په ایران کې ناڅاپي سېلابونو او په سیندونو کې د اوبو سطحې لوړېدو ځاني تلفات اړولي دي.
د ایران دولتي خبري آژانس ایرنا د سه شنبې په ورځ وویل چې په دغه هيواد کې د تېرې ورځې په سېلابونو کې د مړه شوو کسانو شمېر له شپږو، پنځلسو ته لوړ شوی دی.
ایرنا په خپل رپوټ کې ويلي دي چې په سېلابونو کې وژل شوي کسان ټول په ایران کې میشت افغان مهاجر دي.
دغه ناڅاپي سېلابونه د دوشنبې په ورځ د ایران د کرمان ولایت په جیرفت ولسوالۍ کې رامنځ ته شوي او دغه افراد د یادې ولسوالۍ په هلیل سیند کې په سېلاب کې راګير او ډوب شوي دي.
سرچينې د کرمان ولایت د چارواکو له قوله ويلي دي چې دغو افغان مهاجرو د ېوې کورنۍ په څېر په یو باغ کې کار کاوه او ماشومان ېې د لامبو له پاره د سیند منځ ته ورغلي ول چې هلته د وروښتونو له کبله د سېلاب اوبو کې ډوب شوي ول. زیاته شوې ده چې د باغ مالک دوه کسان ژغورلي، خو د نجات پر مهال خپله په اوبو کې ډوب شوی دی.
ایرنا ويلي دي چې د لټون او ژغورنې عملیات پای ته رسيدلي دي.
د افغانستان په ختيځ کې هم ناڅاپي سېلابونو ځاني او مالي زیانونه اړولي دي. د ننګرهار ولایت په تازه سېلابونو کې درې کسان مړه او شل نور ژوبل شوي دي.
د طبیعي پېښو پر وړاندې د مبارزې ادارې ويلي دي چې کېدای شي د تلفاتو ارقام لوړ شي. دغو سېلابونو خلکو ته مالي زیانونه هم اړولي دي. شاوخوا ۱۵۰ کورونه تخریب شوي دي.
د هوا پېژندنې ادارې تېره اوونۍ د افغانستان په دولسو ولایتونو کې د درنو ورښتونو او د ناڅاپي سېلابونو د جارې کېدو خبرداری ورکړی وو. کارپوهان په دې باور دي چې اقليمي بدلون د وچکالۍ او شدیدو ورښتونو سبب ګرځيدلی دی.
افغانستان او ایران په تېره لسيزه کې د پر له پسې وچکاليو، شديدو ورښتونو او سېلابونو تجربې درلودلي دي. د روان میلادي کال په سر کې په افغانستان کې شاوخوا ۳۰۰ کسان په سېلابونو کې خپل ژوند له لاسه ورکړ.
د ایران په سويل کې د ۲۰۲۲م کال په سېلابونو کې ۸۰ کسان مړه شول او د ۲۰۰ ميلیونه ډالرو په ارزښت مالي زیانونه ېې واړول.
له آرشيف څخه یو انځوریز البوم:
د نړۍ په بیلابیلو هیوادونو کې اقلیمي بدلون او سیلابونه
د ځمکې تودوخه او د اقلیم بدلون لامل شوي چې د نړۍ په یو شمیر هیوادونو کې پرله پسې بارانونه او شدید سیلابونه راشي. په افغانستان، پاکستان او ایران کې سیلابونو ډېر ځاني او مالي زیانونه اړولي دي.
انځور: Atif Aryan/AFP/Getty Images په وروستیو پېښو کې د افغانستان په مرکزي سیمو کې پرله پسې بارانونو له امله په غور ولایت کې ناڅاپه سېلابونه راوتلي او لږ تر لږه ۵۰ تنه یې وژلي دي.
افغانستان، په زرونو کورنه ويجار شوي
د طالبانو د سیمه ییزو چارواکو په وینا، په دغه سېلاب کې لږ تر لږه دوه زره کورونه ویجاړ شوي او څلور زره نور کورونه ویجاړ شوي دي. شاوخوا دوه زره دوکانونه هم زیانمن شوي دي. ګڼ کسان ټپیان او یو شمیر نادرکه دي. دغو سیلابونو څارویو ته هم زیان اړولی دی.
افغانستان، شمال کې ناڅاپه سېلابونه
تېره اوونۍ د سختو بارانونو له کبله د افغانستان په شمال کې هم ناڅاپه سېلابونو راووتل. دغو سيلابونو کلي ویجاړ کړل، ۳۱۵ کسان یې ووژل او تر ۱۶۰۰ ډېر یې ټپیان کړل.
د جرمني په زارلنډ ایالت کې د سختو بارانونو له امله سیلابونه راغلي چې د چارواکو په وینا په تېرو ۳۰ کلونو کې بې ساري وو.
آلمان، له سختو بارانونو خبرداری
چارواکو او د جرمني د هوا پېژندنې ادارې څو ورځې وړاندې د دې سخت باران په اړه خبرداری ورکړی و او له خلکو یې غوښتي وو چې چمتوالی ونیسي. د سیلابونو د مخنیوي لپاره ډیری تدابیر نیول شوي.
د آلمان د خبري آژانسونو د رپوټ له مخې د آلمان په گاونډي هیواد بلجیم کې هم سیلابونو د ترافیکو په گډون د عامه خدمتونو په برخه کې ګډوډي رامنځ ته کړې ده.
په هالنډ کې، هم سیلابونه لامل شوي چې د اور وژنې او ژغورنې ځواکونه چمتووالی ونیسي.دغه هیواد سمندر ته د نږدې کیدو له امله د سیلابونو له دوامداره خطر سره مخ دی.
برازیل، په زرونو انسانان بې کوره شوي
په برازیل کې د سختو بارانونو له امله زرګونه کسان بې کوره شوي، ۱۲۶ تنه مړه، ۷۵۶ تنه ټپیان او ۱۴۱ تنه لادرکه شوي دي.
برازیل، د ريوگرانډه دوسول ايالت
د ریو ګرانډه دو سول په ایالت کې سیلابونه لامل شوی چې ۱.۴ میلیونه خلک بیړنیو مرستو ته اړتیا پیدا کړي.
د ایران شمال ختیځ هم د سختو بارانونو او ناڅاپه سیلابونو له امله اغیزمن شوی دی. په مشهد کې چارواکو د سېلاب د راوتلو خبره کړې او ویلي یې دي چې وضعیت تر کنټرول لاندې دی. خو خلک شکايت کوي او وايي چې سېلاب ډېر زيانونه اړولي دي.
په تېرو دوو اوونيو کې پاکستان کې موسمي بارانونو او سېلابونو سخت زيانونه اړولي دي. د اپریل په میاشت کې چې په دغه هیواد کې په تیرو ۶۰ کلونو کې تر ټولو باراني میاشت وه، لږ تر لږه ۱۴۴ کسان ووژل شول
دغه راز ، د فرانسې په شمال ختیځ موسیل سیمه کې له سختو بارانونو وروسته د سیند د سطحې د لوړیدو له امله د سیلاب خبرداری ورکړل شوی دی. کارپوهان وايي چې د اقلیم بدلون به په ټوله نړۍ کې د سیلابونو شمیر او شدت زیات کړي.
