د آلمان د دفاع وزیره، کرامپ کارنباور په دې باور ده چي په بروکسل کي د ناټو د خارجه او دفاع وزیرانو په نننۍ غونډه کي به له افغانستانه د ناټو ځواکونو د وتلو په هکله پریکړه وسي.
انځور: DW
اعلان
انه ګریټ کرامپ کارنباور د «آ. آر. ډې» په نامه تلویزیون ته ویلي: «موږ تل دا خبره کړې چي موږ په ګډه افغانستان ته ننوتلي یو او په ګډه به ورڅخه راوزو. زه د منظم بیرته راایستلو پلوي کوم.»
هغې زیاته کړې چي «له همدې کبله فکر کوم د بروکسل په نننۍ غونډه کي به په دې هکله پریکړه وکړو. آلمان به خپل پلانونه له ناټو او امریکا متحده ایالاتو سره هم آهنګ کړي.»
علاوه پردې د رسنیو په حواله بریتاینا هم د سپتمبر تر یوولسمي خپل د ځواکونو ایستل پلان کړي. نژدې ټول شاوخوا ۷۵۰ بریتانوي عسکر به له دغه هیواده وایستل سي. پرته د امریکا متحده ایالاتو له ملاتړ څخه به په افغانستان کي د هغوی موجودیت له ستونزو سره مخامخ سي، دا ځکه چي هغوی پر امریکايي اډو او د هغوی زیربنايي سیستم باندي تکیه کړې.
دا په داسي حال کی ده چي د جرمني پارلمان څو وخته مخکي په افغانستان کي خپل د ځواکونو ماموریت د ۲۰۲۲م کال د جنورۍ تر ۳۱ مه پوري تمدید کړی وو. په اوس وخت کي لا ۱۳۰۰ آلماني عسکر په افغانستان کي ځای پر ځای دي.
GP/NZ/AG
په افغانستان کې د المان د پوځي ماموریت لوړې ژورې
آلماني سرتیري کابو له ۲۰ کلونو راهیسې په افغانستان کې د ناټو ماموریت په چوکاټ کې حضور لري. که څه هم د آلماني ځواکونه د ماموریت نیټه د مارچ مياشتي پر ۳۱مه ختمیږي، خو په پام کې ده چې وغځول شي.
