د لومړي وزیر کیریاکاس میتسوتاکس، په مشرۍ د یونان محافظه پاله حکومت غواړي د راتلونکي میلادي کال تر پایه پورې شا او خوا ۱۰۰۰۰ پناه غوښتونکي ترکیې ته بیرته واستوي. د یونان د کابینې تر بیړنۍ غونډې وروسته ویل شوي دي چې پر دې سربیره د غیر قانوني او یا رد شوو مهاجرو له پاره بند يا توقیف خانو ته ورته کمپونه رامنځ ته کیږي. همداشان په آژه سمندر کې د څارنې د سختیدو خبر هم ورکړل شوی دی.
دغه پریکړې د پخواني کیڼ اړخه حکومت له پالیسو څخه د لارې بدلولو په معنی دي. د پخواني لومړي وزیر الیکسیس سیپراس، په مشرۍ حکومت څه د پاسه څلورو کلونو کې یوازې ۱۸۰۶ پناه غوښتونکي ترکیې ته استولي وو.
آلمان د آتن د نوي حکومت د پریکړو څخه ملاتړ څرګند کړی دی. د آلمان د حکومت ویاند ستېفن زایبرت، ویلي دي چې د یونان د ټاپوګانو په مهاجر کمپونو کې ناخواله وضعیت ته په کتو سره، د آلمان حکومت له دغو ځایونو ترکیې ته د زیاتو او ژر بیرته خلکو د ستنولو پر لړۍ ټینګار کوي. د دغه ویاند په خبره دا د حل لارې یوه برخه ده.
موریا مهاجر کمپ کې د اور لګیدنې په پایله کې سوځیدلي کانتینرونهانځور: picture-alliance/dpa/M. Varaklas په ۲۰۱۶م کال کې د اروپایي اتحادیې او ترکیې ترمنځ د رامنځ ته شوي تړون له مخې یونان هغه سوریایي مهاجر چې د ترکیې له لارې یونان ته ورغلي وي، بیرته ترکیې ته استولی شي. ترکیه د مهاجرو د پالنې له پاره له اروپایي اتحادیې څخه اقتصادي مرستې ترلاسه کوي. د آلمان د حکومت د ویاند په خبره دغه مرستې ورکول کیږي. د ترکیې ولسمشر رجب طیب اردوغان شکایت کړی دی چې د اروپا له لوري د مرستو ژمنې په بشپړه توګه نه رعایت کیږي.
د ژر مرستو غوښتنه
د اروپایي اتحادیې او ترکیې ترمنځ په شوې تړون کې دا هم شته چې ترکیې ته د مهاجرو د بیرته ستنولو په بدل کې اروپایي اتحادیه باید نور سوریایي مهاجر ومني. خو په درې نیمو کلونو کې شا او خوا ۲۲۰۰ انسانان ترکیې ته لیږدول شوي دي، چې یوه برخه یې د یونان او ترکیې ترمنځ د شوي موازي تړون په چوکاټ کې راځي.
د موریا مهاجر کمپ کې د یکشنبې په ورځ د اور لګیدنې په پیښه کې د یوې مور او ماشومې تر وژل کیدو وروسته ملګرو ملتونو د عاجلو اقداماتو غوښتنه کړې ده. د ملګرو ملتونو د کډوالو چارو عالي کمیسارۍ ویاند بوریس چيشرکوف، ویلي دي چې د یونان حکومت باید په دغه کمپ کې وضعیت تر کنترول لاندې راولي. د ویاند په خبره له ټاپوګانو څخه وچې ته د پناه غوښتونکو د لیږد لړۍ باید »ګړندۍ« شي او د هغوی د ژوندانه په شرایطو کې ښه والی راوستل شي.
موریا کمپ په اصل کې د ۳۰۰۰ کسانو د ځایدو ظرفیت لري، خو اوس په کې شا او خوا ۱۳۰۰۰ کسان ژوند کوي چې کابو له یوه کال راهیسې یې د یوه کوچني ښار بڼه غوره کړې ده. هغه خیمې چې مهاجر په کې ژوند کوي اوس دغه ځای ته څیرمه د زیتونو تر باغونو پورې غځیدلي دي. د دغه کمپ ځیني مهاجر په کانتینرونو کې ژوند کوي.
rb/nob sr/bs (afp, dpa)
زموږ له آرشیف څخه:
د یونان د موریا کمپ مهاجر په کوم ډول شرایطو کې ژوند کوي؟
سږ کال د یونان لسبوس ټاپو ته یو ځل بیا د مهاجرو ورتګ ډیر شوی دی. په موریا کمپ کې د مهاجرو له پاره شرایط په تدریجي ډول مخ پر خرابیدو دي. نور احوال د انځورونو په دې ګالرئ کې ننداره کولی شئ.
