د کډوالو د توافقاتو له پاره د آلمان ځانګړي استازي یواخیم سټامپ، په آلمان کې میشتو کډوالو ته خبرداری ورکړی چې خپلو هیوادونو ته سفر یې ښايي د دوی د کډوالۍ قانوني حالت له خطر سره مخامخ کړي. دغه بحثونه ولې تاوده شوي دي؟
افغانستان ته په آلمان کې د میشت یو شمیر افغان کډوالو سفر په دغه هیواد کې تاوده بحثونه را پارولي دي. انځور: Kai Pfafenbach/REUTERS
اعلان
په آلمان کې د میشتو یو شمیر افغان کډوالو له لوري افغانستان ته سفر په دغه هیواد کې د مهاجرت په اړه بحثونه را پارولي دي. د کډوالو د توافقاتو له پاره د آلمان ځنګړي استازي، یواخیم سټامپ، په آلمان کې میشتو کډوالو ته خبر داری ورکړی چې خپلو اصلي هیوادونو ته د دوی سفر کیدی شي د دوی د کډوالۍ قانوني حالت له خطر سره مخامخ کړي.
سټامپ د بیلډ په نامه آلمانۍ ورځپاڼې ته ویلي: «آلمان باید نړۍ ته خپلې دروازې پرانیزې خو باید احمق نه اوسي.» د نوموړي په خبره، هغه کسان چې دلته [آلمان] کې یې د حفاظت غوښتنه کړې، او بیا د رخصتیو د تیرولو له پاره خپلو اصلي هیوادونو ته ځي، آلماني چارواکي باید دا ډاډمن کړي چې دوی سمدستي د حفاظت قانوني حالت له لاسه ورکړي او ونشي کولی چې په آلمان کې پاتې شي. بس همدومره.»
بل لوري ته د هامبورګ د کورنیو چارو وزیرې، انډي ګروټه د آلمان خبري آژانس ته ویلي چې هغه کډوال چې خپلو هیوادونو ته سفر کوي، هغه هیوادونو چې دوی هلته له تعقیب څخه ترې تښتیدلې دي، دا به خامخا د دوی د محافظ حالت هم تر پوښتنې لاندې راولي.
یواخیم سټامپ، په آلمان کې میشتو کډوالو ته خبر داری ورکړی چې خپلو اصلي هیوادونو ته سفر کیدی شي د دوی د کډوالۍ قانوني حالت له خطر سره مخامخ کړي.انځور: S. Matic/DW
په آلمان کې دغه بحثونه وروسته له هغه را وپاریدل کله چې څو ورځې وړاندې د آر. ټي. ال په نامه د دغه هیواد یوه خصوصي تلویزیون افغانستان ته د افغان کډوالو د سفر په هکله راپور خپور کړ. په دغه راپور کې ادعا شوې وه چې د آلمان په شمالي هامبورګ ښار کې د سفر ځینې شرکتونه افغانستان ته د افغان کډوالو د سفر سهولتونه وړاندې کوي. د هامبورګ د کورنیو چارو وزیرې ویلي چې که چیرته افغانستان ته د تګ له پاره لارې اسانه وي، نو بیا د اخراج په هکله هم امکانات موجود دي.
دا هم په داسې حال کې ده چې په آلمان کې د کډوالو فدرالي ادارې یا بامف ویلي چې د کډوالو اصلي هیوادونو ته د دوی سفر په ځینو ځانګړو شرایطو کې مجاز دی او په دې اړه یې د کورنۍ د نیږدې غړي ناروغي او یا مرګ د بیلګې په توګه یاد کړي دي.
