کرونا ولي په جرمني کي د خارجي محصلینو تعداد راکم کړی؟
۱۳۹۹ بهمن ۱۰, جمعه
د هغو خارجي محصلینو تعداد چي په ۲۰۲۰ م کال کي یې په جرمني کي تحصیل پیل کړی دی، نسبت تیر کال ته ۱۰ فیصده راکم سوی دی. دغه کمښت ترهرڅه دمخه د کرونا وبا د خپریدو سره سم مشاهده کیږي.
انځور: Axel Kirchhof/UKE Universitätsklinikum Hamburg Eppendorf
اعلان
د کرونا بحران د اقتصاد پر ودي، عایداتو او کاروبار سربیره په پوهنتونو او نورو عالي مؤسسو کي د محصلینو پر تعداد، خصوصأ خارجي محصلینو پر شمير باندي ډیر منفي تأثیر کړی دی.
په ویسبادن کي د جرمني د احصايې مرکزي ادارې اعلان کړی دی، چي د ۲۰۲۰ م کال په دوهم سمسټر کي د تیر کال همدغه وخت په نسبت د خارجي محصلینو تعداد ۱۰ فیصده راکم سوی او فقط ۷۱۶۰۰ تنو په پوهنتونو او نورو عالي تحصیلي مؤسسو کي خپل نومونه ثبت کړي دي.
انځور: picture-alliance/AP Photo/B. Nakamura
ویل کیږي، چي د کرونا ویروس د شیوع په دلیل وضع سوي قیودات د هغوی د راتګ مانع ګرځیدلي دي: مثلأ سرحدونه اکثرأ تړل سوي او یا ورڅخه تیریدل محدود سوي، پروازونه راکم سوي او یا هم د جرمني له طرفه اجازه نه ورکول کیږي. په دې دلیل دغه هیواد ته د محصلینو راتګ هم سخت سوی دی.
د ۲۰۲۰ کال په اول سمسټر کي لا په مجموع کي دوه ميلیونه او ۷۲۳ کسانو په عالي تحصیلي مؤسسو کي ځانونه ثبت کړي وه چي دا د تیر ۲۰۱۹ م کال په تناسب ۰،۸ فیصده لوړوالی ښيي او د هغه مطابق یې د خارجي محصلینو تعداد هم لوړ وو.
د نړۍ تر ټولو بهترين ۱۰ پوهنتونونه کوم دي؟
د نړۍ بهترين پوهنتونونه او تحصيلي ادارې د سبا نړيوال او سيمه ايز مشران تربيه کوي. دا چي په ۲۰۲۱م کال کي به د تحصيل پېلولو له پاره تر ټولو بهترين لس پوهنتونونه کوم وي، دلته يې وپېژنئ:
انځور: Fotolia/Konstiantyn
لسم مقام ـ د شيکاګو پوهنتون، امريکا متحده ايالات
دغه پوهنتون تېر کال پر نهم مقام وو او سږ کال و لسم مقام ته راغلی دی. د امریکا متحده ایالاتو د نورو پوهنتونونو په څېر دغه پوهنتون هم يوه خصوصي تحصيلي اداره ده.
انځور: AFP/Getty Images
نهم مقام ـ پرينسټن پوهنتون،ا مریکا متحده ايالات
دغه پوهنتون تېرکال پر شپږم مقام وو او سږ کال و نهم مقام ته راغلی دی.
انځور: picture-alliance/AP/M. Evans
اتم مقام ـ يېل پوهنتون، امريکا متحده ايالات
يېل پوهنتون د تير کال په شان بيا پر اتم مقام راغلی دی. دغه پوهنتون د امریکا د کنېټيکېټ په ايالت کي واقع دی.
انځور: picture alliance/AP Photo/P. Eaton-Robb
اووم مقام ـ د بېرکلي پوهنتون، امريکا متحده ايالات
دغه پوهنتون تېر کال پر ۱۳ مقام وو خو سږ کال و اووم مقام ته راپورته سوی دی. دغه پوهنتون د کرونا پاندمي په وخت کي پرمختګ کړی دی.
انځور: Imago
شپږم مقام ـ د کېمبريج پوهنتون، بريتانيا
د لسو بهترينو پوهنتونونو په ليسټ کي کېمبريج دويمه بريتانوۍ تحصيلي اداره ده. تېر کال دغه پوهنتون پر دريم مقام وو.
انځور: Fotolia/Konstiantyn
پنځم مقام ـ د مېسيچوسېټس د ټيکنالوژۍ انسټيټيوټ، امريکا متحده ايالات
دغه پوهنتون د ټيکنالوژۍ د زدکړو په برخه کي د نړۍ په بهترينو پوهنتونونو کي شميرل کيږي. دغه پوهنتون تېر کال هم پر پنځم مقام وو.
انځور: Imago
څلورم مقام ـ د کاليفورنيا د ټينکالوژۍ انستيتيوټ، امريکا متحده ايالات
د نړۍ د لسو بهترينو پوهنتونونو په ليسټ کي څلور يې په امريکا متحده ايالاتو کي واقع دي. د کاليفورنيا دغه انستيتيوت تېر کال پر دويم نمبر وو خو سږ کال څلورم ته راکښته سوی دی.
انځور: picture-alliance/dpa/R.Chiu
دريم مقام ـ هارورډ پوهنتون، امريکا متحده ايالات
د هارورډ پوهنتون زيات محبوب دی او تېر کال د نړۍ د بهترينو پوهنتونونو په ليسټ کي پر۷ مقام وو خو سږ کال و دريم مقام ته جګ سوی دی.
انځور: picture-alliance/dpa/R. Haid
دويم مقام ـ د سټېنفورډ پوهنتون، متحده ايالات
د امريکا متحده ايالاتو دغه پوهنتون تېر کال پر څلورم مقام وو. خو سږ کال و دويم مقام ته راپورته سوی دی.
انځور: King of Hearts/Wikimedia Commons/dpa
لومړی مقام ـ آکسفورډ پوهنتون، بريتانيا
د بريتانيا آکسفورډ پوهنتون له تيرو ۵ کلونو راهيسي د تر ټولو ښو پوهنتونونو په ليسټ کي پر لومړي مقام ځای لري. د نړۍ بل هيڅ پوهنتون د دغه پوهنتون سره سيالي نه سي کولای. يادونه: دغه معلومات د (https://www.timeshighereducation.com/) له خوا د ۲۰۲۰ کال له پاره د نړۍ د تر ټولو بهترينو پوهنتونونو له خپور سوي ليسټ څخه اخيستل سوي دي.
