د مهاجرت نړیوال سازمان (IOM) د جمعې په ورځ د یوه رپوټ په خپرولو سره وویل چې په تیرو پنځو ورځو کې «له شنبې څخه تر پنجشنبې پورې» ۴۸ زره کډوال یونان ته رسیدلي دي. د دې سازمان د رپوټ له مخې یوازې سږکال ۶۸۱ زره کسانو د مدیترانې سمندرګې له لارې ځانونه اروپا ته رسولي دي.

د دې کډوالو ډیر شمیر چې د سوریي، عراق او افغانستان په څیر له جګړه ځپلو هیوادونو څخه دي، د بالقان له لاري ځانونه د اروپا شمالي هیوادونو ته رسوي.

د ملګرو ملتونو د کډوالو له پاره د عالي کمیسارۍ مسول امین عواد، په وینا پر سوریي د روسیي هوایي بریدونو هم د دې حالت په کړکیچنیدو اغیز کړی. د روسیي تر بمباریو وروسته د حلب په ښار کې جګرو زور اخیستی چې له دې کبله ۵۰ زره کسان تیښتې ته اړ شوي دي. د عواد د وینا له مخې د دې کسانو ډیر شمیر د سوريي دننه امن ځایونو ته کډوال شوي دي.

د رپوټونو له مخې د سوريي دننه ۶،۳ میلیونه کسان د تيښتې په حالت کې دي او اټکل کیږي چې دا شمیره ۷،۶ میلیونه کسانو ته ورسیږي. د عواد پخ وینا د دې شمیر څخه ځینې کسان له سوريي څخه بهر ته په کډوالۍ بریالي شوي دي.

د بالقان په لاره کې د کډوالو د کړکیچ شدت سره د اروپایي ټولنه په بلنه په بروکسل کې د یکشنبې په ورځ یوه غونډه تر سره کیږي او په دې غونډه کې د مقدونیي او صربستان هیوادونه چې د اروپایي ټولنې غړي نه دي هم دعوت شوي دي ځکه د کډوالو په کړکیچ کې دا هیوادونه هم ډیر ښکیل دي.