د یونان د معارف وزیر تاسوس کوراکیس، چې د دغې غونډې مشري کوله د جمعې په ورځ وویل: «دغه قانون د پارلمان د حاضرو ۲۷۶ غړو له ډلې څخه د ۱۶۹ موافقو رایو په اکثریت سره تصویب شو.»

چارواکو ویلي دي چې هڅه به وکړي چې د کډوالو حقوق د نړیوالو قوانینو له مخې خوندي وي.

د یونان د مهاجرو وزیر یانیس موزالیس، د خپل هیواد پارلمان تر رای اچوونې مخکې ویلي وو: «زموږ پر هیواد باندې تور لګول کیږي چې د نوي تړون له مخې به موږ بشري حقونه له پامه وغورځوو.»

هغه زیاته کړه: «زه ډاډه یم، او باو لرم چې دا به ټول کسان تسکین کړي، چې موږ به بشري حقونو ته په هغه ډول چې په نړیوالو قوانینو او د ژنیو کنوانسیون کې ورته حدود ټاکل شوي دي، پابند پاتې شو.»

په ورته وخت کې د یونان قانون جوړونکو همدا راز په نوي قانون کې ترکیه په صراحت سره د یو "دریم امن هیواد" په توګه نه دی یاد کړی.

پر تړون د بشر حقونو د مدافعينو نیوکه

د ترکیې او اروپايي اتحادیې تر منځ د کډوالو په اړه د شوي تړون څخه وروسته، اوس یونان او ترکیه دې ته اړ دي چې پر خپلو قوانینو یوه کره کتنه وکړي او په هغو کې څه بدلون راولي. د دې تړون هدف له یونان سره مرسته کول دي چې د بالکان هیوادونو له خوا د پولو تر تړل کیدو وروسته د شاوخوا ۵۲۰۰۰ کډوالو له شتون سره لاس او ګریوان دی.

د ترکیې او اروپايي اتحادېې ترمنځ د شوي تړون له مخې، هر هغه مهاجر چې د مارچ له شلمې نیټې مخکې یونان ته رسیدلی وي او د پناه غوښتنې اسناد یې نه وي سپارلي او یا خو د پناه غوښتنې شرایط یې نه وي پوره کړي، بیرته ترکیې ته استول کیږي. دغه راز د هر هغه مهاجر په بدل کې چې ترکیه به یې بیرته سوریې ته استوي، یو بل مهاجر به له ترکیې څخه اروپا ته په قانوني توګه لیږدول کیږي.

د ترکېې او اروپايي اتحادېې تړون د مهاجرو په برخه کې د ملګرو ملتونو د عالي کمیشنرۍ(UNHCR) او دغه راز د بشرحقونو ډلو لخوا په دې دلیل چې د مهاجرو حقونو ته په کې پام نه دی شوی، په پراخه کچه تر نیوکو لاندې راغلی دی.

د اروپا او مرکزي آسیا له پاره د بخښنې نړیوال سازمان مشر جان دالهوزین، ويلي دي: «هغوی یې د خپلو سرحدونو په تړلو سره ناهیلي کړل. د اروپايي اتحادېې مشران پر دغو واقعیتونو سترګي پټوي. ترکیه د سوریايي مهاجرو له پاره یو امن هیواد نه دی او د هري ورځي په تیرویدو سره نور هم ناامنه کیږي.»

په ورته وخت کې د اروپايي اتحادې مشران وايي چې دوې د مهاجرو په مسئله کې له انقري سره د پرمختک په حال کې دي او هڅې رواني دي چې په یونان کې د نوم لیکنې په مرکزونو کې د آسانتیاوي برابرولو په برخه کې پرمختګونه وشي.

د اروپايي اتحادېې یوه ویاند آلماني خبري آژانس ته وویل: «موږ پوهیږو چې ستونزې شته. د ظرفیتونو ستونزې شته. له همدې کبله موږ له یونان سره د مرسته کولو په حال کې یو چې وضعیت په کنترول کې راولي.»