د هند د کيراله ايالت د پوليسو وياند د دوشنبې په ورځ )د می میاشتي ۲۵ مه( ويلي دي چي دغه ۲۷ کلن تر دې دمخه هم د همدې کال په مارچ میاشت کي د خپلي ماینې د وژلو کوښښ کړی وو، خو ناکامه سوی وو. خو په دوهم وار امنیتي چارواکي هغه مهال پوه سول، چي دغه سړي د خپلي ماينې تر مرګ يوازي څو ورځي وروسته يې د جهیز غوښتنه وکړه.

د پولیسو په حواله د دغه هندي د تلیفوني ارقامو تر ارزیابۍ وروسته معلومه سوه، چي هغه له یوه مار خرڅونکي سره تماس درلودئ او په انټرنیت کي یې د مارانو ویدیوګاني کتلي وې.

د همدې کال په مارچ میاشت کي هم هغه د خپلي ماینې د وژلو ناکامه کوښښ کړی ؤ. داسي چي یو سخت زهري مار یې رانیولی او پر خپلي ښځي باندي یې ورایله کړی وو. د مار تر چیچلو وروسته دا تقریبأ دوې میاشتي په روغتون کي پاته سوه او د خپل پلار په کور کي تر پاتیدو وروسته هلته جوړه سوه. دوهم وار یې بیا میړه یو بل مار په ځای کي ورایله کړ، چي دا ځل ترې مړه سوه.

د پولیسو د رپوټ مطابق په داسي حال کي چي د وژل سوي ښځي میړه د خپلي ماینې سره په یوه خونه کي اوسیدی، خو په دا سهار یې داسي ښووله، چي په هیڅ شي خبر نه دی.

د پولیسو په حواله شکمن قاتل غوښتل د هغې په وژلو سره د خپلي شتمني ماینې ثروت ورپاته سي. میړه یې بیره درلوده چي که یې ماینه طلاق واخلي، نو د تقریبأ ۱۰۰ طلايي سِکو او د ۵۰۰۰۰۰ روپیو په ارزښت موټر به بیرته ورکوي. دغه شيان هغې په جهیز کي د خپل مور او پلار له کور څخه ورسره راوړي وه.

دغه ۲۷ کلن او مار خرڅونکئ اوس نیول سوي او بندیان سوي دي. هغوی یو کلن ماشوم هم درلود.