د ای بي سي شبکې په حواله دغه تر ۵۰ ډېرې ورزشکارې له خپلو کورنيو سره آسترليا ته انتقال شوي دي. دغه هېواد تر يوې اونۍ ډېرې مودې راهيسې د خپلو اتباعو او د خپل سفارت د ځينو پخوانيو کارکوونکو په رايستلو بوخت دی.
د ای بي سي شبکې د رپوټ له مخې تر اوسه کابو ۱۰۰۰ کسان آسترليا رايستلي دي چې په دوی کې تر ۵۰ ډېرې ورزشکارانې او د هغوی د کورنۍ غړي هم شامل دي. د سپورت د نړۍ يو شمير مشهورو څېرو د دغو ورزشکارانو د خوندي ځای ته د انتقال له پاره غږ پورته کړی وو.
نيکي درېدن چې په المپيک لوبو کې یې د لامبو په برخه کې د کاناډا استازيتوب کړی وو، له يوه آسترليايي وکيل سره یې په ګډه افغان ورزشکارانو ته د ويزې ترلاسه کولو په برخه کې هلې ځلې وکړې چې د پارالمپیک لوبو افغان لوبغاړي هم پکې شامل دي.
د ای بي سي د رپوټ په حواله د مهاجرو دغه وکيلانو د دې ويرې چې د ویزې د ترلاسه کولو پروسه به ډېر وخت ونيسي، د آستراليا د فوټبال لوبډلې پخواني کپتان کرايګ فوستر مرسته وغوښتله.
زياته شوې چې نوموړي بيا د بهرنيو چارو له وزيرې ماريز پاينې او د سپورت له وزير ريچارد کولبيک سره خبرې وکړې.
تر دې وروسته ډېر ژر ورزشکارانو ويزې ترلاسه کړې او بيا هغوی د رايستلو کیدو په موخه د کابل هوايي ډګر ته وليږدول شوې.
يادو آسترليايي وزيرانو او د فوټبال د نړۍ مشهورې څېرې فوستر په دې اړه د رويترز پوښتنو ته ځواب نه دی ويلی او له تبصرې څخه يې ډډه کړې ده.
زموږ له آرشيف څخه:
افغان میرمن، له کډوالې څرنګه پیلوټۍ ته ورسیده؟
صفیه فیروزي په ماشوموالي کې کډواله وه خو اوس د افغانستان له دوو ښځینه پیلوټانو څخه یوه ده. په داسې حال کې چې افغانې ښځې اوس هم له سختو ستونزو سره لاس او ګریوان دي، صفیه په دې هیواد کې د ښځو د پرمختګ یوه بیلګه ده.
انځور: picture-alliance/AP Photo/R. Gulد صفیې فیروزې کورنۍ په ۱۹۹۰ کلونو کې، کله چې هغه ماشومه وه، د افغانستان د جګړو له کبله پاکستان ته کډوال شول. دغه کورنۍ بیا د طالبانو د رژیم تر ړنګیدو وروسته بیرته خپل هیواد ته ستنه شوه.
کله چې فیروزې په ښوونځي کې وه نو پر تلویزیون یې یو اعلان ولید چې په کې له ښځو څخه غوښتل شوي وو چې له امنیتي ځواکونو سره یوځای شي. د پوهنځي تر پای ته رسولو وروسته، فیروزي، په پوځي اکاډمي کې شامله شوه او د اړیکو په څانګه کې یې زده کړې پیل کړې. په همدې وخت کې اکاډمي اعلان وکړ چې پوځ داسې نجونو پسې ګرځي چې غواړي پیلوټانې شي.
فیروزې او 12 نورو نجونو خپل غوښتنلیکونه ورکړل, او یوازې هغه د آزموینو تر تیرولو وروسته د پیلوټې په پروګرام کې جذب شوه.
هغه په هرات کې په زده کړو بوخته وه چې له کپتان محمد جواد نجفي, سره یې وپیژندل. دواړو بیا وروسته واده وکړ. د فیروزې میړه د هغې د کار بشپړ ملاتړ کوي.
فیروزې د افغانستان په هوایي ځواک کې یوه له دوو ښځینه پیلوټانو څخه ده خو اوس ځینې نورې نجونې هم په دې برخه کې زده کړې کوي.
کپتان نیلوفر رحماني, په تیرو 30 کلونو په اوږدو کې په 2013 کال کې د افغانستان لومړۍ ښځینه پیلوټه شوه. په افغانستان کې د کورنۍ جګړې تر پیلیدو مخکې یواځې څو تنو ښځینه پیلوټانو د افغانستان په هوایي ځواکونو کې دنده ترسره کوله.
فیروزې وایي، هیله لري چې نورې نجونې د افغانستان په هوایي ځواک کې شاملیدو ته وهڅوي. هغه زیاتوي: «د یوې ښځې په توګه سړی له ډیرو ننګونو سره مخامخیږي. خو سړی باید په یو ډول نه یو ډول له دغو ستونزو سره مقابله وکړي.»
