پر سپينو ورېښتانو د ائير انډيا ممانعت غبرگونونه راوپارول
۱۴۰۱ آذر ۶, یکشنبه
د هند هوايي شرکت ائير انډيا خپل مسافر پال په دې مکلف کړي دي چي که يې ورېښتان سپين وي نو توروي به يې. خو دغه اصولو تنقيدونه راپارولي دي.
انځور: Bayne Stanley/ZUMA/picture alliance
اعلان
د ائيرانډيا هوايي شرکت په الوتکه کي دننه د مسافرو مراقبت کوونکو خپلو همکارانو لپاره نوي اصول اعلان کړي دي. د دغو مقرراتو له مخي د مثال په توگه په هوټل کي د لنډو پتلونونو پر اغوستلو او د سپينو ورېښتانو پر نه تورولو بنديز لگول شوی دی. د دې تر څنگ پر مسافر پالو ږغ شوی دی چي که يې ورېښتان توييږي نو دي يې بالکل خريي.
طالبان: د هوايي ډګرونو د هوايي حريم د کنترول تړون له عربي اماراتو سره لاسليکيږي
خو د ائيرانډيا شرکت له خوا ياد اصول پر انټرنټ او خواله رسنيو تاوده بحثونه رامځته کړي دي. په داسي حال کي چي بعضي کاروونکو دغه اصول غېر تناسبي او مبالغه آمېز بللي دي، نو نورو يې بيا هرکلی کړی دی او هغه يې پر ځای او اړين بللي دي. د دغو اصولو په تړاو راپور د اين ډي ټي وي په نوم ځايي تلويزيون خپور کړی دی.
په اصولو کي دا هم راغلي دي چي ښځينه همکارانې به حتما غوږوالي کوي او خپل نوکان به د يونيفورم سره په همږغي رنگ کي رنگوي. همکاران او همکارانې به په هوټلونو کي د شپې تېرولو پر وخت اجازه ونلري چي لنډي لمني، سوري لرونکي يا لنډ پتلونان واغوندي.
د اې اين آی په نوم خبري آژانس د ائير انډيا شرکت د نوو اصولو په هکله يو مطلب خپور کړی دی.
د ياد شرکت همکارانو و دغه خبري آژانس ته ويلي دي چي دغه شرکت فکر کوي چي انځور يې د نړيوالو معيارونو سره همږغی نه دی اوسېدلی او غواړي اوس ورته تغيير ورکړي. د ياد شرکت همکارانو زياته کړې ده چي د دغه شرکت اداره غواړي چي شرکت يې د نړيوالو معيارونو سره برابر شي. د ټاټا سَنز شرکت څو مياشتي تر مخه دغه دولتي شرکت رانيولی وو.
آ./ا.ا./ن.ص.
په پاکستان کې د الوتکو د رالویدو سترې پیښې
الوتکه؛ د سفر چټکه وسیله خو له خطره خالي نه وي او د حادثې په صورت کې ترې ژوندي پاتې کیدل د چانس خبره ده. په کراچي ښار کې د الوتکې د را لویدو په تر ټولو تازه پیښه کي ۹۷ کسان وژل شوي دي. دلته نورو پیښو ته کتنه شوې.
انځور: picture-alliance/dpa
۲۰۲۰م کال؛ لاهور – کراچي (۹۷ قربانيان)
د ۲۰۲۰م کال د مې میاشتې په ۲۲ مه نیټه له لاهور څخه کراچي ته تلونکې د پي آی اې اړوند یوه الوتکه تر کوزیدو څو شیبې وړاندې را ولویده چې پکې د ۱۰۷ مسافرینو او د الوتکې د کارمندانو له ډلې څخه ۹۷ تنه یې وژل شوي او یوازې دوه تنه یې ژوندي پاتې دي. الوتکه د استوګنې په سیمه کې رالویدلې او د پاتې نورو کسانو لټون لا هم ادامه لري.
