د استرالیا صدراعظم سکات موريسون وويل چې دوی به دغه اقدام په «موقتي توګه» د می میاشتې له ۲۸مې، یعنې یوازې درې ورځې وروسته، په داسې حال کې چې «نړیوال ځواکونه له افغانستان څخه د وتلو په حال کې دي» وکړي.

په افغانستان کې د مېشتو امریکايي او د هغوی د متحدینو ځواکونو د وتلو پروسه، د می میاشتې له لومړۍ څخه رسما پيل شوې چې دغه پروسه به د امریکا د ولسمشر جو بایدن د شوي اعلان پر اساس د روان کال د سپتمبر مياشتې تر ۱۱مې بشپړه شي.

امریکا غواړي له افغانستان څخه د خپلو پوځيانو په ايستلو سره خپله تر ټولو اوږده جګړه ختمه کړي. خو په عین وخت کې داسې اندېښنې هم موجودي دې چې له افغانستان څخه د دغو ځواکونو په وتلو سره به طالبان غښتلي شي.

وسله والو طالبانو لا له اوسه د افغانستان په ځينو ولایتونو کې خپلې حملې چټکې کړي دي، خو حکومت وايي چې دوی يې پر وړاندې د مقاومت توان لري.

د لويديځ ديپلوماتان او پوځي چارواکي د طالبانو د بیرته راګرځيدو څخه په اندېښنې سره، په دې لټه کې دي چې په راتلونکې کې د خپل ملکي حضور له پاره څنګه امنيت برابر کړي.

په کابل کې يوه بهرني پوځي چارواکي د فرانسې خبري آژانس ته وويل: «په سفارتخانو کې د پاتېدو یوازنۍ انګیزه بشري کارونه په بر کې نیسي، خو که چیرته د دوی د پرسونل له پاره کوم خطر موجود وي بیا نو دلته د پاتېدو له پاره هيڅ دليل نه پاتيږي.«

زیاته شوې ده چې «ځيني نور سفارتونه به هم په راتلونکو اوونيو یا میاشتو کې د استرالیا لار تعقیب کړي«.

استراليا چې د افغانستان په ماموریت کې ېې په سونو عسکر درلودل او په ميلياردونو ډالر يې لګولي، اوس په دغه هیواد کې یوازې د ۸۰ په شاوخوا کې عسکر لري، چې د هغو په ايستلو سره خپل دغه ماموريت پای ته رسوي.

د استراليا صدراعظم ویلي دي چې هلته د لږ شمير استراليايي عسکرو او د يو ډير شمير امريکايي عسکرو پرته د نورو له پاره «امنيتي فضا په مخ پر ډيریدونکي توګه ناڅرګنده ده.» موريسون په يوه اعلاميه کې ويلي دي: «حکومت مشوره ورکړې چې د خپلو ديپلوماتانو د دايمي حضور له پاره نه شي کولای امنيتي خدمات ترسره کړي.»

خو لا روښانه نه ده چې آيا په کابل کې د استراليا سفارت ته چې په يوه ډيره امن سیمه او د امریکا له سفارت څخه ډير لرې هم نه دی، تر اوسه کوم مشخص ګواښ متوجه شوی نه دی.

تیره میاشت، په کابل کې د امریکا سفارت هم په موقتي توګه د خپلو غير ضروري کارمندانو د وتلو امر کړی وو.

خو په رپوټ کې اضافه شوې ده چې له دې ټولو سره سره استراليايي چارواکي اوس هم په افغانستان کې له کار کولو سره علاقمندي لري.

د استراليا په ملي پوهنتون کې د نړیوال امنیت پروفیسور، جان بلاکس لند وايي: «زه نه پوهیږم چې له یوې خوا دوی ولې غواړي چې [سفارت] وتړي، او له بلې خوا وروسته له شلو کلونو پانګونې، وينې، خولې او اوښکيو تويلو بیرته ځان راوباسو. زه فکر کوم دا د خپګان ځای دی.

او د دغه هیواد صدراعظم ويلي دي چې دا یو «موقتي اقدام» دی او استرالیا له افغانستان سره د «خپلو دوو اړخیزو روابطو ادامې ته ژمن دی.»

آژانسونه/م.ک.ص./ن.ز.