خ.ح / ا.و.ا
کوم دلايل په آلمان کي د پناه غوښتنې د قبولۍ سبب ګرځي؟
يوازي د هغه چا د پناه غوښتنه قبوليږي چي اړونده قانوني شرايط يې پوره کړي وي. دا چي د پناه غوښتنې د آلماني قانون اړونده ټکي او د پناه غوښتنې د قبولۍ له پاره کوم دلايل مهم دي، په دغه انځوريز راپور کي يې مطالعه کولای سئ:
انځور: Arnd Riekmann (ARIK)
قبولي د تعريف په ړنا کي
د پناه غوښتنې د قبولیدو لپاره اساس، د آلمان د اساسي قانون د ۱۶ الف مادې (Art. 16a GG)، او د پناه غوښتنې د قانون د دريمي مادې د لومړي بند (Art. 16a GG§ 3) له مخې د مهاجرو په هکله د ژنیف د منشور (GFK) تعریف دی. دا چې د دغه قانون (§ 3 Abs. 1AsylG) له مخې دغه تعریف څه ډول دی، په راتلونکي انځور کي لوستلای سئ: nds-fluerat.org
انځور: Arnd Riekmann (ARIK)
پناه غوښتونکی هغه څوک دی:
« چې د خپل نژاد، دین، ملیت، سياسي مفکورې او يا د ځانګړي ټولنيزي ډلې سره د تړاو له کبله د خپل هغه هيواد څخه بهر وي، چي تابعيت يې لري يا يې هلته د نه تابیعت لرونکی وگړي په توګه ژوند کاوه، خو د تعقيب څخه د ځان ساتنې له پاره د دغه هيواد حفاظت نه سي تر لاسه کولای يا د تعقيب له بيري د دغه حق غوښتنه کول نه غواړي.» قانون: (§ 3 Abs. 1AsylG)
انځور: Getty Images/AFP/P. Desmazes
د ردېدنې دلايل ـ ټولو ته ورپېښه ستونزه
د کډوالو او پناه غوښتونکو له پاره فدرالي اداره په زياتو مواردو کي د پناه غوښتنې ردېدنه په دې توجيه کوي چي گواکې پناه غوښتونکي ته د پورتنیو دلایلو له امله ځير شوي گواښونه، یواځي هغه ته نه، بلکه د دغه هيواد ټولو وګړو ته متوجه دي. معنی دا چې: هر پناه غوښتونکی باید خپله ثابته کړي چې دغه ډول گواښونه یواځي ده ته متوجه دي. nds-fluerat.org
انځور: picture-alliance/dpa/S. Willnow
د ردېدنې دلايل ـ د زيات وخت تېرېدنه
د هغو دلایلو چې یو پناه غوښتونکی پرې تکیه کوي او له خپل هیواد څخه د تیښتې ترمنځ باید داخلي تړاو موجود وي. معنی داچې: نوموړي دلایل باید د تیښتې سبب شوي وي. که د تعقيب او د تېښتي يا هجرت تر منځ زيات وخت تېر سوی وي، نو د هجرت کولو دلايل نور نه منل کيږي، او پناه غوښتنه رديږي.nds-fluerat.org
انځور: picture-alliance/dpa/A. Weigel
د ردېدنې دلايل ـ په خپل هيواد کي نوري امن سيمي
د قبولۍ له پاره د مهاجر په ټول هيواد کي د تعقيب د ګواښ موجوديت شرط دی. که په هيواد کي داسي امن سيمه موجوده وي چي پکښي پناه غوښتونکی له تعقيب څخه ځان خوندي کولای سي، نو بيا له مهاجره غوښتل کيږي چي د خپل هيواد دننه خوندي سيمي ته دي هجرت وکړي. د (BAMF) اداره او اړونده آلمانۍ محکمې مکلفه دي چي د امن سيمو په تړاو تازه معلومات د بېلګي په توګه له UNHCR څخه ترلاسه کړي. nds-fluerat.org
انځور: picture alliance/AP Photo
د ردېدنې پخوانی دليل ـ د دولتي تعقيب نه موجوديت
تر ۲۰۰۵ کال پوري يوازي د هغه چا د پناه غوښتنه قبولېدله چي د يو دولت له خوا تر تعقيب لاندي به ؤ. خو اوس د (§ 3c AsylG) مادې له مخي دغسی تعقیب کیدای سي چې د نورو، دبیلگې په توگه (وسلوالې ډلې) له خوا هم د پناه غوښتنی دلیل وگرځي، البته په دی شرط چې واکمن دولت تر تعقیب لاندې شخص ساتلی نه شي او یا یې ساتل نه غواړي. (§3d AsylG) کيدلای سي.nds-fluerat.org
انځور: picture alliance/AP/The Flint Journal,Jake May
