د ترمپ له خوا په تور لیست کي د حوثي یاغیانو شاملیدل او ورسره د معاملې نه کولو ممنوعیت د بایدن د حکومت له خوا د یوې میاشتي لپاره وځنډیده. دا کار د یمنیانو سره د کومک په منظور تر سره کیږي چي په ډیر خراب حالت کي قرار لري.
انځور: Essa Ahmed/AFP/Getty Images
اعلان
د بایدن حکومت پرون دوشنبه (د جنورۍ ۲۵ مه) د یمن د حوثي یاغیانو سره د معاملې نه کولو تحریم د یوې میاشتي لپاره متوقف کړ. دغه تحریمونه هغه وخت عملي سول، کله چي د ترمپ حکومت حوثي یاغیان په تور لست کي شامل کړل. خو د بشر د حقوقو سازمانونو دغه تحریمونه د یمن خلګو ته د کومک رسولو ممناعت او په دغه هیواد کي د بشري حالت نور خرابیدل وبلل او د هغو په مقابل کي یې اعتراضونه وکړل.
د امریکا متحده ایالاتو د مالیې وزارت اوس اعلان کړی دی، چي له حوثي یاغیانو سره معاملات به د فبرورۍ تر ۲۶ مي، نیمي شپې پوري اجازه ولري. خو په هغو کي هغه مالونه او محصولات چي وختي ضبط سوي دي، نه شاملیږي.
دا اقدام تر هغه وروسته ترسره شوی چې د بایدن له خوا د خارجه وزارت لپاره نومول سوي وزیر، انتوني بلینکن اعلان وکړ چې «په تور لست کي د حوثي یاغیانو د شاملیدلو پر موضوع باندي به د سره غور وکړي او په یمن کي د سعودي عربستان د حملو څخه به نظامي ملاتړ متوقف کړي.»
انځور: Alex Edelman/AFP/Getty Images
د امریکا پخواني جمهوررئیس، دونالد ترمپ د سعودي عربستان، خصوصاً د ایران سره د مخالفت په موضوع کي ډیره نژدې همکاري درلودل او په همدې لاره کي یې د خپلې دورې په وروستۍ ورځ، یعني د همدې کال د جنورۍ میاشتي پر ۱۹ مه حوثي یاغیان، چي د ایران ملاتړ ورسره دی، د ترهگرو په لست کي شامل کړل.
د هغه راهیسي چي سعودي عربستان د ۶ نورو عربي هیوادو په همکارۍ د حوثي یاغیانو پرضد او یمن د رسمي دولت په طرفداری جنګ شروع کړ، تر اوسه پوري په لسهاوو زره انسانان وژل سوي او په میلیونو نور مهاجر سوي دي.
په جنګ ځپلي یمن کې د ناروغانو ناخواله وضعیت
له درو کلونو زیاته موده کیږي چې د سعودي عربستان په مشرۍ پوځي ائتلاف په یمن کې د حوثي یاغیانو پر ضد جنګیږي. آن روغتونونه هم له کورنۍ جګړې په آمان کې نه دي او په وژونکو ناروغیو اخته ناروغان له روغتیايي مرستو بې برخې دي.
انځور: Reuters/K. Abdullah
په لوړه بیه درملنه
خالد اسماعیل د خپلې لور ښی لاس ښکلوي. د هغه ۱۷ کلنه لور په سرطان ناروغۍ اخته ده او په همدې دلیل یې باید د درملنې له پاره د خپل کیڼ لاس قطع کیدو ته تن ایښی وی. پلار چې یې هر څه درلودل وپلورل او پور یې هم وکړ، خو له دې سره سره یې د خپلې لور له پاره تر دې د ښې درملنې توان نه درلود. هغه وایي: «جګړې زموږ ژوند ختم کړ. موږ نه شو کولی بهر ته ولاړ شو. دلته مې د لور له پاره تر دې بهتره تداوي نه وه.»
انځور: Reuters/K. Abdullah
د دولتي ملاتړ نه شتون
په پلازمېنه صنعا کې د سرطان تشخیص مرکز، له دوو کلونو راهیسې له حکومت څخه هیڅ مرسته نه تر لاسه کوي. دغه مرکز د نړیوالو مرستندویه سازمانونو لکه د روغتیا د نړیوال سازمان په مرسته خپلې چارې پر مخ وړي.
انځور: Reuters/K. Abdullah
د سرطان ناروغۍ لرونکو ماشومانو له پاره د چپرکټونو کموالی
د صنعا د سرطان د درملنې په مرکز کې موجود چپرکټونه کوچنیانو ته ځانګړې شوي دي. د تداوۍ دغه مرکز هره میاشت شا او خوا ۶۰۰ ناروغان مني. خو په تیر کال کې ناروغانو ته د رسیدګۍ له پاره د دغه مرکز بودجه یوازې یو میلیون ډالر وه.
انځور: Reuters/K. Abdullah
په انتظار خونو کې درملنه
زیات عمر لرونکي کسان یا په تذکرو کې او یا هم په انتظار خونو کې تداوي کیږي. نوموړي مرکز تر جګړې مخکې په کال کې ۱۵ میلیونه ډالره مرسته تر لاسه کوله او کولای یې شول چې آن د یمن په نورو روغتونونو کې د تداوۍ مرکزونو له پاره دارو درمل برابر کړي.