د امريکا متحده ایالاتو پخواني ولسمشر جورج ډبليو بوش د چهار شنبې په ورځ له دويچه ويله سره په مرکه کې دا څرګندونې وکړې. نوموړي په خپلو خبرو کې زياته کړه: «افغان ښځې او نجونې به د نه ويلو وړ زيان وويني.»
هغه زياته کړه: «دا يوه تېروتنه ده...هغوی [افغانان] به د دغو بې رحمه انسانانو له خوا قرباني شي او دا خبره ما سخت خواشينی کوي.»
د جمهوري غوښتونکو دغه پخوانی ولسمشر چې د ۲۰۰۱م کال د سپتمبر د ۱۱ نيټې تر بريدونو وروسته یې افغانستان ته ځواکونه ليږدولي ول، وويل چې د آلمان صدارعظمه انګلا ميرکل هم «همدا ډول احساسات لري.»
بوش د ميرکل په اړه چې د صدراعظمې تر څلورو دورو وروسته تقاعد کيږي، وويل چې نوموړې دغه ډېر مهم مقام ته ډېر «وقار بخښلی وو او ډېر مهمې پريکړې یې کړي دي.»
بوش له دويچه ویله سره په دې مرکه کې صدارعظمه ميرکل هم وستايلهانځور: Matthew Cavanaugh/dpa/picture-alliance له افغانستان څخه په داسې حال کې د ناټو او امريکايي ځواکونو د اخراج بهير روان دی چې وسله والو طالبانو د هيواد په ډېرو برخو کې خپل تهاجي بريدونو ته زور ورکړی دی او ډېري کورنۍ بې ځایه شوي دي.
جورج بوش: د امریکا پخوانی ولسمشر د بدلون په دور کې
پر تاوتريخوالي سربیره دغه هيواد د کرونا وبا د يوې نوې څپې له کبله هم سخت کړيږي.
ملګرو ملتونو د سه شنبې په ورځ ويلي ول چې د تاوتريخوالي پراخيدل به په ټول هېواد کې د خلکو د «کړاونو کچه نوره هم لوړه کړي.» دغه سازمان له نړيوالې ټولنې څخه غوښتنه کړې چې له افغانستان سره خپلې مالي مرستې جاري وساتي.
خو د امريکا اوسنی ولسمشر جو بايدن پر دې سربيره هم ټینګار کوي چې اوس وخت رارسېدلی دی چې په افغانستان کې د امريکا ښکيلتيا پای ومومي او افغانان د خپل راتلونکي مسؤليت پر خپله غاړه واخلي.
ب. ص/ ن. ز (AFP)
زموږ له آرشيف څخه:
د نړۍ هغه سیاستوال چې په بوټونو ویشتل شوي دي
له څه مودي راهیسې د ځينو هیوادونو پر ولسمشرانو او سیاستوالو د بوټ غورځولو دود پراخ شوی دی. خو تر ټولو مشهور بیا د امریکا د پخواني ولسمشر جورج بوش دا وو. دا ډول پیښې په یوه انځوریز پوټ کې وگورئ.
انځور: APد امریکا متحدو ایالاتو پخوانی ولسمشر جورج ډبلیو بوش په ۲۰۰۸م کال کې له عراق څخه د لیدنې پر مهال په بوټ وویشتل شو. دغه بوټ د یوه عراقي خبریال منتظر الزیدي له خوا د بوش پر لور وغورځول شو.
د ۲۰۰۹م کال په فبروري میاشت کې په لندن کې یوه آلماني تبع مارتين ژانکي، د چين د هغه وخت پر لومړي وزیر وین جیا باؤ، د بوټ ګزار وکړ. که څه هم بوټ پر جیا باو، ونه لګید، خو هغه ته نږدې ولوید.
