چارواکي: يخي هوا په افغانستان کې ۷۰ کسان وژلي
۱۴۰۱ دی ۲۸, چهارشنبه
په داسې حال کې چې سختې سړې هوا په دغه بې وزلۍ ځپلي هيواد کې بشري بحران لا پسې شديد کړی دی، چارواکو د تلفاتو دغه شمیرې په ډاګه کړی دی.
د جنورۍ میاشتې له لسمې نېټې راهېسې په کابل او ځينو نورو ولایتونو کې د تودوخې درجه ډېره ټيټه شوې ده.
د تېرې يکشنبې په ورځ په غور ولایت کې د هوا درجه تر منفي ۳۳ درجو رسېدلې وه.
په افغانستان کي يخه هوا او د خلکو ستونزي
د افغانستان د هوا پيژندنې ادارې مشر محمد نسيم مرادي د فرانسې خبري آژانس ته ويلي دي: «سږنی ژمی د تېرو څو کلونو په پرتله يخ دی.»
د ښار په څنډو کې بې ځايه شوې کورنۍ ليدل کيږي چې هڅه کوي د اور په بلولو سره ځانونه ګرم وساتي، په داسې حال کې چې په پلازمېنه کې چې واوره هم پکې ورېدله ده، هغه چې وس یې لري، د ډبرو سکرو بخارۍ کاروي.
مرادي وويل: «داسې انتظار کیږي چې د يخ دا څپه به تر بلې اونې او يا تر دې هم اوږده موده دوام وکړي.»
سوړ ژمی او د داخلي بېځایه سویو تریخ ژوند
د طالبانو د طبيعي پېښو پر وړاندې مبارزې وزارت ويلي دي چې په تېرو اتو ورځو کې ۷۰ انسانان او ۷۰ زره څاروي تلف شوي دي.
په ټولنیزو رسنيو کې په نشر شويو انځورونو کې ليدل کیږي چې يو شمیر مرکزي او شمالي ولایتونو ته غځېدلې لویې لارې د درنې واورې له کبله بندې شوي دي.
دا په افغانستان کې د طالبانو په دويم ځل واک ته رسیدو او له دغه هيواد څخه د امريکايي او ناټو ځواکونو تر وتلو وروسته دويم ژمی دی.
د طالبانو له راتګ سره سم بهرنۍ مرستې په ډراماتیکه توګه لږ شوي دي او په بهرنيو هيوادونو کې د دغه هيواد پرتې شتمنۍ کنګل شوي چې دا بيا د ډېر ناوړه بشري بحران باعث ګرځيدلي.
فقر، بې برقي او په افغانستان کي د یخ بې ساري څپه
د مرستندويه ټولنو د معلوماتو په حواله د هيواد د ۳۸ میليونه نفوس تر نيمايي ډېر یې په روان ژمي کې له لوږې سره مخ دي او تقريباً څلور میليونه ماشومان د خوار ځواکۍ ښکار دي.
تېره مياشت هغه يو شمير غير دولتي ټولنو چې لا هم په افغانستان کې مرسته کوي، له مرستندويه ټولنو سره د ښځو پر کار د طالبانو د بندیز له کبله خپل فعاليتونه ځنډولي ول.
اوس ځينو سازمانونو د طالب چارواکو له خوا د دې ضمانت ترلاسه کولو وروسته چې د روغتيا په برخه کې به ښځې د کار اجازه ولري، بیرته په کار لاس پورې کړی دی.
ب. ص/ ن. ز (AFP)
زموږ له آرشيف څخه: