د یونان اموریو کلی له ایوروس سیند څخه یوازې ۳۰۰ کیلومتره واټن لري. د دې سیمې د ټولنې مشر پنایوتس اګیلدارکس، وایي چې هغه او نور دواطلبان پر سرحدي لارو پیره کوي: «په دې ورځو کې مونږ پر سرحدي لارو څارنه کوو، له کوم ځایه چې مهاجر راځي.»
د هغه په خبره دوی له سیند څخه تیریدونکي مهاجر هلته نیسي او پولیسو ته اطلاع ورکوي. وروسته بیا چارواکي هغې دستګیر کوي او له ځان سره یې وړي: «بیا دا نو د پولیسو کار دی، مونږ ورسره هیڅ غرض نه لرو چې هغوې دوی له ځان سره چیرته بیایي. مونږ خو یوازې د پولیس او پوځ مرسته کوو.»
د ترکیې او یونان ترمنځ سرحد کي قهریدلي مهاجر
مخ پر وړاندي تېښته: په زرونو مهاجر د ترکیې او یونان ترمنځ سرحد ته رسیدلي دي. تر دې مخکي د ترکیې ولسمشر اعلان کړی وو چي اروپايي ټولني ته به د مهاجرو د ورتگ مخه ونه نیسي.
انځور: Reuters/H. Aldemir
له اغزنو کټارو څخه تیریدل امکان نه لري
پناه غوښتونکي د پولې د پرانیستلو په هیله ول، خو له اوښکي بهوونکي گاز او اغزنو کټارو سره مخامخ سول. د جمعې له ماښام راهیسي مخ پر زیاتیدونکي ډول مهاجرو د یونان او ترکیې ترمنځ پر پوله هجوم وروړی. زیاتره دغه کسان د کوچنیو بکسونو او ډیرو لږو شخصي شیانو سره پر لاره دي. دا په داسي حال کی ده چی هوا هم ډیره سړه ده.
انځور: picture-alliance/AA/G. Balci
د مهاجرو شمیر مخ پر زیاتیدو دی
خو له یونان سره سرحد تړلی دی. د پاڅارکولې په سرحدي سیمه کې د شنبې په ورځ شاوخوا ۳۰۰۰ مهاجر راټول سوي ول. زیاترو یې اور بل کړی وو، څو له یخنۍ ځان وساتي. د هغوی په منځ کې کورنۍ او کوچنیان هم شامل دي. د ترکیې د ولسمشر اردوغان په حواله د تیرې جمعې راهیسي ۱۸ زره مهاجر د اروپایی ټولنې پولې ته رسیدلي او ښایي د هغوی شمیر ۳۰ زرو ته ورسیږي.
انځور: picture-alliance/AA/G. Balci
ټوله ورځ له اوښکي بهوونکي گاز څخه کار اخیستل کیږي
د یونان سرحد ته څیرمه د اوښکي بهوونکي گاز او مرچو سپرې تور لوگي ټوله سیمه نیولې ده او پر یوناني پولیس د ډبرو ګوزارونه کیږي. د شنبې په ورځ د مهاجرو او سرحدي پوستو ترمنځ آخ او ډب رامنځ ته شو. د عینی شاهدانو په حواله د ترکیی او یونان ترمنځ سرحد، یوې حائلی سیمه کی شاوخوا ۵۰۰ انسانان راټول سوي ول.
انځور: Reuters/H. Aldemir
په یوروس کې د کښتۍ ماتیدل
یوې سوریایی مور او د هغې ماشوم هڅه کوله په یوې کښتۍ کې د یوروس په نامه سرحدي اوبو څخه تیر سي. مخکې له دې چې هغوی د یونان ساحل ته ورسیږي، کښتۍ یې له اوبو ډکه سوه. ژغورونکې عملې په یوه کوچني ټاپو کې هغوی دواړه وژغورل. یوازې هغوی نه دي چې له دا ډول برخلیک سره مخامخ سوي.
انځور: picture-alliance/AA/O. Coban
د اوبو له لارې یونان ته رسیدل
د کښتۍ په مرسته لا یونان ته رسیدل ممکن نه دي. یوناني ساحلي ساتونکو او سرحدي څارونکو د جمعې راهیسی د خپلو معلوماتو له مخې د شاوخوا ۴۰۰۰ غیر قانوني مهاجرو د ورتگ مخه نیولې ده. خو بیا هم مهاجر هڅه کوي چې ځانونه د یونان خاورې ته ورسوي.
انځور: picture-alliance/AA/O. Coban
یوازې لږ کسان خپل هدف ته رسیږي
د یوروس رود د ترکیې او یونان ترمنځ سرحد جوړوي. د شنبې په ورځ په ډلو ډلو انسانانو هڅه وکړه چې د ربړي کښتیو په مرسته ځانونه د یونان ساحل ته ورسوي. خو ډیر کم کسان پر دې کار بریالي سول. په آتن کې د یونان د حکومت یوه ویاند ویلي دي چې دوی خپل سرحدونه چې هغه د اروپایی ټولنې سرحدونه هم دي، ساتلي دي.
انځور: picture-alliance/AA/O. Coban
انځورونه1 | 6
یو وخت به په سرحد کې دغو کليوالي خلکو له مهاجرو سره مرسته کوله. سیمه ایزو خلکو به دغو مهاجرو ته چې په خطرناکو ځمکنیو لارو راتلل اوبه او خواړه ورکول او نورې آسانتیاوې به یې ورته برابرولې. دا ټول به د انساني همدردۍ له مخې ترسره کیدل. خو اوس دغه همدردي له منځه تللې ده. اوس د یونان په کلیو او ټاپوګانو کې مهاجرو ته ښه راغلاست نه ویل کیږيږ
د ترکیې ولسمشر رجب طیب اردوغان د فبرورۍ میاشتې په وروستیو کې ویلي وو چې اروپا ته د تلونکو مهاجرو مخه به نوره نه نیول کیږي. تر دې اعلان وروسته د یونان او ترکیې ترمنځ سرحد ته د په زرګونو مهاجر راتګ پیل شول.
د اټکلونو له مخې شاوخوا ۳۵ زره مهاجر د ترکیې او یونان په سرحد کې اروپا ته د رسیدو په تمه دي. د یونان حکومت هم هلته د دوی د مخنیوي له پاره اقدامات پیل کړي دي چې له امله د اتن او انقرې مناسبات هم خړ پړ شوي دي.
