د اروپايي اتحاديې غړی هيواد هالند يو له هغو اروپايي هيوادونو څخه دی چي د سرو زرو زياتي زيرمي لري. د يو اس فنډس په نوم انټرنټپاڼي د راپور له مخي د دغه هيواد مرکزي بانک د ۲۰۲۰م کال په اګست مياشت کي تقريبا ۶۱۲ ټنه سره زر لرل او په دې توګه په ټوله نړۍ کي لسم لوی مرکزي بانک دی.

په هند کي نه يوازي په شخصي او خصوصي توګه د سرو زرو مينه وال زيات دي، بلکي د دغه هيواد مرکزي بانک هم په لوړه اندازه سره زر لري. د يو اس فنډس د راپور له مخي د دغه هيواد مرکزي بانک د ۲۰۲۰م کال په اګست مياشت کي ۶۵۷ ټنه سره زر لرل او په دې توګه تر ټولو زياته طلا لرونکی نهم بانک و.

جاپان د نړۍ تر ټولو لوی دريم اقتصادي قدرت دی. خو د سرو زرو د زيرمي په ترڅ کي دغه هیواد پر اتم مقام دی. د دغه هيواد مرکزي بانک د ۲۰۲۰م کال په اګست مياشت کي ۷۶۵ ټنه سره زر لرل.

سويس چي د مساحت او نفوس له مخي نستبا کوچنی اروپايي هيواد دی، د اقتصاد له مخي يو کوچنی قدرت دی. د دغه هيواد د مرکزي بانک د سرو زرو زيرمي د ۲۰۲۰م کال په اګست مياشت کې ۱۰۴۰ ټنه اټکل سوي دي.

چين چي د نړۍ په تر ټولو لويو اقتصادي قدرتونو کي شميرل کيږي، مرکزي بانک يې د ۲۰۲۰م کال په اګست مياشت کي ۱۹۴۸ ټنه سره زر لرل. له دغو څخه ۱۰۰ ټنه يوازي د ۲۰۱۸م کال د دسمبر او ۲۰۱۹م کال د اګست تر منځ رانيول سوي دي.

په تيرو ۷ کلونو کي د روسيې مرکزي بانک يو له تر ټولو لوی د سرو زرو رانيوونکی دی. د دغه مرکزي بانک د سرو زرو زيرمي د ۲۰۲۰م کال په اګست مياشت کي تقريبا ۲۳۰۰ ټنه او په دې توګه په نړۍ کي تر ټولو ستره پنځمه زيرمه وه.

د يو اس فنډس د راپور له مخي د فرانسې هيواد مرکزي بانک د ۲۰۲۰م کال په اګست مياشت کي ۲۴۳۶ ټنه د سرو زرو زيرمي لرلې. په دې توګه دغه مرکزي بانک په نړۍ کي څلورم نمبر تر ټولو زياتي د طلا زيرمي لرونکی مرکزي بانک دی.

د فرانسې او آلمان تر څنګ د ايټاليا د اروپا له تر ټولو قوي او سترو درو اقتصادونو څخه بلل کيږي. د ۲۰۲۰م کال په اګست مياشت د دغه هیواد د مرکزي بانک د طلا د زيرمو حجم ۲۴۵۱ ټنه او په دې توګه په نړۍ کي پر دريم نمبر و.

آلمان په اروپايي ټولنه او په ټوله اروپا کي تر ټولو لوی اقتصاد دی. د دغه هيواد مرکزي بانک د۲۰۲۰م کال په اګست مياشت کي په ټوليزه توګه ۳۳۶۳ ټنه سره زر لرل او په دې توګه په نړۍ کي تر ټولو زياته د سرو زرو لرونکی دويم مرکزي بانک دی.

امريکا متحده ايالات په ټوله نړۍ کي د نورو ټولو هيوادونو په پرتله د سرو زرو ستري زيرمي لري. د دغه هيواد مرکزي بانک د ۲۰۲۰م کال په اګست مياشت کي ۸۱۳۴ ټنه سره زر لرل. د يو اس فنډس وېبپاڼي د راپور له مخي په دې توګه د امريکا متحده ايالاتو مرکزي بانک تر ټولو زيات سره زر لرونکی بانک دی. [ليکونکی: احمدولي اڅکزی]