د پناه غوښتنې دلايل
په راتلونکو انځورونو کي ځیني هغه مهم دلایل او لاملونو څخه لوستلای سئ، چي د پناه غوښتونکي يې د پناه غوښتنې پر وخت د خپل مهاجرت د استدلال له پاره کاروي. په دې تړاو هم معلومات لوستلای سئ چي ايا دغه دلايل په عمومي توګه د پناه غوښتونکي په توګه د قبولېدو سبب ګرځي او که څنګه.nds-fluerat.org
انځور: picture-alliance/Anadolu Agency/A. Erkan
حقيقي ګواښ که صرف بيره؟
تعقيب بايد ښکاره، څرګند، منطقي، د فهم وړ او په لوی احتمال ممکن وي. زيات وخت پناه غوښتونکې په دې توجيه هم رديږي چي ګواکي «تاسو د تعقيب لاندي راتللو بيره درلوده، خو په حقيقت کي تر لاندي نه ياست راغلي.» مهاجرو ته دا هم ويل کيږي چي ګواکي تاسو د خپل دولت له چارواکو مرسته غوښتلای سوای. زياتره وختونه دا هغو مهاجرو ته ويل کيږي چي وايي له قومي ډلې يا مافيايي ډلې تښتېدلي دي.nds-fluerat.org
انځور: Getty Images/AFP/A. Nimani
له دولتي کسانو او ادارو څخه بيره
د زياتو هغو پناه غوښتونکو د پناه غوښتنه هم په زیاتو مواردو کي ردېدلای سي، څوک چي وايي له دولتي کسانو يا ادارو له خوا تر تعقيب لاندي راتلو بيره يې لرله خو ورته لا زيان نه وي رسېدلی. د بېلګي په توګه د دغه کس پناه غوښتنه په دې دليل ردېدلای سي چي ګواکي د پناه غوښتونکي د هيواد حکومت د بشري حقونو د ساتلو په کوښښ او په ساتلو مکلف دی او عموما د دې توان هم لري.nds-fluerat.org
انځور: imago/Winfried Rothermel
عملا تر تعقیب لاندي راتلل
هغه پناه غوښتونکی د قبولېدو زيات چانس لري چي تر مخه لا په عملي توګه تر تعقيب لاندي راغلی وي. د (BAMF) اداره په داسي صورت کي دې نتيجې ته رسيږي چي که پناه غوښتونکی خپل هيواد ته ولېږل سي، نو احتمال سته چي بيا به ورسره تر تعقيب لاندي راتلو ستونزه تکرار سي او له دې کبله پناه غوښتنه قبولوي. هغه وخت هم قبولي ممکنه ده چي د هجرت څخه دستي مخکي تعقيب رامنځ ته کيدونکی ؤ.nds-fluerat.org
انځور: NDR
پخوا پای ته رسېدلی تعقيب
تعقيب چي پخوا لا پای ته رسېدلی وي، د قبولۍ سبب نه ګرځي. د بېلګي په توګه که يو څوک حتی څو کاله بندي سوي وي او سزا يې پای ته رسېدلې وي، نو ښايي په دې دليل يې پناه غوښتنه رد سي چي تعقيب په ماضي کي موجود ؤ خو نور پای ته رسېدلی او د بيا تکرار اشد ګواښ يې نه دی موجود. د يو څو ورځو بندي کېدنه او وهل کېدل په زیاتو مواردو کي ډېر جدي تعقيب او په دې توګه د قبولۍ دلیل نه بلل کيږي.nds-fluerat.org
انځور: Ruth Stoltenberg
ګواښ و ژوند او آزادۍ ته
د يو کس ژوند او آزادۍ ته ګواښ صرف په هغه صورت کي د قبولۍ سبب ګرځېدلای سي، چي پناه غوښتونکي ته د هغه د سياسي مفکورې، دين، نژاد يا بلې ټولنيزي ډلې سره د تړاو له کبله دوامداره او جدي ورپېښ وي. خو دغه ګواښ هم تل د قبولۍ ضامن کیدای نه سي. د بند د سزا گواښ، د بیلگې په توگه، کیدای سي په دی دلیل رد سي چې گواکې د مهاجر اړوند دولت د خپل دولتي گټو د ساتني له امله، د بندي کولو حق لري.nds-fluerat.org
انځور: DW/S. al Farra
(کورنۍ) جګړه
په عمومي توګه جګړې يا کورنۍ جګړې په آلمان کي د پناه غوښتونکي په توګه د قبوليدو يا د ورته حفاظت ترلاسه کولو دليل نه ګرځي. خو که د جګړې تر څنګ په ځانګړې توګه يو شخص ته مستقيم، فردي او ثابت سوی د تعقيب ګواښ موجود وي، قبولي ممکنه ده. خو جګړه او کورنۍ جګړه د اخراج د نه عملي کېدو يا ځنډولو سبب کيدلای سي. nds-fluerat.org
