د کرکیټ پخوانی ستوری عمران خان د یکشنبې په ورځ په پارلمان کې د نه باور رای سره مخامخ او له واکه لیري کړای شو. نوموړي هڅه کړې وه چې د پارلمان په منحلولو سره د نه باور رایې اچونې پروسې مخه ونیسي او تر وخت مخکې انتخابات ترسره کړي، خو د پاکستان سترې محکمې د پارلمان منحلول غیر قانوني اعلان کړل.
له واک څخه د عمران خان تر لیري کیدو وروسته، د اپوزیسیون سیاستوال او د «پاکستان مسلم لیګ ن» ګوند مشر شهباز شریف د نوي لومړي وزیر په توګه دنده پیل کړه.
عمران خان او ګوند یي له واک څخه د ده په لیري کولو کې د امریکا متحده ایالاتو د توطیې خبره وکړه، خو خان د خپلې ادعا له پاره کوم ثبوت وړاندې نه کړ او ویلي یي دي چې دغه اسناد محرم پاتې کیږي.
عمران خان د ۲۰۱۸م کال په پارلماني ټاکنو کې واک ته ورسید. په هغه وخت کې پر ده داسې تورونه لګول کیدل چې ګواکې د پاکستان ځواکمن پوځ د خلکو په رایو کې د ده په ګټه لاسوهنه کړې ده.
په دغه ۲۲۰ میلیونه نفوس درلودونکي هیواد کې تر ټولو دمخه د اقتصادي ستونزو له کبله د عمران خان په محبوبیت کې کمښت رامنځته شو. همدارنګه د اپوزیسیون ډلو هغه د بهرنۍ تګلارې په ویجاړولو او ناوړه اقتصادي او سیاسي مدیریت تورنولو.
عمران خان په هم هغه ورځ چې روسیې پر اوکراین پوځي یرغل پیل کړ، په مسکو کې د روسیې له ولسمشر ولادیمیر پوتین سره لیدلي و.
آژانسونه: ش.ن/ ن.ز
انځوریز رپوټ: په پاکستان کې د بې باورۍ رایې کله او چا ته ورکړل شوي؟
په پاکستان کې عمران خان دریم داسې لومړی وزیر شو، چې پر وړاندې یي د نه باور پروسه پیل شوه. مخکې تر دې بی نظیر بهټو او شوکت عزیز هم له دې بهیر سره مخامخ شوي ول. دا چې دا کله او څنګه وشول په دې انځوریز رپوټ کې یي لوستلی شئ.
انځور: Wakil Kohsar/AFP/Getty Images
د عمران خان پر ضد د نه باور یا عدم اعتماد رایې بهیر
د پاکستان مسلم لیګ «ن» مشر شهباز شریف د ۲۰۲۲م کال د مارچ په ۲۸ د لومړي وزیر عمران خان پر ضد په ولسي جرګه کې د نه باور یا عدم اعتماد رایي بهیر غوښتنه وکړه. اپوزیسیون پر عمران خان تور لګولی و چې نوموړی په دغه هیواد کې د اقتصادي، سیاسي او ټولنیز خراب وضعیت مسئول دی. د پارلمان له ۳۴۲ چوکیو څخه د پاکستان له تحریک انصاف ګوند سره ۱۵۵ چوکې دي او د نه باور وړ رایې له پاره ۱۷۲ رایې پکار وې.
انځور: Anjum Naveed/AP/picture alliance
هیواد له قانوني بحران سره مخ دی
ټاکل شوې وه چې د اپریل په دریمه د عمران خان پر ضد د عدم اعتماد تحریک بهیر عملي شي، خو داسې ونه شول. ځکه د عمران خان پر غوښتنه ولسمشر عارف علوي د پارلمان دواړه شوراګانې منحل کړې. د سیاسي او قانوني شنونکو په حواله په پارلمان کې د نه باور رایې پروسې تر وړاندې کیدو وروسته شوراګانې نه شي منحل کیدلی او اوس دغه وضعیت د پاکستان له پاره پر یوه نوي سیاسي بحران بدلیدلی شي.
انځور: Aamir QURESHI/AFP
د شوکت عزیز پر ضد د نه باور رایې پروسه
تر دې مخکې په ۲۰۰۶م کال کې هم اپوزیسیون د هغه وخت د لومړی وزیر شوکت عزیز پر وړاندې د نه باور رایې بهیر پیل کړی و. دا د پاکستان په تاریخ کې دویم ځل وو چې د یوه لومړي وزیر پر ضد د عدم اعتماد تحریک یا د نه باور رایې ترسره کیدو غوښتنه شوې وه. پر شوکت عزیز د فساد تور لګول کیدو وروسته دغه اقدام عملي شوی وو.
انځور: Yu Jie/HPIC/picture alliance
یو وار بیا د عدم اعتماد تحریک ناکامي
د شوکت عزیز پر ضد د نه باور رایې پروسې د بریالیتوب له پاره اپوزیسیون ۱۷۲ رایو ته اړتیا درلوده، خو د هغه وخت اپوزیسیون وکولی شول یوازې ۱۳۶ رایې ترلاسه کړي، په داسې حال کې چې د هغه وخت لومړي وزیر شوکت عزیز ۲۰۱ رایي ترلاسه کړې. په دې توګه د عزیز د بی اعتماده کولو پروسه هم ناکامه شوه.
انځور: Anjum Naveed/AP Photo/picture alliance
د پاکستان په تاریخ کې د لومړي ځل له پاره د بی باورئ رایې بهیر
د پاکستان په تاریخ کې د لومړي ځل له پاره د بی باورۍ رایې پروسه په ۱۹۸۹م کال کې د بی نظیر بهټو پر وړاندې پر مخ وړل شوې وه. د مسلم لیګ ګوند څخه پخواني لومړي وزیر نواز شریف په هغه وخت کې د دې بهیر پیلولو پر مهال پر بی نظیر بهټو تور لګولی و چې د هغې تګلارې په هیواد کې د درځ پيدا کیدو سبب کیږي او دا په پریکړو کې د نورو سیاسي ګوندونو او قوتونو غوښتنې په پام کې نه نیسي.
انځور: ZUMA Wire/IMAGO
د نه باور رایې له بهیر څخه په کامیابۍ سره د بی نظیر وتل
د ۱۹۸۹م کال د نومبر په ۲ نیټه د پاکستان د هغه وخت پارلمان چې ۲۳۷ غړي یي درلودل د نه باور رایې پروسې په اړه رای اچونه وکړه. ۱۰۷ استازو د بی نظیر پر ضد او ۱۲۵ یي په ملاتړ خپلې رایې کارولې وې. اپوزیسیون ته د بریالیتوب له پاره ۱۱۹ رایې پکار وې. په دې توګه هغوې یوازې د ۱۲ رایو په توپير سره په دغه پروسه کې بریالي نه شول. د پنجاب لومړي وزیر نواز شریف دغه کار د اپوزیسیون اخلاقي برتري بللې وه.
