منځنۍ رتبې د قوماندانانو له خوا شوې ده. لومړی يې لوی درستيز برمته کړی وو.
د دولت پلويان د کودتاچيانو په وړاندې
د کودتا مخالفينو په دې کې مرسته وکړه چې د پوځي کودتاچیانو اهداف ناکامه پاته شي.
د اردوغان او جنرال هولوسی آکار تر منځ ليدنه
د اردوغان او جنرال هولوسی آکار تر منځ ليدنه وشوه. آکار د ترکيې لوی درستيز دی چې کودتاچيانو يرغمل کړی وو.
قهرېدلو خلکو پر کودتا پلوو سرتېرو بريد وکړ
د کودتاچيانو پر ټانکونو (شوبلو) يرغل
خلک له کودتاچیانو سره د مقابلې او د ټانک د نيولو پر مهال
د پارلمان پر ودانۍ بمباري
په انقره کې د پارلمان پر ودانۍ بمباري وشوه
پولیسو او خلکو يو ځای له کودتاچي پوځيانو سره مقابله وکړه
کودتا به ورته «ګرانه» تمامه شي
د انادولو د خبري اژانس په حواله اردوغان پوځي کودتا «ستر خيانت» بللی دی او ويلي يې دي چې هغه به کودتاچيانو ته په ډېره جګه بيه تمامه شي.
د دولت پلويان د پله د پاسه
د دولت پلويان د پله د پاسه د دغې «تاریخي» ورځې په پلمه عکسونه اخلي.
