محمد علي هغه ماشوم دی چې پر روغتون باندې له وسلوال جنایت څخه روغ رمټ وتی. مور او پلار یې وژل شوي دي او اوس یې یوه خپلوانه پالنه کوي.

څو نورو ماشومانو خپلې مېندې او پلرونه او یا له هغوی څخه یو تن په دغه وحشتناکه برید کې له لاسه ورکړي دي. په دغه برید کې آن نوي زیږیدلو ماشومانو ته هم مرګ ژوبله اوښتې ده، حتی هغه ماشومان هم چې د مېندو په نس کې وو.

اکرم په دغه برید کې خپله میرمن له لاسه ورکړه. هغه ونشو کولی چې له څیرې څخه خپله میرمن تشخیص کړي. خپله لور مریم یې هم د فیسبوک د یوه اعلان له طریقه پیدا کړه، چې د میرمن د تلیفون شمیره او مشخصات په کې درج وو. پولیسو مریم ژغورلې وه او بل روغتون ته یې انتقال کړې وه.

ضیا ګل تر برید دمخه د خپل ماشوم زیږیدو ته په انتظار وه او د وسلوال خونړي برید څخه تر ژوندۍ پاتې کیدو یو ساعت وروسته یې په بل روغتون کې لور وزیږوله. خاوند یې په غوږو څه نه اوري او خپله مور یې په دغه برید کې له لاسه ورکړې، چې د لمسۍ زیږیدو ته په انتظار وه.

برید کوونکي په دشت برچې کې د سل بستریز روغتون د زیږنتون څانګې ته ننوتل او هر لوري ته یې فیرونه کول؛ پر نویو زیږیدلو ماشومانو، مېندارو مېندو، قابله ګانو او حتی هغو ښځو چی د ولادت په حال کي وې.

دغه برید له سختو نړیوالو غبرګونونو سره مخامخ شو. د افغانستان خلکو هم په ټولنیزو رسنیو کې د دغه برید په هکله سخته غوسه وښوده او هغه یې وغندله. خو اوس چې له دغه برید څه کم درې اوونۍ اوړي په هکله یې څه نه ویل کیږي او قربانیان او پاتې شوي کسان هیر کړل شوي دي.

پولیس پر دې وتوانیدل چې له هغې ودانۍ چې برید کوونکي ورننوتلي وو د یو شمیر نویو زیږیدلو ماشومانو او مېندو په شمول ځیني روغتیا پال راوباسي. په دغه برید کې داسې ماشوم هم ټپي وو چې له زیږیدو یې یوازې څو ساعته تیریدل.

د افغانستان له پاره د عاجلو مرستو بنسټ، د قربانیانو له کورنیو سره د خوراکي او اړینو موادو مرسته کړې ده. د دغه پيښې څخه بچ پاتې شوي کسان چې له وحشتناکو صحنو څخه یې سخته روحي صدمه لیدلي، روحي درملنې ته اړتیا لري.