د چهارشنبې په ورځ نړیوالو مرستندویه ډلو د ملګرو ملتونو د عمومي اسامبلۍ تر غونډې وړاندې د نړۍ پر مشرانو باندې غږ کړی دی چې د حماس او اسرائیل ترمنځ جګړه پای ته ورسوي. د دوی په وینا، دغه جګړه به لا ډیر انسانان له منځه یوسي.
د «سیف دی چلډرن» اعلامیه چې د شلو نورو سترو نړیوالو مرستندویو ادارو چې د غزې په تراډه کې فعالیت لري، په استازیتوب خپره شوې، راغلي: «دولتونه باید د مداخلې له پاره له خپلو ټولو شته سیاسي، اقتصادي او حقوقي وسایلو څخه کار واخلي.» په خپره شوې اعلامیه کې د اسرائیل له لوري پر غزې باندې د هرې ورځې بریدونو د یادونې سربیره راغلي: «د نړۍ مشران اقدام نه کوي. حقایق له پامه غورځول کیږي. شاهدان څنډې ته کیږي. او د [جګړې] د مستقیمو پایلو له کبله لا ډیر کسان وژل کیږي.»
یادو سازمانونو ویلي دي چې د ملګرو ملتونو غړي هېوادونه د نړیوالو قوانینو پلي کول اختیاري ګڼي، چې دا بې ساری خطر رامنځ ته کوي. په لاسلیک کوونکو کې د بې پولې ډاکټران سازمان، پاملرنه یا کییر انټرنیشنل، د ناروې د کډوالو شورا او اکسفام شامل دي.
د اسرائیلو او حماس ډلې ترمنځ د جګړې د پیل راهیسې ګڼ شمیر کسانو ته مرګ ژوبله اوښتې ده. انځور: picture alliance / Anadolu د یادو سازمانونو له لوري دغه اعلامیه یوه ورځ وروسته له هغه خپره شوه چې د ملګرو ملتونو د بشري حقونو د کارپوهانو یوې کمېټې تائید کړه چې د اسرائیل پوځي عملیات د فلسطیني ولس د له منځه وړلو هدف لري او دا د نسل وژنې بڼه لري .
اسرائیل د دې راپور غندنه کړې او هغه یې «رسوايي» بللی، او ټینګار یې کړی دی چې جګړه د حماس پر ضد ده، نه د ملکي وګړو پر ضد، او حماس په جګړه کې له ملکي خلکو د سپر په توګه کار اخلي.
مرستندویو ډلو زیاته کړې ده چې نړیواله ټولنه د عیني شاهدانو څرګندونې له پامه غورځوي او د غزې خلک د ډېرېدونکي ناورین سره یوازې پرېښودل شوي دي. په اعلامیه کې ویل شوي: «موږ له داسې کورنیو سره لیدلي چې د څارویو خوراک خوري او د خپلو ماشومانو له پاره د خوړو په توګه د ونو پاڼې په اوبو کې جوشوي.»
د اعلامیې په خبره تر اوسه پورې زرګونه فلسطیني وګړو د اسرائیل له لوري په بمباریو کې خپل لاسونه او پښې او د بدن غړي له لاسه ورکړي دي.
په غزې کې قحطي: ورځنی ژوند څنګه تیریږي؟
په دې انځوریز رپوټ کې د یوه فلسطیني بې ځایه شوې کورنۍ ورځني ژوند ته د نمونې په توګه کتنه شوې ده. هغه کورنۍ چې د غزې د جګړې په جریان کې څو ځله بې ځایه شوې او له مجبوریته خپل نوي زیږیدلي ماشوم ته د شیدو پرځای اوبه ورکوي. انځور: Jehad Alshrafi/AP Photo/picture alliance ماشومان په یوه خیمه کې پر ځمکه ویده دي په غزې ښار کې د فلسطیني کډوالو په یوه کمپ کې د یوې کورنۍ ماشومان په یوه خیمه کې ویده دي. د دوی مور پلار عبیر او فادي د دوی د مړولو له پاره درې انتخابه لري: شاید یو خیریه پخلنځای پرانیستی وي او وکولی شي په دیګي کې د عدس یا دالو اوبلنه خوروا ترلاسه کړي. یا هم شاید وتوانیږي د ډیرو خلکو په منځ کې د مرستو یوې لارۍ ته ځان ورسوي او یوه خلته وړه ترلاسه کړي. وروستۍ لاره سوال کول یا خیرات غوښتل دي.
انځور: Jehad Alshrafi/AP Photo/picture alliance د فلسطیني بې ځایه شوو په یوه کمپ کې یوه مور له مجبوریته خپل ماشوم ته د شیدو پر ځای په چوشک کې اوبه ورکوي. کله چې ښه چانس ولري او دال ترلاسه کړي، نو له وړو او اوبو سره یې ګډوي. د دې سیمې ډیری نوي زیږیدلي ماشومان سوء تغذي دي. عبیر وایي: «د ګرمۍ، اوبو او خوړو نشتوالي له کبله یوه ورځ پر مونږ لکه سلو ورځو تیریږي.»
انځور: Jehad Alshrafi/AP Photo/picture alliance که ټول دغه انتخابونه کار ور نه کړي، دوی خواړه نه خوري، هغه څه چې په دې ورځو کې ډیر پيښيږي. ځکه ولږه د دوی انرژي، قدرت او هیله لمنځه وړي. د صبح د کورنۍ ستونزي چې د جګړو له کبله څو ځله بې ځایه شوي او اوس د غزې ښار په لویدیځ کې د مهاجرو په کمپ کې اوسیږي، د دې جګړه ځپلي خاورې د ټولو کورنیو سره یو شان دي.
انځور: Jehad Alshrafi/AP Photo/picture alliance دغه فلسطینۍ مور په یوه کاسه کې په لاس جامې پریمنځي. د ډیرې مودې راهیسې په دې سیمه کې بریښنا قطع شوې ده او د څښاک اوبه هم په سختۍ سره پیدا کیږي. نړیوال سازمانونه پر اسرائیل تور لګوي چې له ولږې څخه د وسلې په توګه استفاده کوي. عبیر د خپل پاکوالې او نظافت له پاره له سیند څخه اوبه راوړي او د کورنۍ غړي یې په سیند کې لامبي.
انځور: Jehad Alshrafi/AP Photo/picture alliance په مجموع کې د غزې نږدې ټول اوسیدونکي له ورته وضعیت سره مخامخ دي تر سلو زیاتو نړیوالو خیریه بنسټونو په غزه کې د «پراخې لوږې» په اړه خبرداری ورکړی دی. دغو بنسټونو خراب بشري وضعیت ته په اشارې سره د سملاسي اوربند، د سرحدي لارو د پرانیستو او پرته له خنډ څخه د مرستو د لیږد غوښتنه کړې ده.
انځور: AFP
