بلجیم: د کاریکاتور ښکاره کونکي ښوونکي دنده ځنډول شوې
۱۳۹۹ آبان ۱۱, یکشنبه
هغه ښوونکی چې دنده یې ځنډول شوې د بلجیم د پلازمېنې بروکسل په مولن بیک سیمه کې چیرې چې ډیر شمیر مهاجر ژوند کوي او اکثره یې مسلمانان دي، زده کونکو ته تدریس کاوه. چارواکو د دغه ښوونکي نوم نه دې ښکاره کړی.
د سیمه ایزو رسنیو په حواله د جمعې په ورځ کله چې دغه ښوونکي خپلو زده کونکو ته د فرانسې په نیس کې د وژل شوي ښوونکي په اړه خبرې کولې، نو زده کونکو ته یې هم هغه کاریکاتورونه ښکاره کړل چې د فرانسې په ترهګریز برید کې وژل شوي ښوونکي خپلو زده کونکو ته ښکاره کړي وو.
د رسنیو په حواله په دې صنف کې د ۱۰ او ۱۱ کلونو ترمنځ عمر لرونکي ماشومان په زده کړو بوخت دي. ښوونکي د شارلي ابدو په مجله کې د خپرو شویو کاریکاتورونو څخه د یوه کاریکاتور تر ښکاره کولو مخکې، زده کونکو ته وویل چې که هغوی نه غواړي دغه کاریکاتورونه وګوري نو کولی شي خپل نظر ښکته کړي.
د زده کونکو مور پلار د دغه ښوونکي پر ضد شکایت وکړ او چارواکو د انضباطي اقداماتو په ترڅ کې د دغه ښوونکي د دندې ځنډولو پریکړه وکړه. د مولن بیک د ښاروالۍ ویاند وویل چې دا پریکړه یي قانوني سن ته نه رسیدلو ماشومانو ته د نامناسبو انځورونو د ښکاره کولو له امله کړې ده.
د هغه په خبره «که دا کاریکاتور د اسلام د پيغمبر پر ځای د کوم بل چا هم وای، نو مونږ به همدا پریکړه کړې وای.»
د ښي اړخو سیاستوالو نیوکه
د بلجیم د نیو فلیمش ائتلاف پورې تعلق درلودونکي يوه سیاستوال په خپل تویتر کې لیکلي دي «د نه باور کیدو وړ کار، مولن بیک کې د اسلام د پيغمبر کاریکاتور په ښکاره کولو د ښوونکي دنده ځنډول شوې.»
د سنا مجلس غړي ګیورګ بوشی لیکلي دي: «هیله ده دا خبر درواغ وي. خو که دا صحیح وي، نو د منلو وړ نه دی او په هیڅ صورت به ونه زغمل شي. د بیان پر آزادۍ جوړجاړی نه شي کیدای.»
د بلجیم په ګاونډي هیواد فرانسه کې د روان کال په اواسطو کې د یوه مسلمان ځوان له خوا زده کونکو ته د اسلام د پيغمبر کاریکاتور ښکاره کونکي ۴۷ کلن معلم د قتل پيښه، د فرانسې د خلکو او حکومت له شدید غبرګون سره مخامخ شوې وه.
د فرانسې ولسمشر امانویل مکرون اعلان وکړ چې د مذهبي شخصیتونو د کاریکاتورونو ترڅنګ د بیان د هر ډول آزادۍ په برخه کې به د دغه هیواد له قانون څخه دفاع وکړي.
د مکرون دغه اعلان په مسلمانو هیوادونو کې له شدید غبرون سره مخامخ شو او په ډیر شمیر اکثریت مسلمان میشته هیوادونو کې د فرانسې پر ضد د مظاهرو لړۍ پیل شوه.
د پنجشنبې په ورځ د فرانسې په نیس ښار کې په یوه کلیسا کې د یوه ترهګریز برید په نتیجه کې درې تنه ووژل شول.
همدارنګه په ۲۰۱۵م کال کې د شارلي ابدو مجلې پر دفتر تر برید وروسته، د فرانسې ترڅنګ په بلجیم کې هم څو ترهګریزې پيښې رامنځته شوې.
دویچه ویله: ش. ن/ ن.ص