د آلمان پوځ په زرونو محلي همکاران اوس هم په افغانستان کې دي
۱۴۰۱ خرداد ۱۹, پنجشنبه
د آلمان پوځ د سیمه ایزو کارکوونکو د ملاتړ شبکې د معلوماتو له مخې د طالبانو له خوا د واک تر نیولو لس میاشتې وروسته، لا هم شاوخوا ۱۰ زره افغان محلي همکاران آلمان ته د سفر په تمه دي.
انځور: Marc Tessensohn/Bundeswehr/dpa/picture alliance
په ورته وخت کې یو شمیر هغه افغانان چې د آلمان له جي آی زیډ موسیسې سره یې کار کړی دی شکایت کوي چې په ډيرو خطرناکو شرایطو کې يې له آلمانانو سره کار کړی دی، خو د آلمان حکومت اوس له یاده ایستلي دي.
له دغو کسانو څخه يو يې چې د امنیتي دلایلو له امله یي نوم نه دی اخیستل شوی دویچه ویله ته وویل: «د اګست مياشتي پر پنځلسمه مو آلماني ادارو ته ایمیلونه لیږلي دي، خو تر اوسه پورې یې هیڅ احوال نه دی معلوم. په اسلام آباد کې زموږ همکاران د آلمان د بهرنیو چارو وزیرې مخې ته تللي ول، خو دا چې د هغې د کرونا تیسټ مثبت و، زموږ له همکارانو سره یي ونه لیدل او هغه مظاهره چې يې پلان کړې وه، هغه هم لغوه شوه، او دلته په افغانستان کې مو هم پټې مظاهرې وکړې او بنرونه مو چاپ کړل، له آلماني ادارو سره مو تماس ونیو، خو زموږ غږ هیچا نه دی اوریدلی.»
د آلمان دغه پخوانی سیمه ایز کارمند وایي چې ډېر همکاران یي له لاسه ورکړي دي او ژوند یي په خطر کې دی: «همدا اوس موږ په مختلفو ځایونو کې خپل ژوند تیروو، له خپلو کورنو وتلې یوو او په مختلفو ولایتونو کې په پټه ژوند کوو، زموږ ژوند له خطر سره مخ دی. موږ د آلمان له حکومت څخه هیله لرو چې زموږ ټول کارمندان آلمان ته انتقال کړي. د جی آی زید او پي سي پي تر ټولو سخته او خطرناکه پروژه همدا وه چې موږ پلې کوله، خو تر اوسه پورې مو هیڅ برخلیک نه دی معلووم.»
