طالبانو امریکا ته د هوایي بریدونو له کبله خبرداری ورکړی
۱۴۰۰ مرداد ۱۸, دوشنبه
طالبانو ویلي دي چې له افغان حکومت سره د اوربند هیڅ تړون نه لري او امریکا بايد په افغانستان کې له لاسوهنې ډډه وکړي. طالبان د جمعې ورځې راهیسې، د پنځو ولایتونو د مرکزونو د نیولو ادعا کوي.
انځور: Imago/UPI Photo
اعلان
د افغانستان په مختلفو برخو کې د طالبانو او افغان حکومتي ځواکونو ترمنځ سخته جګړه روانه ده. طالبانو ادعا کړې چې د جمعې ورځې راهیسې یې د پنځو ولایتونو مرکزونه تر خپل کنترول لاندې راوستلي دي. په همدې منځ کې طالبانو له افغان حکومت سره د اوربند غوښتنه هم رد کړې ده.
د رویټرز خبري آژانس په حواله په دوحه کې د طالبانو یوه ویاند الجزیره تلویزون ته ویلي دي چې له افغان حکومت سره یې د اوربند هیڅ ډول تړون نه دی لاسلیک کړی. طالبانو امریکا ته هم خبرداری ورکړی دی چې نور دې د افغانستان په کورنیو چارو کې لاسوهنه نه کوي.
امریکا نږدې خپل ټول سرتیري له افغانستان څخه ایستلي دي، خو سره له دې هم د حکومتي ځواکونو په ملاتړ یې پر طالبانو د هوایي بریدونو لړۍ جاري ساتلې ده.
تیره ورځ طالبانو د کندز ښار د نیولو ادعا وکړه، خو د افغانستان د دفاع وزارت یوه ویاند وویل چې په دغه ولایت کې د طالبانو پر ضد تصفیوي عملیات روان دي او په دې ترڅ کې طالبانو ته سخت تلفات اوښتي دي.
حکومت وایي هڅه کوي کندز ښار بیرته تر خپل کنترول لاندې راولي. خو د رویټرز خبري آژانس په حواله طالبان د ښار په مرکز کې موجود دي او هوایي ډګر یې هم تر خپل کنترول لاندې راوستلی دی.
په هرات کي څه تیریږي؟
د هرات په اطرافو کي د ګذرې او انجیل پر ولسوالیو باندي د طالبانو د حملو تر ډیریدو وروسته د ځانګړي ځواک په سلونو کسان دغه ولایت ته تللي او تصفیوي عملیات شروع سوي دي. نور حال په دغه انځوریز البوم کې:
انځور: Shoaib Tanha/DW
په هرات کي څه تیریږي؟
محلي چارواکو اعلان کړی دی، چي د هرات په مختلفو برخو کي د امنیتي او ولسي ځواکونو ګډ عملیات دوام لري. دهغوی په خبره د افغانستان د هوايي قواوو د حملو په نتیجه کي طالبان د هرات د غربي برخي څخه وتلي دي.
انځور: Shoaib Tanha/DW
د هرات په جنګ کي د اسماعیل خان حضور
په هرات کي د طالبانو د حملو تر ډیریدو وروسته د جهاد د پخواني قوماندان اسماعیل خان په مشرۍ ولسي حرکت شروع سوی دی. د مالان پر پله باندي د طالبانو تر حملې وروسته د اسماعیل خان قواوي د جبهې اول خط ته تللي دي. ځیني معتقد دي، چي په جنګ کي د جهاد د وخت د دغه قوماندان حضور د هرات د خلګو او امنیتي قواوو د روحيې د تقویه کیدو سبب سوی دی.
انځور: DW
د ښار په شاوخوا کي د جنګونو شدت
طالبانو د هرات د ۱۳ ولسوالیو تر نیولو وروسته خپلي حملې د انجیل او ګذرې او هم د ښار پر شاوخوا باندي ډیري کړي دي. د دغو حملو په نتیجه کي طالبانو د انجیل او ګذرې ولسوالیو سره په اته کیلومترۍ کي څو امنیتي پوستې سقوط کړې او دامنیتي قواوو یو تعداد کسان يې مړه او زخمیان کړل.
انځور: Shoaib Tanha/DW
د ملګرو ملتو پردفتر باندي د حملې په مقابل کي عکس العملونه
په هرات کي د ملګرو ملتونو د سازمان پر دفترباندي حملې هم په داخل او هم خارج کي سخت عکس العملونه د ځانه سره درلودل. د هغې جملې څخه د ملګرو ملتو عمومي منشي هم دغه حمله وغندله او د عاملینو د پیژندلو او محاکمه کیدلو غوښتنه یې وکړه. د افغانستان د بشر د حقوقو کمیسون په خبره دغه حمله د جنګي جنایت په قطار کي راځي.
یوه بی ځایه شوې میرمنې د فرانسې خبري آژانس ته وویل: «زمونږ په کلي ډیر بمونه غورځول شوي دي. طالبان هم راغلل هرڅه یې له منځه یوړل. مونږ د خپل کور کلي پريښودو ته اړ کړای شو. موږ او زموږ ماشومان په ډیرو سختو شرایطو کې قرار لرو او مجبوره شوي یو چې په وچه ځمکه ویده شو.»
یوه بل بی ځایه شوي بیا ویلي دي: «د جګړې او ډزو پر مهال زما یوه اووه کلنه لور دباندې وتلې وه او له هغه وخت راهیسې لادرکه ده. مونږ نه پوهیږو چې آیا هغه ژوندۍ هم ده او که نه؟»