انځور: Reuters/F. Mahmood
۲۰۱۶م کال؛ چترال - اسلام آباد (۴۸ قربانيان)
د ۲۰۱۶م کال د دسمبر میاشتې په ۷مه نیټه له چترال څخه د اسلام آباد په لوري د پاکستان د هوايي شرکت اړوند ATR 42 ډوله الوتکه را ولویده. په دغه پیښه کې د پاکستان د وتلي سندرغاړي جنید جمشید او میرمنې په شمول ۴۸ تنو خپل ژوند له لاسه ورکړ. جنید جمشید د ۸۰مو کلونو د پاپ موسیقۍ سندرغاړی وو او د ژوند په وروستیو کلونو کې یې تبلیغ ته مخه کړې وه.
د ۲۰۱۲م کال د اپریل میاشتې په ۲۰مه نیټه له کراچي څخه د اسلام آباد په لوري د بهوجا ایر په نامه د پاکستان د یوه کوچني خصوصي شرکت اړوند یوه مسافر وړونکې الوتکه د خرابې هوا له کبله له حادثې سره مخامخ شوه چې په کې د الوتکې د ۶ تنو کارکوونکو په شمول ټول ۱۲۷ تنه مسافر ووژل شول.
انځور: picture-alliance/dpa
۲۰۱۰م کال؛ کراچي - اسلام آباد (۱۵۲ قربانيان)
د ۲۰۱۰م کال د جولای میاشتې په ۲۸مه نیټه د ایر بلو په نامه د پاکستان د یوه خصوصي شرکت اړوند Airbus 321 ډوله الوتکه چې له کراچي ښار څخه یې د اسلام آباد په لوري الوتنه کړې وه د اسلام آباد په غرنیزه سیمه کې را ولویده. په دغه پیښه کې په الوتکه کې ټولو ۱۵۲ تنو خپل ژوند له لاسه ورکړ.
انځور: picture alliance / dpa
۲۰۰۶م کال؛ ملتان (۴۵ قربانيان)
د ۲۰۰۶م کال د جولای میاشتې په ۱۰مه نیټه د پاکستان د نړیوال شرکت یا پي آی اې اړوند د فوکر Fokker ډوله الوتکه د ملتان له هوايي ډګر څخه تر الوتنې څو شیبې وروسته را ولویده چې په نتیجه کې یې په الوتکه کې سپرو ټولو ۴۵ تنو خپل ژوند له لاسه ورکړ. د یادې الوتکې د را لویدو دلیل د انجن خرابیدل په ګوته شوي وو.
انځور: PIA
۲۰۰۳م کال؛ کوهاټ (تر ۱۰ ډېر قربانيان)
د ۲۰۰۳م کال د فبروري میاشتې په ۲۰مه نیټه د پاکستان د پوځ اړوند فوکر PAF Fokker ډوله الوتکه د خیبرپښتونخوا په غرنۍ کوهاټ سیمه کې را ولویده چې په پایله کې یې له لسو ډیر کسان ووژل شول. په دغه پیښه کې د پاکستان د هوايي ځواکونو قوماندان مشرف علي او میرمن یې هم وژل شوي وو.
انځور: Reuters/F. Mahmood
۱۹۸۹م کال، ګلګیت بلتستان (۵۴ قربانيان)
د ۱۹۸۹م کال د اګست په ۲۵مه نیټه د پاکستان د نړیوال هوايي شرکت یا پي اې اړوند یوې Fokker ډوله الوتکې د پاکستان له شمالي ګلګیت څخه پرواز وکړ چې د الوتنې پرمهال را ولیده. په دغه پیښه کې ټول ۵۴ تنه تر اوسه پورې لا درکه دي او د الوتنې پاتې شونې تر اوسه پورې هم نه دي موندل شوي.
انځور: AFP/F. Naeem
۱۹۸۸، بهاولپور ـ اسلام آباد (۳۲ قربانيان)
د ۱۹۸۸ م کال د اګست مياشتې په ۱۷مه د پاکستان د هغه وخت ولسمشر جنرال ضيالحق د ۳۱ نورو کسانو سره د پاکستان پوځ په C-130B Hercule ډوله الوتکه کي د اسلام آباد پر لور روان سو، خو پر لارې په دغه الوتکه کې چاودنه وسوه او د ولسمشر په شمول ۳۱ نور ټول سپرلي پکښي ووژل سول. داچې آيا دغه يوه حادثه او که بريد ؤ، تر ننه نه ده معلومه سوې.