یو شمیر اوکرایني سرتیري روسیې ته اوښتې دي
۱۳۹۳ مرداد ۱۴, سهشنبه![](https://static.dw.com/image/17748547_800.webp)
هم پخپله کیف او هم مسکو دغه خبره منلې ده چې یو شمیر اوکرایني سرتیري له پولې څخه اوښتي دي. خو د دغو سرتیرو د دې کار لاملونو د دواړو اړخونو له خوا بل ډول ښول شوي دي.
روسي چارواکو ویلي دي چې له ۴۰۰ څخه ډیرو اوکرایني سرتیرو په دې هیواد کې سیاسي پناه غوښتې ده ترڅو په راتلونکې کې د روسي پلوو بیلتون غوښتونکو پر وړاندې جگړه کولو ته اړ نه شي.
د کریملن په حواله په دې ترڅ کې ټول ټال ۴۳۸ اوکرایني سرتیري روسیې ته رسیدلې دي. د روسي سرحدي ځواکونو یوه ویاند د رویتر خبري آژانس ته ویلي دي: «دغه سرتیري له جگړې ستړي شوي دي او نور نه غواړي چې په هغې کې گډون وکړي.»
په تلویزیون کې د سرتیرو د منل کیدو بهیر ښوول شوی
روسي «ان تي وي» تلویزیون داسې انځورونه خپاره کړي دي چې په کې ډیر شمیر اوکرایني سرتیري د سرحدي ځواکونو په یوه خیمه کې د گوکووا په سیمه کې لیدل کیږي. تر هغه وروسته بیا وویل شول چې ۱۸۰ اوکرایني سرتیرو غوښتنه کړې ده چې هغوی ته اجازه ورکړل شي ترڅو بیرته خپل هیواد ته ستانه شي. د دې تلویزیون د رپوټ له مخې دغه اوکرایني سرتیري د بسونو په واسطه بیرته خپلو هیوادونو ته لیږدول شوي دي.
د روسیې د بهرنیو چارو وزیر سرگي لاوروف، په کیف کې له پوځي خدمت څخه د تیښتې په تور د دغو سرتیرو د مجازات کیدو په هکله گواښ وکړ. هغه وویل: «دا په هیڅ صورت د منلو وړ نه ده چې له هغو کسانو چې له خپلو هیوادونو سره له جگړه کولو په تنگ شوي دي د خاینینو په توگه چلن وشي.»
کیف دغې پیښې ته په بل نظر گوري
د اوکراین حکومت د روسیي دغه څرگندونې په سختو ټکو رد کړي دي خو په عین حال کې یې دا خبره منلې ده چې څو سوه سرتیري یې د روسیې خاورې ته ننوتي دي. د اوکراین د دفاع وزارت یوه ویاند ویلي دي چې ۳۱۱ تنه سرحدي سرتیري یې له بیلتون غوښتونکو سره د جگړې په ترڅ کې مجبور شول چې د روسیې خاورې ته ننوځي.
اوکرایني چارواکو ټینگار کړی دی چې ځواکونو پر شا تگ کړی دی خو هغوی روسي ځواکونو ته نه دي تسلیم شوي. اوکراین ویلي دي چې اوس د دغو سرتیرو د بیرته ستنیدو په اړه مذاکرې روانې دي.