یو انسان نما روبوت چې د یکشنبې په ورځ (د ۲۰۲۶ کال د اپريل ۱۹) د چین په بېجينګ کې د روبوتونو نیم ماراتون سیالۍ وګټله، د انسانانو د نړیوال ریکارډ څخه په چټک وخت کې خپل هدف ته ورسېد او د چین د ټکنالوژۍ پرمختګ یې هم وښود.
د دې سیالۍ ګټونکی د آنر (Honor) په نوم يو شرکت څخه و، کوم چې د ځيرک تليفون جوړوونکې يوه کمپنۍ ده. دغه روبوت ۲۱ کیلومتره واټن په ۵۰ دقیقو او ۲۶ ثانیو کې بشپړ کړ. دا وخت د انسان نړیوال ریکارډ لرونکي ياکوب کيپليمو څخه لا هم ډېر چټک دی، چې هغه دا واټن د مارچ په میاشت کې په لیسبون کې شاوخوا په ۵۷ دقیقو کې وهلی و.
دغه لاسته راوړنه د تېر کال له سیالۍ څخه لوی پرمختګ ښيي، ځکه تېر کال ګټونکي روبوت دا واټن په ۲ ساعتونو، ۴۰ دقیقو او ۴۲ ثانیو کې بشپړ کړی و.
خو سیالي بې له ستونزو خالي نه وه؛ یو روبوت د پیل پر لیکه ولوېد او بل له خنډ سره وجنګېد.
پوهه: مصنوعي ځېرکتيا د مسلکي کارګرو له خلا سره مبارزه کوي
This browser does not support the video element.
د غوره انساني ورزشکارانو پر بنسټ طرحه شوی
د آنر (Honor) شرکت د ازمایښتي پرمختګ انجنیر دو شیاودي وویل چې د دوی ټیم له پایلو خوښ دی. هغه زیاته کړه چې روبوت د غوره انساني ورزشکارانو پر بنسټ طرحه شوی، اوږدې پښې لري چې شاوخوا ۹۵ سانتي متره دي او یو پیاوړی مایع د یخولو سیستم لري چې ډېره برخه یې په خپله جوړ شوی دی.
هغه وویل: «په راتلونکي کې دا ټکنالوژي نورو برخو ته هم انتقالېدلی شي. د بېلګې په توګه، ساختماني ثبات او د مایع یخولو ټکنالوژي کولای شي په صنعتي برخو کې وکارول شي.»
که څه هم د انسان نما روبوتونو پراخ تجارتي کارول لا وخت ته اړتیا لري، خو نندارچیان یې له فعالیت څخه ډېر اغېزمن شوي وو. سن ژیګانګ چې تېر کال هم نندارې ته راغلی و، سږ کال يې له خپل زوی سره سیالي ولیدله.
هغه وویل: «زه سږ کال ډېر لوی بدلون احساس کوم. دا لومړی ځل دی چې روبوتونه له انسانانو مخکې کېږي، دا هغه څه دي چې ما هېڅکله تصور نه کاوه.»
۴۰ سلنه روبوتونه په خپلواکه توګه روان وو
وانګ ون چې له خپلې کورنۍ سره راغلی و، وویل روبوتونو د انسان منډه وهونکو ډېره پاملرنه ځانته اړولې ده.
هغه وویل: «د روبوتونو چټکتیا له انسانانو ډېره لوړه ده. ښایي دا د یوې نوې زمانې پیل وي.»
د بېجينګ د اقتصادي ټکنالوژۍ سیمې په وینا، شاوخوا ۴۰ سلنه روبوتونه په خپلواکه توګه روان وو او نور له لرې کنټرولېدل.
د چین دولتي رسنۍ راپور ورکړی چې یو بل روبوت چې له لرې کنټرولېده، حتی په ۴۸ دقیقو او ۱۹ ثانیو کې پای ته ورسېد، خو هغه روبوت چې خپلواکه ناوبري یې کاروله، د سیالۍ د قواعدو له مخې اتل اعلان شو.
د CCTV ټلویزیون وویل چې دویم او درېیم مقام ګټونکي روبوتونه، چې هغوی هم د آنر شرکت وو، په ترتیب سره په شاوخوا ۵۱ او ۵۳ دقیقو کې سیالي پای ته ورسوله.
