د سولر تختې د انرژۍ د رسولو په برخه کې مخکښ دي. د ټولي نړۍ د انرژۍ دوه سلنه اړتيا لمریزه بريښنا پوره کوي. په اروپايي ټولنه کې آن ۴ سلنه. د اټکلونو پر اساس به تر ۲۰۲۰ م کال پورې د نړۍ د انرژۍ ۳ سلنه او تر ۲۰۳۰ م کال پورې آن ۱۳ سلنه اړتيا د لمزيزې بريښنا له لارې پوره کيږي.

چين د سولر انرژۍ په برخه کې مخکښ دی. د ۲۰۱۷م کال تر پايه پورې په دغه هيواد کې پر ډيره ستر ساحه سولري تختې نصب شوې، چې د بريښنا جوړولو مجموعي وړتيا یې ۱۳۱ گيگا وات ته رسيدله. دا د کابو ۱۳۰ سترو اتومي او د ډبرو د سکرو د ۲۵۰ دستگاه څخه هم زياته انرژي ده. آلمان د ۲۰۱۷ تر پای پورې د ۴۳ گيگا وات لمزيزې بريښنا د توليد وړتيا لرله.

د سولر انرژۍ اهميت وار د واره زياتيږي. په هند کې تر اوسه تر لس گيگا واته زياتره لمريزه بريښنا توليديږي خو تر ۲۰۲۲ م کال پورې دا بايد ۱۰۰ گيگا واته شي. دمگړی په ټوله نړۍ د سولر د نويو دستگاو څخه په لاس راوړل شوي انرژۍ تر ټولو ارزانه تمامه شوې. هند او چين ځکه د ډبرو سکرو د نويو دستگاو پلانونه درولي دي.

په ټوله نړۍ کې کابو دوه ميليارده انسانان برق ته لاس رسی نه لري. د رڼا له پاره زياتره د تيلو له څراغونو څخه استعفاده کيږي. خو د خارو تيل هم گران دي او سوځول یې تنفسي ناروغۍ پيدا کوي. د دې په پرتله سولر سستم چې بيتري ولري او LED څراغونه ارزان تماميږي. په بنگله ديش کې له دې لارې کابو ۴ ميليونه کورونو ته بريښنا ورکول کيږي.

د افغانستان د بریښنا شرکت په حواله په دغه هیواد کې په اوسط ډول په کال کې۳۰۰ لمریزي ورځې وي نو افغانان کولای شي چې په ډیر ښه ډول له پاکي لمریزي انرژۍ څخه کار واخلي. د افغانستان په ليرو پرتو سيمو کې خلک په شخصي لگښت د سولر تختۍ رانيسي او د بريښنا خپله اړتيا په پوره کوي.

د شخصي کورونو خاوندانو او شرکتونو د سولر انرژۍ له لارې د انرژۍ د اړتياو پوره کولو ته مخه کړې ده. په آلمان کې دا خپله پيدا کړل شوی برق د بريښنا د شرکتونو په پرتله ډير ارزانه او کابو په نيمه بیه تماميږي.

د خپلې توليد کړې بریښنا ساتل لا دمگړۍ گران بيه تماميږي. خو د سولاري بيتريو له لارې د دې قيمت هم مخ پر ځوړ دی. د بيتريو د تخنيک له وجې د خپلې انرژۍ د توليد تمايل لا پسې چټک شوی دی.

د «سولر امپلز ۲» په نوم الوتکې د لمريزې بريښنا پر مټ د نړۍ چکر وواهه. دا الوتکه ډيره سپکه ده او سولاري هستې او بيتري گانې یې ماشين ته انرژي ورکوي. د نړۍ د دې سفر سره د هوايي چلن دې نوښتگرو وښووله چې د انرژۍ او تخنيک نور ډير امکانات هم شته او د سولر انرژۍ څخه د استعفادې له پاره یې تبليغ وکړ.

لمر د نړۍ تر اړتيا ۱۰۰۰ چنده زياته انرژۍ لري. سولار تخنيک په ټوله نړۍ کې د انرژۍ د اړتيا د پوره کولو او د تودوښي د محدودولو په برخه کې مهم نقش لوبولای شي. د اقليم هدفونو ته د رسيدو له پاره په نړۍ کې له سولر انرژۍ څخه استعفاده ډير مهمه ده او دا کار بايد په ډيره چټکۍ سره وشي.