انځور: Reuters/K. Ashawi
له جنګي ماموريته انکار
د آلمانۍ محکمو د زياتو فيصلو له مخي يوازي په جګړه کي د عسکر په توګه د جنګېدو څخه انکار يا له جګړې څخه لاس اخيستنه د قبولۍ سبب نه ګرځي، خو هغه وخت سبب ګرځېدلای سي چي له دغه انکار له کبله جزا يې ډېره جدي وي. په جګړه کي د ګډون څخه انکار هله د قبولۍ سبب کېدای سي چي دغه کس و جنايتونو، جنګي جنايتونو (لکه د ملکيانو وژنه) يا د بشريت ضد جنايتونو ته هڅول سوی خو هغه انکار کړی وي. nds-fluerat.org
انځور: Reuters/K. Ashawi
غربت او افلاس
په اصطلاح «عمومي» ستونزي لکه قحطي، غربت، افلاس او طبعي فاجعې د پناه غوښتونکي په توګه د قبولېدو سبب نه سي ګرځېدلای. هغه پناه غوښتونکی چي صرف په خپل هيواد کي د بې وزلې او مادي غربت د شتون له کبله د مهاجرت خبره کوي، په لوی احتمال به قبول نه سي. خو غربت او ورته ستونزې په ځانګړو مواردو کي د اخراج د عملي کېدو د مخنيوي لامل کيدلای سي. nds-fluerat.org
انځور: DW/B.Jequete
د مېرمنو تعقيب
مېرمني او انجونې چي په خپل هيواد کي د جنسي تاوتريخوالي قرباني سوي وي يا يې د قرباني کيدو حتمي بيره ولري، امکان يې سته چي د پناه غوښتونکو په توګه قبولي سي. خو بعضي وخت د دغو مېرمنو پناه غوښتنه په دې دليل هم رديږي چي په دغه هيواد کي هره مېرمنه له دغه ګواښ سره مخامخ نه ده او دغه مېرمنه د ځان ژغورلو نو امکانات لري. عموما جنسي تېری صرف په استثنيي مواردو کي د قبولۍ سبب ګرځېدلای سي. nds-fluerat.org
انځور: Imago/ZUMA Press
دين
زيات وختونه هغه پناه غوښتونکي چي ويل به يې د خپل دين له کبله تر تعقيب لاندي دي، په دې دليل ردېدل چي گواکې کولای سوای چې خپل دیني عقاید پټ وساتي او په عامه توگه بربڼد نه کړي. خو نوې اروپايي حقوقي تگلاره وايي چي انسانان بايد په ښکاره د خپل دين د عملي کولو حق ولري. nds-fluerat.org
انځور: picture-alliance/NurPhoto/A. Abd Halim
همجنسبازي
د ښځینه او یا نارینه و همجنسبازانو تعقیب د پناه غوښتنې یو دلیل کیدای سي. خو په ټولنه کې یواځې د همجنسبازې په وړاندې تبعیض کفایت نه کوي. خو پناه غوښتنه په دې دليل ردېدلای هم سي چي همجنسباز پناه غوښتونکي کولای سوای په خپل هيواد کي خپل تمايل پټ وساتي. nds-fluerat.org
انځور: picture-alliance/dpa/D. Naupold
په جنايت تورن کسان نه قبوليږي
هغه کسان چي د جنايت له کبله درې کاله بندي سوي وي، د آلمان امنیت او یا عامه امنیت ته ګواښ وي يا ورباندي د بشري حقونو د تر پښو لاندي کولو يا د جنګي جنايتونو تر سره کولو شک وي، د پناه غوښتونکي په توګه نه قبوليږي. وعامه امنیت ته د نورو جرایمو د ارتکاب تر څنگ، هغه څوک هم ګواښ بلل کيدلای سي چي جنسي تیری يا جنسي ځورونه یې کړې وي او د دې جرم له امله په يو کال بند محکوم سوی وي. nds-fluerat.org
انځور: SJ-Bild / Leopold Stübner
عدم مسؤليت
د دغه راپور ليکونکی په دغه انځوريز راپور کي د راټولو سوو معلوماتو د بشپړوالي، کاملتوب او تازه والي ادعا نه لري او له کبله يې له هر ډول مسؤليت څخه بري دی. دغه معلومات د مسلکي وکيل او حقوقپوه سره د حقوقي او قانوني مشورې ځای هم نسي نيولای. دغه معلومات د BAMF.DE او د nds-fluerat.org پاڼو څخه د ۲۰۱۷ کال د جنورۍ په ۲۶مه نېټه اخيستل سوي دي.
