د فرانسې خبري آژانس د شنبې په ورځ خبر ورکړ چې دغه حمله د اورګاډو د «ګار د لیون» په تمځای کې شوې ده.

د پاریس د پولیسو مشر، لوران نونیز (Laurent Nunez) په تمځای کې یو مطبوعاتي کنفرانس کې وويل: «حمله کونکي په چاقو او چکش په تمځای کې پر درو کسانو حمله وکړه. په دې حمله کې یو تن ډېر او دوه نور جزئي ټپیان شوي دي.»

هغه وويل هغه کس چې ډېر ټپي شوی وضعیت ېې «ثابت» دی، خو ژوند ېې لا هم په خطر کې دی.

د فرانسې پولیسو ويلي دي چې حمله کونکی یو ۳۱ کلن سړی دی چې د مالي هېواد وګړی دی. د پولیسو د معلوماتو له مخې، لومړنۍ پلټنې ښيي چې دا یو «تروریستي اقدام» نه دی.