انځور: DW/D. Tosidisد موریا مهاجر کمپ په اصل کې د ۳۰۰۰ کسانو د ځایدو ظرفیت لري. خو اوسمهال په دغه کمپ ۹۸۰۰ پناه غوښتونکي اوسیږي. د موریا کمپ په یونان کې د مهاجرو د ثبت لومړنیو پنځو مرکزونو څخه تر ټولو ستر مرکز دی.
په موریا کمپ کې زیاتره اوسیدونکي داسې دي چې زیان ورته رسیدلی او عاجلو روغتیايي مرستو ته اړتیا لري. دغه نجلۍ چې د غزې تراړې ده د موریا کمپ د باندې په خیمه کې له خپلې کورنۍ سره اوسیږي. دغه نجلۍ هغه مهال ټپي شوي چې د اسرائیلو له لوري توغول شوی توغندی یې پر کور ولګید.
په اګست میاشت کې تر ۲۸۰۰ زیات کسان د یونان ټاپوګانو ته ورسیدل. يوه کښتۍ چې ۴۰ تنه پکښې سپاره ول د اروپايي اتحادیې د بهرنیو پولو ساتونکي آژانس «فرونتکس» له لوري تر نیول کیدو وروسته د سکالا سیکامنیس، بندر ته یوړل شو. په دغه ډله کې اته ښځې ۱۸ ماشوما چې پنځه پکښې بې سرپرسته ول او ۱۴ نارینه ول. دغه ټول افغانان ول.
وروسته له هغې چې ښځې او ماشومان یوه ترانزیتي کمپ ته ولیږدول شول، ۱۸ نارینه انتظار باسي چې د مامورینو له لوري همدغه کمپ ته ولیږدول شي. داو طلب کسان له مرستندویانو سره په ګډه له ځایي مامورینو سره مرسته کوي چې نویو راغو کسانو ته خواړه او د څښاک اوبه ورکړي.
یوه افغانه میرمنو په تنور کې ډوډۍ پخوي چې پر نورو مهاجرو یې په یوه یورو پلوري. د کمپ شرایط ښه نه دي او د خوړو کیفیت هم له ټاکلي ستندر څخه کښته دی. له دې کبله ډیری مهاجرو چې له اوږدې مودې راهیسې په کمپ کې اوسیږي د ورځې د تیرولو او د وطن د یادون له پاره نورې لارې چارې موندلي دي.
بې شمیره مهاجر عاجلې روغتیایي پاملرنې ته اړتیا لري. بې سرحده ډاکټران د عاجلو پيښو له پاره د موریا کمپ مخامخ لوري ته د بیړنیو مرستو یوه کلینک کې فعالیت کوي. د کمپ دننه اوسمهال یوازې یو ډاکټر شته او دا چې د مایتلینه روغتونو باندې ډیر بیروبار دی او په ځینو قضیو کې له تداوۍ څخه مخ اړوي.
د دغه ټاپو په شمال کې د ژوند ژغورونکو واسکټونو او کښتیو «هدیره» په ۲۰۱۵/۱۶م کلونو کې د مهاجرو د بې سارې څپې د یادون نښه ده. د لسبوس ټاپو له کلونو راهیسې د مهاجرو د کړکیچ مرکز دی، چې په زرونو کسان یې د دغه ټاپو څنډو ته وررسیږي. اوسمهال د دغه ټاپو په بیلا بیلو برخو کې ۱۱۰۰۰ مهاجر ژوند کوي. اټکل کیږي چې د روان میلادي کال تر پایه ښایي په دغه شمیر کې ډیروالی راشي.
په موریا کې اوس ۸۶۰۰ کسان بند پاتې دي. د ورخې په اوږدو کتارونو کې دریدل د هغوی په ورځنۍ اساسي چاره اوښتې ده. ځینې یې د اوبو او خوړو د تر لاسه کولو له پاره آن په ساعتونو په کتارونو کې انتظار باسي.
نورو ځایونو د مهاجرو لیږدول؟
د مهاجرو یو ډله کښتۍ ته د ختلو تیاری نیسي چې د یونان یوې وچې ته یې لیږدوي. په یوه شپه کې موریا کمپ ته د ۶۰۰ کسانو د رارسیدو وروسته د یونان حکومت پریکړه چې ۱۴۰۰ کسان وچې ته انتقال کړي. زیاتره یې د نیا کاوالا کمپ ته انتقال شودي چې د یونان په شمال کې لیرې پروت یو کلی دی.
