د چين راډيو تلويزيون نړيوالې ادارې د پنجشنبه په ورځ وویل چې پر بي بي سي باندې بنديز په دې دلیل لګول شوی چې دغې نړيوالې رسنۍ د چين له مقرراتو څخه «درنه سرغړونه» کړې ده.

د چين د راډيو تلويزيون ادارې په يوې اعلاميه کې ويلي دي چې «بي بي سي ورلډ نيوز» د چين په اړه په خپلو خپرو شوو رپوټونو کې له رسنيزو مقرراتو څخه درنه سرغړونه کړې چې په هغو کې په «خبرونو کې نه شفافیت او نه بې پرېتوب» او د «چين د ملي منافعو خلاف کړنې» شاملې دي.

په اعلاميه کې زياته شوې، چې د يادو دلايلو پر اساس، بي بي سي په چين کې د غیرحکومتي رسنیو له پاره د ټاکلو قوانينو شرایط نه دي پوره کړي، چې له امله يې په راتلونکي کال کې د نشراتو د ادامې درخواست نه منل کيږي.

 په چین کې د بي بي سي ورلد نيوز تلويزيوني خپرونې تر ډيره په هوټلونو او هستوګنځايونو کې د لیدلو وړ دي. په دغه هیواد کې د رويټرز خبري آژانس دوو خبريالانو ويلي دي چې دغه چینل د دوی د تلويزيونونو له پردو څخه ورک شوی دی.

بي بي سي د چين د دغه اقدام په اړه خپګان ښوولی دی. د دغې رسنۍ له خوا په يوې خپره شوې اعلامیه کې راغلي دي: «موږ له دې کبله چي چينايي چارواکو په دغه اقدام لاس پوري کړی، خپه يوو. بي بي سي د نړۍ په سطحه يوه تر ټولو بااعتباره رسنۍ ده چې پرته له کومې ويرې یا تمې له ټولې نړۍ څخه منصفانه او ناپيلې رپوټونه خپروي.»

په بريتانیا کې پر چينايي ټلويزيون بنديز

د بریتانيا د رسنیو د مقرراتو تنظیم کوونکي ادارې «آفکام» تر دې دمخه د روانې ميلادي مياشتې په سر کې د چين د حکومتي تلويزيون (سي جي ټي ان) لائسنس يا جواز فسخه کړی وو. آفکام ادعا کړې وه چې په ترسره شوو تحقیقاتو کې يې موندلې چې د «سټار چاينا ميډيا ليمتد» شبکې دغه لائيسنس په غير قانوني توګه ترلاسه کړی وو.

د بریتانيا د بهرنيو چارو وزير، دومنيک راب د بي بي سي نړيوالې رسنۍ پر وړاندې د چين اقدام «د مطبوعاتو د آزادۍ پر وړاندې د نه منلو وړ محدودیت» بللی دی.

دویچه ويله /م.ک.ص./ن.ز.