اسوشيتد پريس خبري آژانس او د ملگرو ملتونو چارواکو رپوټ ورکړی دی چې د بوسنيا چارواکو د هيواد په شمال ختيځه کرانجينا سيمه کې د ملگرو ملتونو له يوه کمپ څخه په سونو مهاجر ايستلي دي.
په بيهاچ ښار کې يو کمپ چې زياتره اوسيدونکي یې ځوانان ول، تخيله کړل شوی او تړل شوی دی. د دغه کمپ اوسيدونکي په يوه لیرې پرته سيمه کې پراته داسې کمپ ته ليږدول شوي دي چې د ژمي د يخو شپو او ورځو له پاره په سمه توگه مجهز نه دی او لا دمخه ډېر ډک دی.
د ملگرو ملتونو د مهاجرت نړيوال سازمان (آي او ام) څخه پيتر فون دېر اويريرت د تويتر له لارې ويلي: «د اونا سانا سيمې چارواکو د بيرا د مهاجرو د استوگنځای ټول ۳۵۰ اوسيدونکي په زور ليپا ته انتقال کړي دي. دغه کمپ لا دمخه په بشپړه توگه ډک دی.»
نوموړي همدا راز په لیپا کلي کې د مهاجرو يوه ويديو هم خپره کړې ده او زياته کړې ده چې ځينو مهاجرو بيرته بيهاچ ښار ته چې د کروشيا سره پر سرحد پروت دی، مخه کړې ده.
اويريرت زياته کړې: «ټول به نن شپه تر شنه آسمان لاندې تیروي چې غیرې انساني کار دی او هیڅ اړتيا ورته نه وه. دا د يوه بشري ناورين پېل دی.»
د مهاجرت سازمان دغه کارکوونکي اسوشيتد پريس خبري آژانس ته وويل چې له بيهاچ ښار څخه د شلو کيلومترو په واټن کې د ليپا کلي ته څېرمه پروت دا کمپ په اپريل مياشت کې جوړ شوی وو او ښايي ډېر ژر به یې چارواکي تړلو ته مجبور شي. هغه زياته کړه: «دا کمپ يوازې د دوبي د شرايطو له پاره جوړ شوی دی.»
د سرپناه ناوړه شرائط
د بوسنيا چارواکو له خپلو دې عملیاتو څخه دفاع کړې ده او ویلي یې دي چې دوی په دې آند چې په نورو ځايونو کې به د مهاجرو مناسبه پالنه امکان ولري.
د بوسنيا «بي اچ آر ټي» خبري شبکې د يوې سيمه ایزي چارواکي نيرمن کلاجچ له قوله ويلي: «موږ تخنيکي مرستې ته چمتو يوو او په دې آند يوو چې په ليپا کې په کافي اندازه ځای شته کیدای شي دغه کمپ له دوو تر درو زرو مهاجرو له پاره مناسب استوگنځای جوړيدی شي.»
سيمه ایزو چارواکو له اوږدې مودې راهيسې د بيرا د مرکز د تړلو هڅه کوله. بيرا د بوسنيا له هغو اوو کمپونو څخه يو دی چې «آي او ام» يې غم خوري. بوسنيايي چارواکي پلان لري دويم کمپ چې کابو ۷۰۰ کسان پکې ميشت دي، هم په راتلونکو ورځو کې وتړي خو تر اوسه روښانه نه ده چې دغه مهاجر به چیرته ساتل کيږي.
د کرواشيا سرحد ته څيرمه پراته مهاجرانځور: Kemal Softic/AP/dpa/picture-alliance د کرانجينا سيمې پنځه مهاجر کمپونه بوسنيا ته رسيدونکي کابو نيمايي مهاجرو ته د سرپناه ځايونه دي. د مهاجر کمپونو د تخليه کولو تر تازه عملياتو د مخه هم د اټکلونو پر اساس کابو ۲۵۰۰ مهاجرو سرپناه نه درلودله.
د مهاجرو هغه گروپونو چې د پناه غوښتنو په کمپونو کې ورته ځايونه نه دي ورکړل شوي، د کرواشيا پولې ته څېرمه په ځنگله کې ژوند کوي. هغوی په موقتي سرپناو کې اوسي چې ځينې یې نازکې خېمې او يا د کارتنونو او يا ونو له پاڼو څخه جوړې شوې نوري سرپناوي دي.
بوسنيا د هغو په زرونو مهاجرو په تمځای بدل شوی دی چې د اروپايي ټولنې هيوادونو ته د رسیدو هيله لري. زياتره دغه مهاجر په سرايوو او کرانجينا سيمه کې دي ځکه له پيړيو راهيسې له نژادي پلوه د ويشل شوي دغه هيواد نورې سيمې مهاجر نه قبلوي.
اروپايي ټولنې بوسنيا ته د مهاجرو د پالنې او له دغه بحران سره د مبارزې له پاره ۶۰ ميلیونه يورو ورکړي دي. زياتره دغه پیسې پر هغو کمپونو مصرفيږي چې چاري يې د ملگرو ملتونو د مهاجرت اداره پرمخ وړي.
زموږ له آرشيف څخه:
انځورونه: هغه مهاجر چې د کثافاتو د تخلیې په ځای کې ژوند کوي
د بوسنیا هرزګوینا په خاوره کې شاوخوا ۱۰۰۰ مهاجر اړ دي، په داسې ځای کې ژوند وکړي چې تر دې مخکې په کې کثافات تخلیه کیدل. دغه مهاجر د بیهاچ ښار په وچیاک سیمه کې په ډیرو سختو شرایطو کې ژوند کوي. نړۍ یې یوازې ننداره کوي.