په چین کې ټکنالوژي د امریکا سره د سیالۍ مهم ډګر ګرځېدلی دی او د دې هېواد پنځه کلن پلان د پرمختللو ټکنالوژیو لکه انسان نما روبوتونو پر پراختیا ټینګار کوي.
انسان ته ورته روبوتونه کوم کارونه کولی شي؟
په مصنوعي ځيرکتيا سمبال روبوتونه له انسانانو څخه ډېر کارونه پرغاړه اخلي. دغه انسان ډوله ماشینونه څه کولی شي او ایا دوی به ژر زموږ ځای ونیسي؟ انځورونه او معلومات.
انځور: Stringer/AA/picture allianceد آينشټاين بڼي ته ورته روبوت
په هانګ کانګ کې د هانسن روبوټیک په نوم شرکت د انسان په څیر روبوتونه جوړوي او د خپل روبوتیک او مصنوعي ځيرکتيا ټیکنالوژۍ له پاره پیژندل کیږي. یو ماشین د مشهور فزیک پوه "پروفیسر آينشټاین" په نوم نومول شوی دی.
د امکان تر حده د انسان په څیر روبوتونو رامنځ ته کولو له پاره د تولید پرمهال د فروبر په نوم نانوتیک کارول کیږي. په دې سره اندرویدونه رامینځته کیږي چې د مخ ریښتیني بڼه وښیې. په راتلونکي کې دغه شرکت غواړي چې خپلو روبوتونو ته انساني وړتیاوې ورکړي لکه مینه او شفقت.
دغه شرکت له ۲۰۰۷م کال راهیسې انسان ته ورته روبوتونه جوړوي - او په ۲۰۱۷م کال کې یې د «سوفیا» په ماډل سره يو نوښت وکړ: دا لومړی او تر دې دمه یوازینی روبوت دی چې خپل تابعیت لري. د دغي روبوتي تر وړاندي کولو وروسته سعودي عربستان انډرایډ ته خپل تابعيت ورکړ. سوفیا ملګرو ملتونو ته د "نوښت سفیرې" په توګه هم کار کوي.
دوستانه څېره او د اوسپني بدن: «بیومني» روبوت داسي روبوت دی چي په هره برخه کې کارول کيدای شي. بیومني کولی شي بوتلونه خلاص کړي او ستن ولگوي، له همدې امله په رستورانونو او په طبي سکتورونو کې کارول کيدای شي او هغه حتی ویل کیږي چې فضا ته سفر وکړي ترڅو د فضا جوړښتونو په رغولو کې مرسته وکړي.
له مصنوعي ځيرکتيا څخه هنر
انسان ته ورته روبوتونه نه یوازې عملي دندې ترسره کوي - دوی حتی په هنري توګه فعال کیدای شي. په ۲۰۱۹م کال کې رامنځ ته شوی (آي-دا) د انسان بڼي ته ورته روبوت دی چي هنري کارونه کوي.
دا یو په زړه پورې عکس دی، کله چې جاپاني روبوتیسټ هیروشي ایشیګورو خپل ځانته ورته روبوت (جیمینایډ)تر څنګ دریږي چې د هغه د غبرگونی ورور په څیر ښکاري. ایشیګورو د جاپاني روبوتیک څیړنې پاپ ستوری ګڼل کیږي او د جاپان د ډیجیټل وزیر تارو کونو له پاره یې د انډرایډ کلون هم جوړ کړی. د هغه خپل ځانته ورته ربوټ اوس حتی متحده ایالاتو ته د لیکچر په سفر روان دی - پرته له اصلي.
په آلمان کې هم دغه شان روبوتونه جوړیږي. د ۲۰۲۲م کال په مني کې د (لینا) په دفتر کې ازموینه بشپړه کړه. د «یپ ان ټایم» څیړنیز لابراتوار روبوتیک میرمن چې په مصنوعي ځيرکتيا سمباله وه د اتو اونیو له پاره یې له همکارانو سره یوځای کار وکړ.
د مصنوعي ځيرکتيا مخترع له خطرونو خبرداری ورکوي
څومره چې مصنوعي ځيرکتيا ډېر کارونه ترسره کوي په هغه اندازه يې خطر هم زياتيږي. جیوفري هینتون، چې د «مصنوعي ځيرکتيا پلار» بلل کیږي، پر دغي ځرکتيا باندې د کنټرول له لاسه ورکولو ویره لري او د بشریت له پاره د جدي خطرونو» خبرداری ورکوي.