د ایران په لویدیځ اذربایجان ولایت کې په ارومیه ښار کې پر پخواني ولسمشر محمود احمدي نژاد د بوټونو کزار شوی وو. دغه پيښه د ۲۰۰۹م کال د مارچ میاشتې پر ۶ نیټه رامنځته شوې وه. احمدي نژاد په ۲۰۰۶م کال کې هم د تهران له یوه مشهور پوهنتون څخه د لیدنې پر مهال له ورته عمل سره مخامخ شوی وو.
د ۲۰۰۹م کال د اکتوبر میاشتې پر ۲۶ نېته په احمد آباد ښار کې د ټاکنیز کمپاین پر مهال یوه ځوان د کانګرس ګوند پر مشر او د هغه وخت لومړي وزیر منموهن سینګه د بوټ کزار وکړ چې یو څو قدمه لیري لوېد.
د سوډان ولسمشر عمر البشیر
د ۲۰۱۰م کال په جنوري په میاشت کې د سوډان په پلازمېنه خرطوم کې د دغه هیواد پر ولسمشر د څپلۍ ګزار وشو. خو د سوډان د صدارت دفتر تر اوسه پورې دا پيښه ردوي. خو د عیني شاهدانو په حواله دا کار شوي وو.
د ۲۰۱۰م کال په فبرورۍ کې یوه کردي ځوان د ترکیې پر اوسني ولسمشر رجب طیب اردوغان د بوټ ګزار وکړ او د کردستان زنده آباد شعار یې ورکړی وو. دغه کردي د سوریې تابعت درلودونکی وو.
د پاکستان پخوانې ولسمشر اصف علي زرداري
د برتیانيا په برمنګهم ښار کې یو پنځوس کلن شخص (سردار شمیم خان) د پاکستان پخوانی ولسمشر آصف علي زرداري په خپلو دواړو بوټونو وشتلی وو. دا پيښه د ۲۰۱۰ م کال د اګست میاشتې پر ۷ رامنځته شوې وه.
د بريتانيا پخوانی لومړی وزیر توني بلير
د ۲۰۱۰م کال د سپتمبر مياشتي پر ۴ نېټه د بریتانيا پخوانی لومړی وزیر توني بلير په هګیو او بوټانو ویشتل شوی وو. دا پيښه په ډبلن کې د هغه د «ای جرني» کتاب د معرفي کولو پر مهال رامنځته شوې وه.
د استرالیا پخوانی لومړی وزیر جون هوارډ
د ۲۰۱۰م کال د نوامبر مياشتي پر ۴ په کیمبرج پوهنتون کې د جوړو شویو مراسمو پر مهال د استرالیا پر پخواني لومړي وزیر جون هوارډ، د بوټ ګزار وشو. د دغه عمل ترسره کوونکی یو استرالیایې زده کونکی وو.
د پاکستان پخوانی ولسمشر پرویز مشرف
په لندن کې یوې غونډې ته د وینا پر مهال د پاکستان پر پخواني پوځي واکمن پرویز مشرف د یوه پاکستاني الاصله بریتانوي له خوا د بوټ ګزار شوی وو. دا پيښه د ۲۰۱۱ م کال د فبرورۍ پر ۶ رامنځته شوې وه.
د تائیوان پخوانی ولسمشر ما یِنګ جو
د ۲۰۱۳م کال د سپتمبر مياشتي پر اتمه یوه مظاهره کوونکي د تائیوان پر پخواني ولسمشر ما یِنګ جو، د بوټ ګزار وکړ. خو بوټ تر هغه نه وو رسیدلی.
د پاکستان پخوانی لومړی وزیر نواز شریف
د پاکستان د سترې محکمې له خوا نا اهل ګڼل شوی پخوانی لومړی وزیر نواز شریف د ۲۰۱۸م کال د مارچ مياشتي پر ۱۱ نیټه په یوه مدرسه کې تر وینا مخکې د یوه تن له خوا په څپلۍ وویشتل شو. په دې توګه نو هغه دریم پاکستانی سیاسي رهبر دی چې د څپلۍ یا بوټ له ګزار سره مخامخ کیږي.
