مونتريال د کانادا هيواد يو ښار دی. په دغه ښار کې د دسمبر مياشتې په يوديرشمه شپه د اورلوبو ښايسته نمايشونه ترسره کيږي. د اورلوبې پر مهال چې آسمان د رنګينو شغلو ډک وي نندارې ته يې ډير خلک له کورونو راوتلې وي.

په دوبۍ کې هر کال د دسمبر په يوديرشمه شپه د نوي ميلادي کال په وياړ اورلوبې ترسره کيږي. د دوبۍ تر ټولو دنګه ودانۍ برج خليفه يو له هغو ځايونو څخه ده چې په زړه پورې اورلوبې ترسره کوي. په ځينو تلويزيوني چينلونو کې دغه اورلوبې په ژوندۍ بڼه ښودل کيږي هم.

د برازيل ريو دې جنيرو ښار کې هم د نوي کال شپې جشن په سترو اورلوبو سره لمانځل کيږي. په دغه ښار کې د نوي کال د جشن يوه ځانګړتيا دا ده چې د اورلوبو تصوير، د سمندر په اوبو کې هم ليدل کيږي. له دې سره ښکلې منظرې رامنځ ته او د جشن ښايست نور هم ډيریږي.

په اروپا کې هم د نوي کال جشن لمانځلو کې ځينې ښارونه خاص شهرت لري. په دغو کې يو هم د آلمان پلازمينه برلين ښار دي. په دغې شپه د سيل تر ټولو مشهور ځای «براندنبورگ دروازه» ده. په دغې شپه په دغه ځای کې تر يو ميليون پورې کسان راټوليږي.

د بريتانيا پلازمينه لندن ښار کې هم د نوی کال په شپه ډيرې لوړې او سترې اورلوبې ترسره کيږي. په دغه شپه تر ټولو ډير خلک د لندن ښار تر ټولو مشهورو ځايونو ته راتوليږي، لکه د بګ بين لوی ساعت او يا هم «لندن آي» يا د لندن سترګه چرخ وفلک. اور لوبې د شپې په فکس صفر بجو پيليږي. يعنې د ۲۰۲۰م کال د جنوري مياشتې د لومړي نيټې له لومړۍ ثانیې څخه.

د فرانسې پلازمينه پاريس ښار کې بيا د نوي کال په شپه تر ټولو ډير خلک د ايفل برج شاوخوا ته راټوليږي. په دغې شپه د ايفل برج له هرې اړ څخه په منظمه توګه اورلوبې ترسره کيږي. ډيری سيلانيان هڅه کوي چې په همدې موقع کې ځانونه د پاريس ښار ته ورسوي. په پاريس کې يوازې د ايفل برج نه چې نورې ډيرې برخې يې هم د نوي کال په شپه د ميلو شاهده وي.

د ايټاليا پلازمينه روم ښار هم له نورو مشهورو ښارونو کم نه دی او د نوي کال په شپه پکې خورا ښايسته اورلوبې ترسره کيږي. په روم کې بيا تر ټولو ډير خلک د سينت پيټرز مسيحي ميدان کې راټوليږي او دغه جشن لمانځي. په ۱۲ بجو د شپې د روم ښار مذهبي مشر هم په دغه جشن کې ګډون کوي او يو لنډه وينا کوي.

د چيک جمهوريت پلازمينه پراګ ښار هم د اروپا د هغو ښارونو په کتار کې راځي چې د نوی کال په شپه پکې ښايسته او رنګينې اورلوبې ترسره کيږي. د جشن لمانځلو پر وخت د پراګ ښار ډيرې سيمې په اورلوبو باندې رڼا وي. د يادولو ده چې د اورلوبو سره سم د هغو د توپونو په څير لوړ آوازونو هم ښار په سر اخيستی وي.

د هسپانيا په پلازمينه مادريد ښار کې د نوي کال په شپه تر ټولو لويه ميله په «پوئيرتا ديل سول» کې لمانځل کيږي. خلک د جشن ځای ته له ځانه سره انګور هم وړي. په هسپانيا کې داسې يو باور دی چې که څوک د ساعت په هر زنګ وهلو سره يوه دانه انګور وخوري نو د انسان قسمت ورسره ښه کيږي.

د سويس ژنيو ښار هم د نوي کال په شپه ۱۲ بجې د لويو اورلوبو شاهد وي. که څه هم ژنيو د اروپا په قيمتي ښارونو کې راځي خو که څوک د جشن په شپه دغه ښار ته ولاړ شي نو ارزښت يې لري.