انځور: DW/D. Planertوچیاک، د کثافاتو د تخلیې پخوانی ځای
د بوسینا چارواکو د جون میاشتې پر ۱۵مه نیټه له ښارونو څخه مهاجر اخراج او په دې سیمه کې چې له ښاره لس کیلومتره واټن لري، د هغوی د ځای پر ځای کولو بهیر پیل کړ. ډیر وخت افغان، پاکستاني او سوریایي ځوان نارینه مهاجر هڅه کوي چې د اروپايي ټولنې له پولې واوړي. له همدې کبله پولیس څه نا څه هره ورځ دې سیمې ته نوي مهاجر ورولي.
د بیهاچ د سره صلیب کمیته په ورځ کې دوه وارې د مهاجرو له پاره ډوډۍ برابروي. سهار هغوی ته یوه ټوټه ډوډۍ او ماښام ورته ډوډۍ او سوپ ورکول کیږي. خو په یوه ورځ کې دومره ډوډۍ کافي نه وي. د ملګرو ملتونو د مهاجرت او بې سرحده ډاکټرانو په څیر لوی سازمانونه دې سیمې ته ورغلل او تر څیړنو وروسته یې هغه بیرته پریښوده او مهاجر یو وار بیا یوازې پریښودل شول.
د ښځو او نارینه و له پاره جلا ځایونه
ښځې او ماشومان په بیهاچ کې نورو کمپونو ته استول شوي دي. وچیاک ته یوازې نارینه او تنکي ځوانان راوستل کیږي. د دې ځای تر ټولو وړوکی اوسیدونکی یوازې یوولس کاله عمر لري.
پولیس نیول شوي مهاجر بیرته همدې سیمې ته راولي
مهاجر پر ځکه خوب کوي. که خیمي ډکې وي نو تازه مهاجر باید بهر او د کثافاتو په منځ کې ویده شي. که څوک اروپايي ټولنې ته د تلو هڅه وکړي نو پولیس یې بیرته همدې سیمې ته راولي.
د شخصي رضاکارانو ابتکارونه
آلماني خبریال دیرک پلانرت، د مهاجرو له حاله خبر شو او ژر هغې سیمې ته ولاړ. هغه یو سیار کلینیک جوړ کړی چې په ورځ کې په کې د تر ۲۰۰ مهاجرو درملنه کیږي.
د مهاجرو له پاره طبي مرستې
یو سلوانیایي د طب مجصل اوس د رضاکار په توګه د یوه کلینیک سرپرستې کوي. د اتریش او آلمان ډاکټران د څو ورځو له پاره وچیاک ته ورغلل او په دې ځای کې یې ناروغان ولیدل. بیا وروسته دوه آلماني نرسان هم دې ځای ته د مرستې له پاره ورسیدل.
ناروغان د خیمي مخې ته په انتظار دي چې درملنه یې وشي. دې سړي ایټالیا ته د تللو هڅه وکړه خو پر لاره بیا د سلوانیا د پولیسو سپي وداړه. د سلوانیا پولیسو بیا هغه د کرواسیا پولیسو ته وسپاره. دې وایي چې پولیسو وهلي او بیا یې د بوسنیا پولې ته استولی دی.
د پولیسو له خوا د تاوتریخوالي په اړه رپوټونه
دغه سړی د کرواسیا د پولیسو په یوې برقي ډنډې ټپي شوی دی. ټول مهاجر د پولیس له ناوړه چلن څخه شکایت کوي. پولیسو له ډیرو مهاجرو څخه تر اخراج مخکې آن د هغوی بوټان هم اخلي.
یوه ځوان نارینه خپل پښتورګی د ۲۰۰۰ یورو په بدل کې وپلوره چې خپلې ښځې او درو ماشومانو ته خوراکي توکي او نور اړین مواد راونیسي. ځيني پاکستاني مهاجر د افغانستان پر پوله د جګړو کیسې کوي.
په کلینیک کې څه نا څه ۸۰ سلنه ناروغان د جلدي خارښ او یا د جلدي دانو ستونزې لري. دغه ناروغي د درملو په مرسته له منځه تلی شي خو په وچیاک کې نه. ځکه باید جامي او کمپلې پاکې شي. خو په دې کمپ کې د کالیو د پاکولو اسانتیا نه شته.
د اروپا په لور د ۱۰۰۰ یورو پورو په مقابل کې پیاده قاچاقي سفر
کرځنده تلیفونونه د مهاجرو او د هغوی د کورنیو د ارتباط یوازیني وسیلې دي. پر دې سربیره ځیرک تلیفونونه له مهاجرو سره مرسته کوي چې د اروپايي ټولنې پر لور خپله لار ومومي. خو اوس ډیری مهاجر تلیفونونه نه لري ځکه د کرواسیا پولیسو ترې اخیستي. یو مهاجر اروپايي ټولنې ته د پیاده رسیدو له پاره ۱۰۰۰ یورو او په موټر کې د تلو له پاره بیا ۳۰۰۰ یورو ته اړتیا لري.
احتیاط وکړئ، د ماین خطر موجود دی!
د وچیاک په کمپ کې د ماینونو د ګواښ یوه لوحه نصب شوې ده. په اروپا کې د ماینونو بله سیمه له دې ځایه څه نا څه زر متره لیرې پرته ده. ماین پاکوونکي وايي چې مهاجر یې له ماینونو په ډکه سیمې کې د ګرځیدو پر مهال لیدلي دي. تر اوسه د ماین چاودنې له کبله کومه پیښه نه ده رامنځ ته شوې.
